Téater Jungut Sari Jayanti Festival Téater Berbahasa Bali 2024

Balai Bahasa Bali

Balai Bahasa Provinsi Bali ngalaksanayang parikrama Féstival Téater Berbahasa Bali warsa 2024. Parikrama puniki kalaksanayang kalih rahina, ngawit 20 kantos 21 Novémber 2024 ring Gedung Ksirarnawa Taman Budaya (Art Centre), Dénpasar.

Ketua Panitia Festival, I Gdé Wayan Soken Bandana, M.Hum., nguningayang, pamilet Féstival Téater Berbahasa Bali puniki wantah sisia SMA/SMK sa-Provinsi Bali. Wénten 14 kelompok téater sané nyarengin féstival puniki. “Soang-soang kelompok wénten 10 diri, dadosnyané wénten 140 diri pamilet féstival puniki,” baos Soken Bandana.

Kelompok téater sané nyarengin Féstival Téater Berbahasa Bali warsa 2024 inggih punika:

Garaka, SMAN 1 Amlapura (Karangasem)

Jineng, SMAN 1 Tabanan

Sangsaka, SMKN 1 Denpasar

Tantra, SMAN 2 Abiansemal (Badung)

Rasa, SMKN Bali Mandara (Buleleng)

Taksu Smadara, SMAN 2 Semarapura (Klungkung)

Tiga, SMAN 3 Denpasar

Jungut Sari, SMAN 1 Sukawati (Gianyar)

Ekalawya, SMAN 1 Semarapura (Klungkung)

Antariksa, SMAN 7 Denpasar

Teater SMKN 3 Sukawati (Gianyar)

Jnana Yoga, SMAN 1 Amlapura (Karangasem)

Prapat, SMAN 2 Kuta (Badung)

Kirana, SMAN 6 Denpasar.

Soken Bandana ngawewehin, Féstival Teater Berbahasa Bali puniki wantah sinalih tunggil jalaran anggén ngajegang basa miwah sastra Baliné. Tur parikarama puniki mapaiketan sareng Révitalisasi Bahasa Daérah (RBD). “Pamilet Révitalisasi Bahasa Daérah punika wantah sisia SD miwah SMP. Warsané puniki, sisia SMA miwah SMK taler kasarengang malarapan antuk féstival puniki,” imbuh Soken.

Lianan ring punika, mawit saking féstival puniki, kaaptiang sumangdané prasida nuldulin manah para aném-anémé ring widang téater, taler nincapang kréativitas sisiané ring widang seni drama modérn, ipun sayan urati ring basa daérah, nincapang rasa manyama sareng sisia saking sekolah lianan, miwah pinaka utsaha mangda para sisiané uning ring kawéntenan satua utawi cerita rakyat ring Tanah Air.

Pinaka panureksa ring pacentokan puniki wantah praktisi miwah akademisi akéhnyané limang diri, inggih punika Ida Bagus Martinaya, S.Pd., M.Sos., Dr. A.A. Sagung Mas Ruscitadéwi, M.Fil.H, Drs. Ketut Mandala Putra, M.Hum., Ida Ayu Wayan Arya Satyani, S.Sn, M.Si, miwah Dr. A.A. Sugiantiningsih.

Risampuné katuréksa olih angga panuréksa, kapolihang jayanti Féstival Téater Berbahasa Bali warsa 2024 inggih punika:

1. Jayanti I Teater Jungut Sari, SMAN 1 Sukawati

2. Jayanti II Teater Tiga, SMAN 3 Denpasar

3. Jayanti III Teater Antariksa, SMAN 7 Denpasar

4. Harapan I Teater Jineng, SMAN 1 Tabanan

5. Harapan II Teater Sangsaka, SMKN 1 Denpasar

6. Harapan III Teater SMKN 3 Sukawati

Ring panguntat parikrama punika, Kepala Dinas Kebudayaan (Kadisbud) Provinsi Bali, Prof. Dr. I Gedé Arya Sugiartha ngaturang suksma majeng ring para pamilet. “Rahajeng majeng ring para jayanti,” baos mantan Réktor ISI Dénpasar punika.

Arya Sugiartha taler ngaturang suksma majeng ring Badan Bahasa miwah Balai Bahasa Provinsi Bali sané sampun sareng ngajegang basa Bali. Manut ipun, ring Indonésia wénten 720 bahasa daérah, sakéwanten sampun akéh sané tambis-tambis ical utawi punah.

“Kantun 21 basa daérah ring Indonésia sané kantun kaanggén sarahina-rahina. Sinalih tunggilnyané wantah basa Bali. Yadiastun asapunika, iraga sareng sami patut setata ngajegang, duaning mangkin sayan rered warginé sané nganggén basa Bali sarahina-rahina,” baos ipun.