Puisi-Puisi Sadarana Madé Suar-Timuhun; Sasimbing Wong Tani
.jpg)
Sasimbing Wong Tani
Toyan subaké mageroh
Tatandurané mokoh-mokoh
Tanah cariké jimbar-jimbar
Wong taniné makenyung bingar
Pantuné makenyir kuning-kining
Wong taniné girang magending
Paksi-paksiné pada manguci
Pantun-pantuné sayaga kaanyi
Punika crita indiké riin
Idayang cingakin mangkin
Embahan toyané ngecir
Tatandurané seming ligir
Gending wong taniné tamis-tamis ical
Nénten malih katon pamargin i singkal
Tanah cariké sayan cupek akéh kabalbal
Suaran pabriké sayan akéh medal
Gumatat-gumité sedih pedih
Ical genahipun sané luih
Wong taniné pada jerih
Kakaonang wong sugih ririh
Timuhun, Januari 2024
Makarma Melah
makarma melah
lascaryaning manah
ten ngaptiang upah
ten sangkaning jinah
makarma melah
ngamargiang lampah
salantang galah
sajeroning genah
makarma melah
palané membah
makarma melah
picané maliah
Dénpasar (ring Kantor Dinas Kebudayaan Provinsi Bali), 15 Maret 2023
Basa Bali Siniwi
Sampun makudang masa ipun mayasa
Pinaka basa sané nginggilang rasa
Saking riin ngantos mangkin
Kantun ngulangunin
Saking nguni katami
Tatamian para lelangit Bali
Basa luih sujati basa ibu pertiwi
Boya ja basa ngawi-ngawi tan paaji
Basa Baliné kantun maurip
Naenin kauripang antuk gerip
Aksara Baliné mauikir masunar
Antuk élogan i pangrupak ring lontar
Sastra Baliné kantun ngumbara
Ring sakancan pamargin parikrama
Dados titi pangancan
Ngamargiang kauripan
Krama Bali patut bangga
Basa Baliné nénten ja kuna
Mangkin sampun sayan-sayan siniwi
Sayan werdi sajeroning panglimbak téknologi
Timuhun, Agustus 2024
Madé Suar-TimuhunI Madé Suartana utawi sané ketah kauningin Madé Suar-Timuhun ring kakawian-kakawiannyané embas ring Banjar Tengah, Timuhun, Klungkung, 17 Juni 1987. Dané ngawit nyurat sastra Bali modéren rikala kantun kuliah lan aktif nyurat warsa 2013. Puisinnyané ngawit kawedar ring Bali Orti (Bali Post) bulan April warsa 2013 lan warsa 2014 sampun kawedar ring Médiaswari (Pos Bali). Dados narawakia ring Ubud Writers and Reader Festival 2016.
.jpg)
No comments