Kamu Kenapa?

Olih: I Gusti Lanang Sutéja Naréndra

Sumber Gagambaran: id.pinterest.com

Mabalih tivi padaduanan. Sedeng demena mabalih sinétron azab, ada iklan belanja online ngaliwat.

“Kamu kenapa?”

“Ngehéng!”

Sagét suba ada hapé baru.

“Kamu kenapa?”

“Gosong!”

Sagét ada méjik jér baru.

“Kamu kenapa?”

“Panas!”

Sagét ada kipas angin baru.

Kurenan tiangé nuléngék mabalih iklané ento. Suud kéto, jani tiang toliha ngédéngang sebeng sebet cara anaké luh matagihan di iklané ento. Péééh... suba tawang tiang tatujoné. Pasti lakar matagihan nénénan! Bakat saru-saru tiang, ia nelélep. Ngaraos sinted pesaja.

“Iiisssh... lelaki tak peka!”

Tiang beber serba salah bana. Kujang jani? Kakécér sing ngelah. Yén takonin, “kamu kenapa?” Nyanan magenep-genep tagiha, apa anggo mayah? Celekotokané... Iklané ento ngaé tiang jatuh harga diri!

Makelo tiang nyaru-nyaru sambilang nginyukang kaliadrem piing. Jani buin tiang tuléngéka, sada paekanga muané ka muan tiangé. Néh, telah suba uleh-ulehan tiangé, terpaksa tiang matakon, nuutang anaké muani di iklané ento.

“Kamu kenapa?”

Ngantiang pasautné, katos tiang magelekan cara kuluk nguntal bantal ketan. Apa ya lakar tagiha...

“Meled...” Kéto sautné manying pesaja. Tiang sayan bingung, apa ya meledanga?

Ah, melahan buin takonin.

“Kamu kenapa?”

“Meled...” Tingtinganga dasterné. Nah tawang jani maksudné, pasti nagih daster baru! Lantas tiang nyautin.

“Nah buin telun, di betengé!”

“Meled pang jani!” Bejek-bejeka tanggu dasterné, ilut-iluta sayan menékang.

Badah... I Luh sing peka! Suba tawanga kurenané kena PHK, jani matagihan daster baru sing dadi tanggehang. Celekotokané...

“Nyai, sing dadi tanggehang bin puan?”

Ia ngituk, manying pesaja.

“Nah, tahanang malu buin amanian!”

Buin ia ngituk, sayan manying.

Béh, ngarodok basang tiangé. Sing nyidang bahan ngelipekang kenehé, lantas bangras tiang ngaraos.

“Wééé... Nyai, suba tawang kurenané maPHK, jani soléh-soléh tagih Nyai!”

Sagét ia magébras bangun, macelep ka kamar lantas jelanané magablég keras pesaja! Klik... mamunyi seregé makancingan.  

Apakpakan basé, hapé tiangé mamunyi. Ada WA masuk. Mara buka, yééé... I Luh ngechat.

“Dasar lelaki tak peka! Lamun kéto, Pak Gedé lakar baang isin tengah dasteré!”

Mbééé.... Tiang bengong cara kebo mabalih film layar tancap. Celekotokané....

 

(Macang Rumah Cinta Seribu Jendela)

I Gusti Lanang Sutéja Naréndra 
magenah ring Karangasem tur makarya dados guru.