Caling Asu Bang

Olih: I Pandé Putu Alit Antara

Ayu Darini mula anak luh sané aget numitis ka mrecepada, sawiréh ia ngelah mémé bapa sané sanget nyayangang tur apa sané ketagih lakar kaisinin. Ia wantah padidiana tusing ngelah nyama. Ento makerana ia manja tur apa ané tagiha apang maan. Ayu Darini suba kasekolahang ngantos tamat sarjana. Jani ia suba dadi pegawé di Kota Dénpasar. Sawiréh tusing ngelah nyama muani ditu sedina-dina bapané miteketin apanga ia ngalih sentana mangda tusing putung keturunané.

“Cening Ayu, ingetang pabesen bapané, alihang ragané tunangan ané nyak ajak nyentana, apang tusing putung keturunané dini, ento ingetang satuan Sang Jaratkaru ané suba taén bapa satuayang tekén Ayu, kadén kerana tusing ngelah pratisentana, leluhurné Sang Jaratkaru megantung di tiing petungé.”

Kecawis olih Ayu Darini, “nah tenang dogén bapa, bantas ngalih aukud, kadirasa tatelu presida baan tiang ngalihang.”

Ayu Darini mula anak bajang ané seleg pesan magaé. Di kantorné ia tusing taén ngidih ijin utawi tusing masuk. Ia kasengguh rajin olih pimpinan kantorné. Jani Ayu Darini suba ngelah tunangan ané madan Ngurah Kusuma, ia magaé dadi karyawan hotél ané ada di Sanur. Kacunduk rikanjekan Ayu Darini melali ka pesisi Sanur. Tan dumadé nepukin baya, kagulung olih ombak sané gedé. Rikala ento Ngurah Kusuma nyelametang hidupné, kaajak ka sisin pasihé. Ayu Darini pingsan tur basangné bek misi yéh pasih. Drika katulungin tur kaajak ka Puskésmas ané ada di wewidangan Sanur.

“Adan tiangé Ayu Darini saking Dénpasar, men beli sira adané sané nulungin tiang?” asapunika raosné Ayu Darini. Kacawis olih Ngurah Kusuma, “adan beliné Ngurah Kusuma, magaé dini di hotél Bali Antik bagian room boy, asal beliné saking Tabanan.” Sesukat makenalan ditu Ayu Darini marasa mautang urip tekén Ngurah Kusuma, ditu lantas saling tukaran nomor HP mangdené bénjangan aluhan ngubungin.

Ayu Darini masih demen ngubuh saananing soroh asu, minakadi asu ras Kintamani, ras Cina, ras Éropa miwah sané siosan. Di jumahné di Dénpasar ia khusus ngelah kandang asu, ané atep ajak umah tongosné ia mesaré. Baan demené tekén maubuhan asu, kanti ngaé ia kamar-kamar tongos asuné medem. Ada masih kagaé balé pesandekan asu sakadi balé bengong miwah sané mabuat kawangun sema asu. Maan kanti mémé bapané nyapatin Ayu Darini unduk pelaksanané sané soléh totonan. “Cening Ayu dadi magenep gaé, ngaé umah lan sema asu, sing dadi pipis ceningé pejang di bank, apanga liu maan bunga.”

Kecawis olih Ayu Darini. “Mémé ajak Bapa eda sanget ngurus dademenan tiangé ené, yén mémé ajak bapa ngelarang, tiang lakar ngalahin mati.”

Baan liuné Ayu Darini ngubuh asu, kanti ia ngalih pembantu ajaka patpat ané lakar nyiagayang seananing kaperluan asuné, minakadi ngemaang asuné neda, ngaukang tain asuné, mersihin kandang, ngemandusin miwah nanem yéning wénten asu sané mati. Asuné sané mati katanem di sema asu ané suba kasediayang, miwah kaupacaraian manut sekadi patut. Taén Ngurah Kusuma melali ka umahné Ayu Darini, sanget bayuné tengkejut tur takut sawiréh mula ia tusing bani tekén asu, ento makerana ia mutusing matunangan ngajak Ayu Darini. Kalintang sebet pisan manahné Ayu Darini saantukan kasuudin olih gegélannyané. Ento makerana ia jengah tur mapinunas tekén Ida Sasuhunan sané sungsunga ring gedong suciné. Ia nyiagayang indik upacara sané kaanggén piranti mapinunas minakadi banten pejati, woh-wohan, segehan manca warna, nasi mapinda asu metatakan don tlujungan, samian punika katur ring Déwaning Asu. Ri sampuné jangkep serana pinunasé, drika raris Ayu Darini ngrana sika masemadi, nguncarang japa sajeroning hati, metu japa kadi puniki:

Om awigenamastu namo sidham

Om pukulun Ratu sesuhunan titiang

Ratu Betari Serama miwah Ratu Begawan Kasyapa

Pinaka biang aji asu ring jagaté taler déwaning asu sami

Titiang puniki kasengsaran ring jagaté, ngemargiang titah Paduka Batara

Icéning titiang pemargi mangda manah titiangé presida degdeg,

Napi sané keapti mangda kesidan

Minakadi seananing jatma lanang mangda presida titiang nungkulang

Saananing buron mangda asih ring titiang

Jatma manusa ring jagaté dungkul, ngeb tan wani mapeliatan

Taler seananing sané melaksana tan becik mangda nénten purun ring déwék titiangé.

Dumogi atur titiang itambet kedagingin

Om ksama sampurna ya namah swaha

Om Santih, Santih Santih Om

Asapunika pengastawa miwah raregepan Ayu Darini ring gedong suciné, ngantos sué, wenginé ngelintang, ngantos ipun sirep ring semadiné. Rikanjekan ipun sampun sirep leplep raris kerauhin antuk Ida Betari Serama, Ida ngandika sapuniki, “uduh pérmas nira Ayu Darini, kalintang pesan sedih kingking ceningé, jani Manira ngicénin waranugraha apang apa ané keaptin pérmas kasidan, ento di canangé suba icén manira caling asu bang, maka sarana apang presida apa sané keapti pérmas kesidan, buina ingetang nemonin rahina kajeng kliwon, purnama, tilem, tumpek aturin caling asu bang punika sesajén marupa canang lenga wangi burat wangi, enyitin dupa sia katih, segehin antuk segehan mapinda asu mawarna bang metatakan don tlujungan biyu gedang saba, mebé bawang jaé, atin bawi miwah tetabuhan tuak arak, yén suba nyak nuutang buka sané pituduhang manira sinah pengaptin pérmasé kasidan.”

Tan dumadé ngléjat bangun Ayu Darini saking pesaréan ring genahé semadi, inget ia mangipi sané soléh iwawu, digelis Ayu Darini ngingetang ipiané sané enu nerawang sawang. Lantas ia ngalih-alihan di duur canangé manut sekadi ipiané. Sagét kapanggih caling asu matéja barak diduur canangé, téjané ngulapin paninggalané. Digelis kaambil caling asu punika raris kekaput antuk kain putih kategul antuk benang tridatu. Sahasa ngaturang sembah pangebakti Ayu Darini, duaning sampun masuéca Ida Sasuhunan sané kasungsung. Bénjangné kanjekan rahina kajeng kliwon uwudan nemonin tilem, ditu kekaryanang tur keaturin upacara caling asu bang punika manut sekadi sané sampun kapiteketin ring paipian.

Rikanjekan Ayu Darini masuk ka kantor, ditu ia dot nawang kawisésan caling asu bang punika. Digelis ipun ka gedong suciné ngaturang piuning jagi nganggén paicané. Ditu lantas caling asu bangé kaambil saking penyungsungan, ngraris kacelepang ka kantong bajuné. Jeg prejani bayuné gedé, awakné merasa ingan tur suarané sada goro. Ayu Darini ngorain sopirné nyiagayang mobilé jagi berangkat ka kantor. Jeg prejani taler sopirné enduh tan wani mapeliatan, yadiastun ukudan ipuné gedé siteng tur dini ditu metato.

“Waduh Bu Ayu makta mobil anyar nggih? Becik pisan puniki Fortuner keluaran tahun terbaru,” asapunika sesambat timpalné sané sampun dumunan wénten ring kantor. Kacawis olih Ayu Darini, “patut pisan nika, Fortuner puniki wantah adiah ulang tahun tiangé, belianga tekén tunangan tiangé sané saking Ubud.” Kadi asapunika pabligbagané Ayu sareng timpal-timpalnyané ring kantor. Sasukat Ayu Darini makta paica caling asu bang, makejang teruna-teruna sané demenin ipun keni kasmaran. Sekadi I Gusti Kompyang teruna bagus sané nuénang hotél ring Kuta miwah Ubud, kapincut tekéning Ayu Darini, ngantos numbasang mobil Fortuner anggéna mangda Ayu Darini nerima pitresnané. Jani Ayu Darini taler sampun ngamolihang jabatan Kabid ring kantornyané makarya, nika mawinan ngancan ten purun timpal-timpalnyané ring ipun.

Yéning itung wénten minab solas diri gegélan Ayu Darininé, samian wénten ring sajebag jagat Bali. Minabang kawisésan caling asu bang punika sampun nyusup ring angga sariran ipun, para gagélannyané ten purun ring Ayu Darini, saantukan yéning polih kadengkik samian gagélané bungker tan purun mapelawanan. Wénten tetiga gegélan Ayu Darini saking Dénpasar, minakadi Déwa Sandat, Gedé Wira miwah Gung Wijaya. Wénten taler sané saking Karangasem, Klungkung, Bangli, Gianyar, Buléléng, Negara, Badung Tabanan miwah Nusa Penida. Wénten timpal ipun sané leket metakén asapuniki, “Bu Ayu, dados akéh pisan medué gegélan? Napi malih niki sajebag jagat Bali miwah Nusa?”

Kecawis olih Ayu Darini, “asapuniki indiknyané, tiang nak demen matirtayatra ka Pura Sad Kahyangan, bénjangan tiang dot metirtyatra ka Pura Pulaki, mangda gagélan tiangé sané ring Buléléng ajak tiang nangkil, yéning dot matirtayatra ka Pura Lempuyang Luhur, gegélan tiangé sané ring Karangasem sané nyarengin, yéning dot tiang muspa ring Pura Batur, gegélan tiangé sané saking Bangli orain tiang nyarengin.”

Malih matakén sawitrané, “nénten taén mauyutan sareng gegélan Bu Ayuné?” Kacawis olih Ayu Darini, “nénten purun gagélan tiangé bani ajak tiang! Taén makejang gagélan tiangé orain tiang ka Dénpasar mangda samian makumpul, jeg makejang pekedék pekenyung pada demen, tusing nyangetang merebutin tiang, apa buin misi cemburu, makejang satinut tur manuh ring déwék tiangé.”

Ring galah sané becik Ayu Darini jagi matirtayatra ka Pura Luhur Lempuyang miwah Pura Bhur Bwah Swah sané wénten ring wawengkon Karangasem, ditu Ayu Darini ngorahin gagélanné Déwa Ketut Cakra sané maasal saking wewidangan Karangasem mangda siaga nyarenging muspa. Sesampuné rauh ring kota Amlapura, drika Ayu Darini kacunduk sareng Déwa Ketut Cakra jagi nyarenging muspa ka Pura Lempuyang, ring pamargi sasampuné doh saking kota, sagét ring margi manggihin Ayu Darini banténg jagiran ngamuk ring dusun kangin, samian jatmané jejeh, seantukan banténgé ageng tur tandukné gedé lanying. Banténgé nyandak mobil sané wénten ring jalané gedé, sané nuénang banténg takut pisan, saantukan talin penegulan banténgé pegat. Tan dumadé Ayu Darini tuun saking mobilé, digelis nyagjagin sané nuénang banténg.

“Bapa meriki baang tiang taliné, tiang lakar ngejuk banténgé sané ngamuk punika.” Kacawis olih sané nuénang, “sampunang jero, niki banténg ngamuk, tiang sané nuénang manten takut, napimalih ragané mapadéwékan anak istri, sinah manggih kesengkalan.” Jeg kaambis taliné olih Ayu Darini saking bapa pengangon, lantas ngojog banténgé sané ngamuk, prejani banténgé polos tur manuh ajak Ayu Darini. Digelis banténgé kategul, teluksuk cunguhné kakeretang antuk tali, raris kakedeng ka pinggir marginé. Drika ngaturang suksma sang pengangon majeng ring Ayu Darini.

Gelising pemargi raris Ayu Darini miwah Déwa Ketut Cakra sampun rauh ring genah Pura Telaga Mas, drika muspa dumun sareng kalih, risampunané puput raris ngelanturang pemargi nincap ka luhur. Ngelintangin penyatusan undag-undag mangda presida rauh ring Pura Lempuyang Luhur. Ri sampuné memargi tigang dasa menit, malih ka panggih Pura Pasar Agung, driki akéh wénten bojog sané gedé-gedé tur sada galak, yéning ipun nénten kaicén lungsuran utawi kacandén. Drika Ayu Darini nyingak anak bajang ngeling sigsigan nénten presida katungkulan tekén reraman ipun. Raris ketakénin, “dados jeroné ngeling driki, napi sané ngeranayang?”

“Nika HP tiangé pelibanga tekén bojogé, sané maglayutan di duhur carang kayuné,” asapunika penyawis ipun.

“Nah da sebet, jani baang bojogé ngidih biu, sinah HP-né ulianga.” Digelis Ayu Darini ngambil biu, saha ngaokin bojogé sané ada di carang kayuné. “Kruééék, kruééék, kruééék….. mai tuun baanga ngidih biu, kruééék…. kruééék… kruééék…” jeg teka bojogé sada polos tur manuh tekén Ayu Darini, ditu bojogé baanga biyu tur HP-né sané abana kaenjuin tekén Ayu Darini. Ngaturang suksma banget anaké bajang punika miwah reraman ipuné, tur gelis mamargi nyarengin Ayu Darini miwah gagélannyané jagi nyujur Pura Lempuyang Luhur, taler katututin antuk bojog cenik gedé sané sami polos tur manuh.

Semarapura, Wrespati Pahing Galungan,

17 April 2021

JM. Pandé Putu Alit Antara, S.Pd., M.Pd
Guru ring SMAN 1 Semarapura taler dados Pemangku ring Pura Dadya Agung Pandé Tohpati.