Ulungan Tuak

Olih: IGA Darma Putra

Sumber Gagambaran: www.paffenbackart.com

Sing dadi minum-minuman keras! Kéto patutné pesu tuturé dugas madarma wacana ngiringang ida dané sareng sami sambilang matuakan. Sing masih dadi mamitra! Ento buin abesik ané patut pesuang dasarin baan sastra sambilang ngantosang balesan WA uli Luh Ayux. Payu apa tusing nyanan lakar melukat ka tongosé sepi-sepi. Apang nyak galangan bedik sirahé suud ngurusang anak ajak liu. Kéwala kondén ada WA nang akledutan uli Iluh Ayux, koné ia nu ngurusang somahné ané gelem suba tibanan uli mara ngantén.

Sambilang ngantosang, luungan bukuné ané mabejug di kamaré ené baca-baca sakabedik. Apang ada anggon nutur mani puan péd ada anak ngaukin nagih tuturin aji isin sastra ané ening-ening. Kadéna aluh mirib dadi anak dueg tekén anaké. Sing tawanga nu misi malajah apang tusing pelih ngemang tutur. Nak bisa mastu sastrané yén pelih baan nuturang.

Jani awaké paling baana. Apa kadén buku ané sandang plajahin, wiréh nak suba makejang rasané bakat baan maca. Makejang isiné suba bakat baan ngaresepang. Dija ajaka mapadu, asané lakar bani ngalawan. Edaké mara paek-paek umah dogén, edaké mara di balé banjaré dogén, di istana présidén lakar bani asané ngaba tuturé.

Sakabedikin jani ngebitang buku Tri Hita Karanané. Apang seken-seken bakat plajahin apa ané madan Tri Hita Karana. Suba liu anaké mlajahin Tri Hita Karana, kéwala sing liu ané nyalanang. Ada tetelu koné ané ngranayang anaké bagia. Ento madan Parahyangan, Palemahan, Pawongan. Buka telu ento koné nyak cara awak jlema. Parahyangan ento sirah, Palemahan ento uli baong kanti ka basang, Pawongan koné lima ajak batisné. Sing ada jlema ngidang idup yén sing misi sirah. Apa buin yén sing misi awak. Kéwala yén batisné tusing misi, enu koné nyidayang jlemané idup.

Jani tegarang badingang. Parahyangan dadiang lima batis. Ané madan Parhyangan ento sorohan ané misi Hyang. Ento suba ané madan déwa-déwi, ento bhatara-bhatari. Bhatara-bhatari ento jani dadiang batis, apanga luung tindakané majalan. Apa buin limané maparagayan déwa, sinah suba rahayu ané bakat gembel. Kéwala kéweh dadiné, sing dadi batisé prajani nyagjagin ané cemer-cemer. Sing dadi limané nyaup ané leteh-leteh. Apa buin lima mulan biasané sing kena sebelan, sing nawang wewaran tekén purnama tilem. Kadén mulan limané malu ané iteh ngalulu ané mabulu-bulu. Nyak cara liman bojog ngalih kutu.

Kéto malu yén Parhyangan dadiang lima batis. Kija lakar tindakang batisé enu lantas kadoang baan suci-leteh. Kéweh idupé yén kemu mai tusing dadi. Sajabanin suba patut ngamargiang kabiksukan. Ané madan Biksuka, ento ketékan Asrama ané paling dori. Adané dogén paling dori, sinah sik dori jemak gaéné ento. Gegaéné tuah mamegeng ngulengang keneh apanga bétél kemu mai. Disubané bétél sing dadi anggon babétélané ngintip ané mengkeb-mengkeb. Néh, kadén aluh nyemak gaé dadi kéto. Nak makejang gagaéné misi alu, misi kéweh. Monto malu baca buku Tri Hita Karanané, kayangné buin lanturang. Hapéné suba makledutan, “Bli ayok naé!”

IGA Darma Putra
embas lan magenah ring Bangli. Kakawiannyané kawedar ring makudang-kudang média, minakadi Bali Post, Pos Bali, Tatkala.co, Suara Saking Bali, miwah sané lianan.