Puisi-puisi Nyoman Ananda Prema Shanti; Matatu Tan Pagetih

Sumber Gagambaran; id.pinterest.com

Matatu Tan Pagetih

 

Pidan, liu ada ané malajah ngigel di balé banjaré

Ada ngigel péndét, condong, miwah igel-igelan ané lén

Lénan tekén ngigel ada masih ané malajah magong

Demen tiang ningalin sekaa trunané buka kéné

Sutindih tekén budaya baliné

 

Ané jani, enuké inget budaya baliné?

Miribang, suba engsap.

Tusing ké lek tekén anak dauh tukad?

Ia ané seken malajahin

Malajahin ané pantes iraga palajahin

 

Tiang tuah ngantiang anyud-anyudan

Tusing ja lén, tuah anyudan budaya baliné nganti ka dauh tukad

Enu ké lek malajah budaya bali?

Singaraja, 22 Februari 2021

 

 

Sutindih I Mémé

 

Tusing kerasa tiang jani suba kelih

Tusing kerasa tiang suba menék bajang

Asané mara ibi tiang gandonga tekén ipun

Magandong sabilang lakar kayeh di tukadé

 

Selantang galah suba tiang entasin

Tiang metilesang déwék

Boya ja ulian kena corah

Tusing masih ulian tiwas arta brana

 

Nanging tiwasé kaliwat ulian tusing nyidaang ngaénang ipun setata makenyem

Tusing ja lén tuah kenyemné i mémé

Tutur ipun setata ngaénang kenehé dayuh

Polos, alon, tur dabdab yéning ngorahin tiang

 

Gelutan ipun ané setata ngaé anget

Tusing ja lén tuah gelutan i mémé

mé mémé suba amongkén baktin tiangé tekén mémé

Suba amongkén tiang ngidaang tresnain mémé

Mé. mémé bibih tiangé caket tuara ngidaang mamunyi, mé

Caket ulian kondén ngidaang ngawales sutindih i meme

Singaraja, 21 Désémber 2020

Nyoman Ananda Prema Shanti
sisia SMP Negeri 3 Singaraja. Embas ring Singaraja, 10 Novémber 2007.