Puisi-puisi Ni Luh Putu Puspita Agustini; Angin Semara
 |
| Sumber Gagambaran: vjeranski.tumblr.com |
Pertiwi
Kadirasa ngeling
nanging tan ngetélang yéh mata
Kadirasa sakit,
nanging tan metatu
Nengil, boya ja
jejeh
Pedalem, nanging
tuara karungu
Disubané pedih, makejang jadmané pada takut
Pertiwi….
Wit kauripanné..
Ibuning sarwa maurip
Nanging, ituna tuara
ngerti
Pepinehé tuara
galang
Karusak… nganggoang
kita
Cemer… makejang
cemer…
Saling tuding,
saling melihang
Bencana medal tan parérénan
Jani... tuah mangeling
Yéh matané tan paguna
Pamuputné tuah
maselselan
Wrehaspati Kliwon
Klawu
18/6/2020
Angin Semara
Kalulut Angin Semara
Liang kadi bungané kembang
Kenehé suba melayang-layang
Duh... Angin Semara
Ngalulut manahé ngadungang tresna
Tresna ané matunggilan
Duh... Angin Semara
Suud makeber
ngejohang
Eda buin matilar
Manahé tuah pacang masikian
Majangkepan kadi
Semara Ratih
Wrehaspati Pon
Landep
16/7/20
Landep
Kenehé tuah landep
Jejehé makada takut
manyujuh
Papinehé suba seken
Tuah Landep
tatujonné
Kéngkénang jani ban
madaya
Nyujuh nanging tuara
bisa
Pajalanné karasa
peteng
Tindakanné kerasa
baat
Nanging, sundihé sampun masunar
Sunaran kaweruhan
kapasupati ring papinehé
Tur manunggal ring
kapatutan
Pamargi ngaruruh
Landep
Soma Kliwon Landep
13/7/20
Pajalan Tresna
Kayang jani enu
kaingetang
Kenyem manis adiné
ané ngaé beli kalulut
Alus banban tuturné
nglangenin ati
Tur ngangsan
ngedénang kenehé edot ngelahang
Buka bungané nedeng
kembang
Tusing abesik
kumbangé ané maekin
Nanging sing medaya
anak tuna ené dadi pilihan
Bagiané kadi makeber
di suargané
Liangé tan sida ban
ngorahang
Ngangsan wai
tresnané ngangsan mabatun buluan
Semayané
satya jani suba
mategul
Buah tresna pinaka
saksi semayané
Bagiané kerasa tan papegatan
Nanging tatité nibénin
Munyin adiné jani
tuara dingeh
Kadirasa belah
tangkahé nepukin adi makenyem
Kenyem ané tuara nyidang lakar tepukin buin
Mapayas tur makamen
kasa
Sirep di balené di
tengah petiné
Kadirasa bagia tuah
adi ané ngaba
Kadirasa semayané suba ilang
Ngeling tanpa
pegatan
Sebet tuara sida
nuturang
I cening katinggalin
mémé
Matilar tan pagatra tur nénten sida pacang mawali
Adi…….
Né jani aba tresnan beliné matilar
Bagia jani adi ditu
di suargané
Kenyemé lakar
ingetang beli kanti sekayang-kayang
Jantos beli adi…
Nyantos galah beliné
lakar ngalih adi
Tur masikian malih
ring suaniantara
Redité, julungwangi
30-08-2020
Piteket Ayu
Luh….
Guminé galang, da
kadéna tusing lakar ujan
Manis gulané da kadéna
sing ngamanesin
Yéhé ening sing karwan lung
Kopiné pait sing karwan ngaé penyakit
Lemahé lakar masilur peteng
Kéto masih idupé lakar mangguhin padem
Jalané lantang tuara tepuk muncukné
Anaké joh kadéna musuh
Nyamané padidi kadi lintahé
Nyedot getih tan pasisa
Luh…
Lemah lan petengé enu lantang
Guminé masih
ngangsan ngawayahang
Jani, melahang mapineh
Krana makejang suba mabading
Masilur-silur tan mauliang
Jani, Pekak mabesen tuah abesik
Apiring ané ada,
laan ento pada dum
Jelé melahé gelahang bareng
Krana lidi abesik tuara ngedasin
Anggara Pon Kuningan
20-4-21
Semaya Tresna
Petengé makaput gulem
Sunaranné mengkeb ring durin ambuné selem
Angin sumilir ngetutin pajalan kenehé
Kricikan yéh ujané ulung
Melusin sakancan isin guminé
Kadi cihnan beliné ngarauhin
Mirib semayané suba neket ring kenehé
Galah ngulangunin tan pa beli suba telas
Anginné ngamuk ngampehang yéh ujan
Makeber melusin ring teduhé
Dingin...
Nanging ngetisin awak
Dingin...
kadi gelutan liman beliné
Bagia lan sebeté madukan
Yan jani tresnané mawali, nanging sentanané
katinggal
Nanging...
Galahé sampun telas
Rikala langité galang kasarengin sunaran sasihé
Maka margi titiang sareng beli padaduanan
Majalan ngalanturang semayané ipidan ané pegat
Jani galah tiangé mawali ring beli
Nyujur genahé galang
Beli...
Gisi liman tiangé
Da
kanti buin kelés ring liman beliné
Suba makelo tiang tan pa beli dini kadi awaké
tan paurip
Beli...
jani suba galahé nglanturang
semaya tresnané
Kasaksinin wastra sarwa putihé
Ninggalin sentanané, ngungsi guminé wayah…
Sukra Wagé Wariga, 19-3-21
embas ring Dénpasar tanggal 16 Agustus 1991. Makarya dados Penyuluh Basa Bali sané polih amongan ring Kelurahan Panjer. Puisi sané kakawi puniki kangkat saking pengalaman pribadinnyané.
.jpg)
No comments