Puisi-puisi I Wayan Redika; Nyelehin Karang Wayah

Sumber Gagambaran; blog.i.ua

Segeh Gering Jagat

 

waluya

sekadi patapan batu

gineng nyurup ngaredana

pageh puguh nyujuh suung

tan sinah wates pangider surya

idepe pacang nerus negtegang

piteges pawedar guru wisésa

jenek makérti ring soang kubu

mikukuh kramaning mahurip

nyadangin baya gering jagat

waneng petang sasih galahé

tepeng rauhing mangkin

/jangkep

maruntutan antuk ortiné kaon ring rasé

tan karwan mukti bukti ambyar maadukan

ngawekasan keneh lilih paling gudig litig

segeh pangurip nasi wongwongan

bawang jahé nyampuh uyah areng

magelung muncuk don pandan harum

tetabuhan tuak arak berem madu

panumbal sekancan kala mrtyu

iti, tetandingan pejati agung

saha kembang telon wewangian

katur majeng ring sang hyang tuduh

lelangit urip.

iti, pitutur sadhu sang guru

inggetang nyaluk camok cangkem ning!

sayaga nyagra raga sukat pada madohan

rikala matebengan

waluya

sekadi petapan danyuhé ulung

masuryak galak ngandupang krama lén

tan mari nduk ring pidabdab déwék pedidi

sinah belogé cayak, tatas tan pawiguna

telas idepé pacang nutug negtegang

pawedar guru wisésa

 

 

Nolih

 

nolih ka ungkur

pikanten gulemé dedet mapiyakan

wénten rawat waluya gambar wayang

saling tuding nantang siat patunggal

mapagut senjata ngendih tibanin surya

teges antuk kelir toyan cariké hning

sumingkin sawat sayan sunia ring rasa

nolih ka duur

ngelintang ring tungtung shiwadwara

kacingak layangan pegat ngelepat

magambar celepuk sungsang nelik

lilus nutug sriuk angin nyampih sasih

nyujur genah sripit ring muncuk bukit

sumingkin sawat kalebur antuk sayong

nolih ring madyaning pasih

nemu jukung makobér warna bang

macawi rupa bedawang mabulu mas

negak ring hulun ombaké mancuh

matiles ngedoh ngimpas kapal pesiar

nyeleg gdé krurakara cara kumbakarna

sayan sinah solah anaké sané sugih

masanding ring anak tiwas tan hana

pastika pateh ring titi pemargi hurip

nolih jeroning awak

sunia katon sakadi ring puri embang

tan pawisaya sami sampun nunggal

titah pinceran wak manah lan kaskaya

wenang nemonin raga sarira

hyang matemu ring pabaan

 

 

Nyelehin Karang Wayah

 

yéning

sampun waneng galah

(aptiang mangda kacunduk ri ungkur

nyadya jagi ngiring pakardi ngawi

sastra paneduh kayun masambung

sunia)

anaké anom mantuk nyeluk raga

ngelinggihin angin tarik ngimbangin

tanduran sekar nyujur muncuk bingin

mabekel colok, gerip, lan lekesan

yadiastun pati urip gumanti tatas

rasa puniki kapiangen antuk ripta

panegul rasa pangiket masuwitra

anaké anom mantuk nyeluk raga

sasih kapitu

purna malawat toya

mamargi hning nyelehin karang wayah

nyambi meték lawat paksi ring tanah

waluya madandan ring ambara agung

kadi anginé medal saking tulia raga

(yéning becik kalugra genah mabakti

tegesang nunas galah jagi ngwacén

satua bawak sipo magambar naga)

 

studio kalangwan, purnama kapitu, 21

 

 

Taulan Rangda

 

aéng madurgama

nyedodog di bucun panyengker

pura pinih tua ukiran paras lawas

jati tuwi ngangenin welas twas

segara madu luhuring hning budi

batu matebih hurip linggih sunia

matapa ring dalem hulun angen

ngaskaya hala ayuning bhuana

taulan rangda

macaling gading

ngigel ngeréhgéh

napak pertiwi

tapakan alit somya sarwa butha

nyunut ikuh naga mabulu barong

ngilehin gumi ngresti rah pakubon

manut pinceran padma mandala

méru masanding tan patumpang

sakadi gunung kembar ngredana

nabeh angin natak yéh ngalap api

sarwa sekar mahura ring natare

sami muspa raga

rijeng taulan rangda

muntab janggar api

nunas dayuh sekala

purane tenget matenger sekar jepun

taru pulé ligir tinggahin goak ngarab

madengen mauperengga tatah awag

wiguna ring kardi

agung ring pikayun

teges ring déwasa

 

 

Turis Belanda Uber Cicing

 

jajar mejujuk

madayuh gulem

cecingak surup

ngelesu ngusap peluh ring lelata

wanara sarwa muka manca warna

ngawa linggis nyelet taru nyekel batu

arca paras téjakula pasrayan déwa

mataksu téja maya

selehin rauh ring madyaning utama

sanggah kembar mapaider patra sari

taru jepun gedé mayusa siyu warsa

témbok dasar meukir gaginan hurip

sasuluh tutur tantri

hyang maduwé karang

embang tan pedas wates

rikala nungal manah

sisi kelod nerus lawangan ka jaba

kesiab nolih tatah tawah marupa

turis belanda negak sepéda ontel

nyaluk payas cara bali nuli ngebut

uber cicing berag

ukiran danghyang marawat hyang

deling emas saseliran nyagra karang

wanara sakti pangabih sabilang bucu

ngejer ring raga bawa sepi maring jero

setata ngawisésa galang

ratu maduwé karang

lingga bhuana agung

panekek sarwa prani

yéning galah jagi matilar

éling ngalungsur tirta paneduh jagat

mawetu saking bongkol sekar jepuné

mawarna biru kalimayah