Puisi-puisi I Putu Suwéka Oka Sugiharta; Gending Panundung Gering
 |
| Sumber Gagambaran: www.waynebrezinka.com |
Gending
Panundung Gering
Uli dija jeroné nylebseb ?
Sagétan mapuara eling
Anaké kapupungan sépanan macub
Nadaksara kababar tampus lanying
Nyén ngutus jeroné aji silib ?
Panekan jeroné ngadakang paling
Anaké kélangan nyelselin nasib
Nlégtog nylélégang tulang giing
Nyén ngancukin jeroné bas gaan ?
Ngojog tusing masambatan
Nekain pangrasan nasiné ané nu jaen
Miribang pongahé suba liwatan
Mapan panekan jeroné tusing matari
Nyak ké jani budal mulih ?
Lakar upahin gending pangidep ati
Né ngendingang anak liwatan sedih
Krana pangojog jeroné tusing
maundang
Nyak ké jani matulak ngejoh ?
Lakar bekelin bé cundang
Ané suba liu matabug matambus
mokoh-mokoh
Ulian palalin jeroné ngaé rusak
Nyak ke jani suud nglincak
Lakar upahin banten abrarak
Sambilang ngalihang pajalan anaké
lampus nadak
Mara iusan jeroné ngadakang grubug
Tusingké jeroné sandang makanténan
?
Buka tuna-trunané maplalian gradag
grudug
Mirib jeroné kasepékang
Mara anggan jeroné mawisia
Apa makejang musti nemah misuh
Tulia dustané kaliwat nista
Mirib jeroné lekad ubuh
Mara enjekan jeroné natunin
Apa makejang tusing ada bani
nresnain ?
Buka anaké kasemaran makekasihan
Takeh jeroné tusing ada nemenin
Yén kéto apa né pantes anggon
nyandingin jeroné
Sajaba solah anaké nglarang pangiwa
Yén keto apa né pantes anggon
nyandingin jeroné ?
Sajaba anaké ngigel ngawé dosa
Yén kéto apa né pantes anggon
nyandingin jeroné ?
Jabaning anaké satata drowaka
Yén kéto apa né tusing pantes
nyandingin jeroné ?
Jabaning anaké ané inget tekén raga
Yén kéto apa ané tusing pantes
nyandingin jeroné ?
Jabaning anaké jemet ngastiti déwa
Guru laguné
Salah lakuné ané kawayahang
Nganti anaké ngaé jelé
Tusing buin ada melihang
Pangengkalné
Bogbogé ané masekeb
Nganti tukang piraté
Ngangsan marasa santeb
Tukang gendingné
Maling-malingé mapanganggo melah
Nganti kacerikané
Kekeh tusing maan selah
Gamelané
Munyi-munyi manisé saling sautin
Naut keneh anaké ramé
Nganti keneh tegtegné masalin
Anaké mabalih
Kacerikané seduk laongan
Sisan galihné makelo-kelo mulan
teked di pasih
Nanging sesarin banten panganyutané
kuangan
Bibihé suba makelo keping
Kalingké roko akatih
Nasi tulén ajembung
Suba makelo kéweh nglantih
Kalingké tutur mucingin
Munyi sigug ngandang
Suba biasa marengin
Berekang di basang
Pulesé suba makelo osah
Kalingké ngipiang dedari
Ngipiang padang lomlom samah
Suba makelo tusing misi
Kalingké enu ngelah sampi
Pangina tua suba magedi
Madak tusing engsap ngastiti
Suba makelo tusing masugi
Kalingké mapéndér
Ngilangang daki padidi
Pepesan liu nekaang munyi éwér
Kalingké bani ngédéngang goba
Ngenahang lawat suba kimud
Kudang jlema kadén ngwada
Luungan suba angkihané kajabud
Muané seming
Cara bangké
Melahan ilidang
Di natah semané
Wariga apané kadén maanggon sikut
Déwék mabayu seger katunden masaput
Buka anaké mingitang gagemet
sangkut
Awaké makerut kenehé brenyut
Anak sakti uli dija kadén nibakang
tenung
Déwéké nagih mulih kaorahang
pengkung
Pulesané dini selegenti nyerung
Luihan tekén anak ngejuk bangkung
Petékané ané kén kaden madapetan
Cunguhé tuh kadalih ngéngésan
Kolongané rep kapisuna cekéhan
Ukudané ngrenteng kaadanin kamranan
Nyén kadén ané kondén taén ngasanin
Natah padidi tusing dadi entasin
Panak kurenan tuah dadi iwasin
Dumadak tiang tusing énggal
ngemasin
wau ngawitin nyurat reriptayan (sastra). Riinan ipun wantah masesuratan non sastra makadi jurnal, artikel, opini, esai, buku populer, miwah sané tiosan. Ipun malajah nyurat sastra sasukat Bulan Bahasa Bali Warsa 2020 duk reriptayan ipuné sané marupa puisi manados jayanti kapertama. Mangkin ipun seringan nylaksak ring bongkol-bongkol gunungé, ngayah pinaka pekerja sosial profesional ring Dinas Sosial Kabupatén Karangasem. Tios ring punika taler mautsaha nyepih galah magendu wirasa sareng mahasisia Fakultas Brahma Widya IHDN Denpasar pinaka dosén tidak tetap.
.jpg)
No comments