Ngelekang Paes Padidi

Olih: I Madé Arista (Jero Alit Bangah)

Sumber Gagambaran; theegoist.tumblr.com

Paes lén raosné cocoh. Yén paes sinah tongosné di cangkem. Yén sing misi paes bisa-bisa manusané bungkem. Tusing ngidang ngomong. Mirib ulian ento miribang paesé manyama ajak munyi. Ulian tongosné di cangkem. Yén paes sinah bisa ngetél, cara yéh membah. Dija kadén klebutan yéh cangkemé ento? Tusing suba déwék maan ngerambang. Krana tuah pesu tur ada di cangkem. Kéto masi munyiné mamurti di cangkem. Cara angin paling. Bisa suluk. Bisa banban. Tusing marupa. Nanging i kuping bisa nawang. 

Nah yén ada ané orahanga anak ngelekang paes pedidi mirib cara iraga nepukin anak ngajeng nanging iraga tusing ngajeng. Wantah ngelekang paesé padidi ulian basangé seduk. Kéto mirib cara déwék i pidan kuangan bekel masuk SD. Mebalih timpal ngajeng bubuh. Paesé gelek-gelekang. Kadirasa bubuhé macelep di krongkongané. Tur munyiné pesu tuah di kenah. Mih jaen san bubuhé.

Né jani lén buin indik ngelekang paes padidi. Kocap pamesun munyiné patuh tekén ngelekang paes padidi. Apa ané madan kéto? Béh i déwék cara butané ngabag-ngabagin. Dumadak apa ané kagabag munyi seken. Ulian iraga nuduk sambil megabagan. Yén keneh-kenehang, miribang patuh tekén munyi ané suba pesuang ento gelekang buin. Iraga kena munyi padidi ané suba pesuang. Néh kudiang jani suba ngulihang munyi ané suba pesu? Yén munyi luwung koné pesuang, luwung koné ané gelekang paesé. Yén munyi jelé, paes ané jelé gelekang. Kéto satua i pekak pidan. Nah yén suba munyi jelé jani pesuang, ané jelé masi gelekang. Ditu lantas iraga yén suba nawang rasan munyi pengit, sinah iraga bisa lek tekén déwék padidi. Pamuputné mara dori nawang mliara bengu di cangkemé. Ditu setata lek tekén apa ané gelekang.

Pondok Bangah, 02-06-18.