Ngamaniang Purnama Sasih Jiyéstha Ada Ngirimin Séwala Patra

Olih: IDK Raka Kusuma

Gagambaran Manik Sudra

/1/

Ngamaniang purnama sasih Jiyéstha tiang ada ngirimin séwala patra. Liunné patpat. Dugas nampi séwala patrané maka patpat, tiang ngrémon di keneh. Mimih tumbén maan kiriman surat liunné patpat. Nyén ya ngirimin? Uli dija ané ngirimin? Gatra apa masurat sig suang-suang séwala patrané?

Aidupan, buin tiang ngrémon di keneh, tumbén nampi kiriman séwala patra liunné patpat. Biasanné sing taén lebihan tekén dadua. Ané ngirimin pianaké ané magaé di Jakarta miwah ané magaé di Yogyakarta. Tekan séwala patrané ané kirima uli Jakarta miwah Yogyakarta sing ngabulan sibarengan. Yén sing nganembulan ngatiban.

Séwala patrané, makapatpat jedogang tiang di duur mejané ané uli pidan ada di bucun ampik umah ané tongosin tiang uli cerik. Umah ané liu misi wawangunan cara Bali nguni. Anaké di sisi nyambat umah tiangé puri. Ketah anaké di sisi nyambat Puri Semaracita. Tongosné sing joh uli Puri Agungé. Sing joh masi uli puri Saraswatiné. Tongosné akecogan uli rurungé ané membat uli kaja. Tanggunné badelod. Di pateluané ané di sisinné mentik punyan léci. Dangin tanggun rurungé ada umah linggah tan kadi. Tembokné tegeh warnané putih. Di duur tembokné membat kawat berduri. Ané nongosin pagawé ané nyagain bogolan. Bogolan ané mapangkéng. Mapangkéng tibanan.

Satondén maca tlektekang tiang amplop suraté. Ada ané mawarna putih tulus. Ada ané mawarna putih, di sisinné misi sruat-sruét pelung miwah barak. Ada ané mawarna soklat nguda miwah mawarna soklat tua.

Suraté ané mawarna putih tulus jemak tiang. Ané ngirim baca tiang adané Putu Parka nongos di Jembrana. Tangun amplopé kesét tiang. Kertasné pesuang tiang. Di subané ngebatang, baca tiang.

Cok Agung sané kusumayang tiang, dumogi ida ten lali saréng tiang. Tiang sawitran duéné duk masekolah ring SMA Negeri Klungkung. Dados akelas ring kelas IA. Tiang negak ring pungkur Cok Agungé. Yén wéntén sawitran duéné nyabran ulangan aljabar sareng ilmu ukur magimeh mangda ragan Cok Agungé ngaryanang jawaban, tiang sampun. Yén wénten sawitran duéné nraktir numbas ajengan bungkus kakalih, riantukan karyanang Cok Agung jawaban ulangan aljabar sareng ilmu ukur, tiang sampun. Yén wénten sawitran duéné nyabran Saniscara wengi wénten ring Puri Semaracita, purin duéné, ngiringang Cok Agung, ngantosang timpalé malih tiga, nglentang nglenting gitar sarwi ngendingang Aryati, tiang sampun.

Yéning Cok Agung kari lali, pangéling-éling sané aturang tiang puniki, dumogi ngawinang ida éling ring déwék tiangé. Duk jagaté genting, duk mapamit pacang késah ka gumi palekadan tiangé sané ngeling sengi-sengi punika tiang. Puniki malih pangéling-éling. Sané pinih riin nyumpuin pangarsan duéné sumangdéna kacunduk ring sami matuuh nem dasa tiban. Sareng lima kacunduk malih. Kacunduk ring Puri Semaracita.

Tuuh tiangé mangkin nem dasa tiban sampun. Yusan Cok Agungé pastikaang nem dasa warsa taler. Tiang purun maatur sapuniki riantukan Cok Agung makeraban sareng tiang. Titiang lekad bulan Méi nem dasa warsa sané lintang. Cok Agung taler embas bulan Méi. Amung tanggalé sané masiosan. Cok Agung embas tanggal 25 Méi. Tiang tanggal 26 Méi.

Dugas jugjag tanggal kacunduké ring sampuné matuuh nem dasa tiban, tiang ngusulang kacunduk tanggal 25 Méi. Tanggal 25 Méi malih petang dasa pat warsa sakéng dinané punika. Timpalé sané siosan pangawit nungkasin. Duk tiang majarang punika tanggal paembasan Cok Agungé pramangkin maka tiga mageluran:

“Setuju! Setuju! Setuju!”

Tiang nulis miwah ngirim suraté puniki tanggal 10 Méi warsa 2009. Malih limolas rahina tiang jagi tangkil. Nénten padéwékan tiang tangkil. Tiang tangkil: sareng somah tiangé. Somah tiangé sakéng Banjarangkan Klungkung. Umah ipuné nampek sakéng Puri sameton duéné derika.

Lugraang tiang maatur kadi niki.

Om Shanti, Shanti, Shanti, Om.

Surat ané maamplop putih misi sruat-sruét barak miwah pelung di sisinné jemak tiang. Baca tiang adané ané ngirim: Wayan Méndra. Nongos di Tabanan. Suud maca, tanggun amplopé kesét tiang. Kertas di tengah amplopé pesuang tiang. Disubané ngupak baca tiang.

Om Swastyastu.

Tiang Wayan Méndra. Sané negak abangku saréng Cok ring kelas IA SMA Negeri Klungkung. Dumogi kari éling. Éling ring sawitran duéné. Sané nedun jawaban ulangan bahasa Inggris. Sané medal peluh matah yéning nikaina ka papan antuk ibu guru nulis adan dina Inggris.

Sané pinih aptiang tiang, dumogi Cok kari éling ring semaya warsa 1966. Pacang kacunduk ring purin duéné, Puri Semaracita yén sampun nyaluk yusa nem dasa tiban. Dumogi kari éling taler, Cok Agung nentén kacunduk saréng tiang kémanten. Sakéwanten, pacang kacunduk taler sareng Putu Parka, Gedé Jaya miwah Wayan Warta. Kacunduk ring tanggal 25 Méi warsané puniki. Ring raina paembasan duéné.

Tiang sampun pénsiun kalih tiban sané lintang. Pénsiun duk tiang ngenjek tuuh 58 tiban. Das tiang  kala punika ka purin duéné. Aget tiang inget, kacunduk ten duk punika.

Dumogi sami timpal tiangé, Cok taler, nénten wénten kapiambeng.

Surat ané kirima tekén Gedé Jaya ané nongos di Dénpasar baca tiang.

Om Swastyastu,

Wenginé punika tiang nadaksara enten. Sané ngawinang ipiang tiang Putu Parka mapajar. Sapuniki ipun mapajar.

“Méndra, da engsap, yén lantang tuuh, kayang matuuh nem dasa tiban kacunduk di Puri Semaracita..”

Yéning nénten ngipi sapuniki, manawi engsap tiang, Cok Agung. Sakéng ngiringang Cok Agung ring SMA Negeri Klungkung, tiang engsap-engsapan. Ten iwang yén Pak Musna guru Ilmu Buminé ngadanin tiang Gedé Pikun. Riantukan sering engsap ngrauhang pebesen ragané ring bapan tiangé.

Tiang pasti tangkil ka purin duéné. Dumogi nénten wénten pialang nyantulin tiang. Nyantulin timpalé taler.

Panguntat surat ané kirima tekén Wayan Warta ané jenek di Payangan Gianyar baca tiang. Kedék tiang maca. Sawiréh isin suratné baud.

Cok Agung, tiang mangkin jenek ring Payangan, Gianyar. Tiang deriki kaduduk mantu. Kasar antuk tiang maatur, tiang paid bangkung. Sakéwanten, tiang ten ring anak sios. Kari mindon ulian muani. Kakin tiangé madué nyama patpat. Sané pinih alit jenek derika.

Dumogi durus kacunduk. Tiang ka purin duéné parék ngajak cucun tiangé sané muani. Sané ganteng alias garang téngés.

Indik tanggalé kacunduk, aget Putu Parka nganikain duk kacunduk ring Tiara Déwata Dénpasar. Yén ten sapunika ngraris tiang engsap. Musuh kapitui tiangé duk majurag nemenin Kadék Suryani, pastika ipun gedeg sarwi ngraos:

“Clekotokané Wayan Warta berita sing teka. Apa dogén ingetanga?”

Yén nénten wénten kapiambeng tiang jaga parek ka puri Agung Semaracita duén Cokorda Agung Putra bagus magledag.

 

/2/

Ajin tiangé pamucuk PNI di kotané ené, bapan timpal tiangé maka patpat krama PKI. Anak lén pasti suba dadi musuh kaliliran. Sing socapan. Saling sindirin. Baan pepesé saling sindirin, sing buungan majaguran.

Ajin tiangé ajak bapan timpal tiangé makapatpat masawitra. Nyabran Saniscara maceki di purin tiangé. Uli sanjané kanti semengan buin maninné. Ngantiang tukang ucuté, Bli Wayan Tusing teka jam nem sanjané, ajin tiangé nganikain tiang ngucut cekiané.

Telung jam dadi juru ucut cekian, demen atin tiangé. Di sedek ngisi baan cekian, ajin tiangé miwah bapan tiampal tiangé sing suud-suud maguyonan miwah magonjakan. Sing taén dingeh tiang nguyonang miwah ngonjakang parté. Sing taén.

Ané dadiang guyonan miwah gagonjakan soroh ané banyol-banyol. Engkel-engkel tiang kedék ningeh guyonan miwah gagonjakan ajin tiangé miwah bapan timpal tiangé makapatpat.

Di cekian amul encén bendun ajin tiangé, nyidaang dogén bapan timpal tiangé makapatpat nganggon kakedékan. Taén ajin tiangé bendu. Kéné nganika.

“Dadi lojoré sing ada ngutang. Kanti pang dasa ngupak sing tepuk. Nyén ngaba nah?”

Bapané Putu Parka masaut

“Pan Méndra nyekel Dwagung?”

Bapané Wayan Méndra masaut.

“Ten Dwagung. Nang Jaya ngamel.”

“Nentén wénten Dwagung. Bapané I Warta nyekel. Tekek pesan ipun nyekel. Ipun gumanti demen ngawinang embet.”

“Béh, sing ada ngaku,” ajin tiangé nganika, “nyén ngisi lamun kéto?”

Makapatpat, bapan timpal tiangé saling aranin.

“Badah dadi saling adanin. Dadi cara ….”

“Kadi napi Dwagung?” bapané Gedé Jaya matakon.

“Cara leak kalemahan.”

Bapan timpal tiangé makapatpat, ada ané ngrogoh, ada ané ngamunyiang bojog. Ada ané ngelur cara rangda di calonarangé.

Ajin tiangé ica engkel-engkel. Lali pecakné naen bendu. Tiang bungker-bungker kedék. Kanto sakit basangé.

Unduk mabinaan parté sakéwala masawitra ené, taén takonang tiang teken ajin tiangé, plapan ida nyawis.

“Kené to. Urusan di politik lén tekén urusan masawitra.”

“Napi binané, Ajung?” ngwanénang tiang matakon.”

“Politik urusané parté. Masawitra urusané pagubugan. Mapolitik ngranaang iraga joh mapagubugan sawiréh mikukuhin parté suang-suang. Masawitra ngranaang iraga paak di pagubugan.

“Titiang miragi, riantukan mapolitik kantos ngemasin pegat masawitra, manyama miwah mapisaga.”

“Pegat madadia ada. Pegat Masuria masih ada,” Ajin tiangé ngawewehin.

“Mimih kantos sapunika aji?”

“Aa. Yén kanti kéto, to artinné jatmané sing bisa minayang ané encén politik. Ané encén pasawitraan, panyamaan miwah ané lénan. To madan jatma fanatik tekén parté. Sakéwala sing ngerti apa kasujatiané politik.”

Ané nikaanga tekén ajin tiangé ento orahang tiang tekén timpalé makapatpat.

Putu Parka ngraos di subané tiang suud ngorahang.

“Anak siosan, yén sampun mabinaan parté jeg mameseh.”

“Mamusuh kapitui,” Wayan Méndra nimpalin.

“Mamusuh kaliliran. Sing ja di pagubugan dogén kakéto di sekolahané ené ada masi kéto. Murid di sekolahané ené buka mapiak dua.” Gedé Jaya macempléng.

“Mapiak dadi IPPI miwah GSNI,” Gedé Jaya nimbalin.

Laut, Gedé Jaya nelatarang kahanan muridé di sekolahané ené sonder ada ngorahin.

Di tongosné madagang Embok Sari di durin sekolahané, ia ningalin krama IPPI-né negak majajar dauhan. Makejang nginem es sentrup. Krama GSNI-né negak majajar danginan. Makejang nginem es bulung mawarna selem. Iseng ia matakon tekén krama IPPI-né ané negak pinih tanggu.

“Dadi makejang nginem es sentrup timpal Nengahé?”

Patakoné sautina aji:

“Barak warna prolétar.”

Iseng masi ia matakon tekén sinalih tunggil krama GSNI-né ané negak pinih tanggu.

“Dadi timpal Ketuté makejang nginem és bulung selém?”

Patakon sautina aji:

“Selem warna marhaénis.”

Wayan Warta nyelag aji patakon, “Endén te malu, dadi nawang totonan krama GSNI miwah krama IPPI?”

“Nyoman Madra dadi ketua IPPI di kotané eane, é sing, di sekolahané ené negak ditu. Dewa Putu Cakra ané dadi ketua GSNI di sekolahané ené negak masi ditu. Makadua uli pidan musuh kaliliran di sekolahané ené.”

Wayan Warta ané lakar mesuang raos maluin tiang.

“Yén nyak. Parka, Méndra, Jaya, Warta, iraga da milu-milu.”

Makapatpat timpal tiangé sibarengan ngraos.

“Ten sareng-sareng sapunapi, Cok.”

“Da milu dadi krama IPPI. Da milu masi dadi krama GSNI.”

“Dados kénten?” Putu Parka matakon.

“Yén iraga ngamiluin sinalih tunggal, artinné, iraga milu ngranaang murid-murid di sekolahané mamusuh kapitui. Tatujon ragané masekolah dini malajah bareng-bareng. Apang bareng-barang dueg.”

“Jakti Cok, tiang cumpu.”

Suud Putu Parka, timpal tiangé buin telu sibarengan ngraos.

“Tiang sareng telu setuju.”

Sing ngantiang tempo buin tiang nimbalin aji raos:

“Lan uli jani tincapang patimpalan iragané dadi pasawitran. Lan nyabran dina buda, petengé, malajah bareng-bareng di purin tiangé.”

“Nyabran saniscara wengi, ngiring sareng-sareng magitaran. Uningin tiang Cok wikan magitaran. I Méndra, I Jaya, I Warta, dueg taler magitaran,” Putu Parka nimbalin.

Wayan Méndra, Gedé Jaya, Wayan Warta sing moyanin pangidih tiangé. Sing moyanin masi ané raosanga tekén Putu Parka.

Kapin pangidih tiangé sing boyanina tekén timpal tiangé makapatpat, tiang ngorahin apang ngorahang tekén reramané suang-suang. Utaminné ngorahang pangidih tiangé sing milu dadi krama GSNI miwah IPPI.

Nyautin pangidih tiangé ento, Gedé Jaya ngorahang, kapin bapané dari krama PKI, sing taén milu nuju PKI-né pawai utawi ngadaang ramé-ramé di alun napkala ulang taun. Ia nawang bapané kéto, bapané ané ngorahang tekén meménné dugas takonina ngudiang sing milu pawai. Ngudiang sing ka alun-alun dugas ulang taun PKI-né.

“Sakéwanten, Cok, bapan tiangé ngorahang ring mémén tiangé, kepala kantor genahné magaé nganikain nyarengin nyabran wénten rapat PKI Kabupatén.”

“Di rapaté, orahina ngudiang tekén kepala kantorné?” Wayan Warta matakon.

“Orahina nulisang isin rapaté.”

“Kepala kantorné sing bisa nulis?”

“Sing ja sing bisa nulis, yén peteng paningalané kuang pedas ningalin.”

“Endén malu, di kantor bapan Gedené, makejang pagawéné PKI?”

Gedé Jaya maanggutan.

“Dadi patuh?” Wayan Warta macempléng..

“Patuh kénkén?”

“Patuh  tekén bapan tiangé. Orahina kéto masi tekén kepala kantorné.”

“Bapan tiangé kéto masi,” Putu Parka ajak Wayan Méndra sibarengan nimbalin.

Yén kénkén kadén unduké nadaksara marawat bapan timpal tiangé makapatpat matur kisi-kisi tekén ajin tiangé. Matur kéto satondén maceki. Tiang ané majujuk telung depa jogné, sing pedas ningeh apa ané aturanga. Ané pedas tepukin tiang prarain idané bingar gati.

Ané marawat ento ukana orahang tiang. Uli keneh tiangé, rasaang tiang, buka ada ngorahin: da orahanga. Yén seseda nakonin apa ané aturanga pelut baan nyautin?

 

/3/

“Ngudiang nyabran dina Buda peteng malajah bareng?”

Ajin tiangé matakén dugasé tiang maatur lakar malajah bareng ajak Putu Parka, Wayan Méndra, Gedé Jaya miwah Wayan Warta. Patakon ajin tiangé sautin tiang.

“Palajahan dina Wrespati palajahan sane ketil ring sekolahan.”

“Palajahan apa dogén?”

“Ilmu ukur, Aljabar, Ilmu alam miwah Ilmu hayat.”

“Ooo kéto. Sakéwala selegang malajah. Da liunan macanda. Da gradag-grudug di tongosé malajah.”

“Ring dija genah titiangé sareng timpal-timpalé malajah Ajung?” Tiang ngamaluin ajin tiangé ané lakar ngamedalang baos.

“Di purinné Ajung Alit laku.”

Puri ané nikaanga tekén ajin tiangé, wangunan gedong misi petang kamar. Uli atiban. Sing genahina. Ida ajak oka miwah rabinné kesah ka Denpasar.

Ditu ida dadi kepala Kantor Penerangan. Ditu masi ida, madue puri di jalan Gumitir.

Ajin tiangé masih ngicén magitaran nyabran Sanisacara. Ané karsaang ida, yén magending da kanti munyiné cara anak mageluran.

“Apang sing palungguhanga tekén pisagané. Apa buin, pisaga selat témbok danginé ngelah rare.”

Marasa sing percuma tiang malajah bareng ajak timpalé makapatpat. Ané makada tiang, miwah timpalé makapatpat sayan bisa tekén palajahan ilmu alam ajak palajahan Ilmu hayat. Sajaba Wayan Parka, sayan bisa tekén palajahan aljabar miwah ilmu ukur.

Nyabran Saniscara garjita pesan tiang. Ané makada, tiang miwah timpalé makapatpat pada bisa magitaran. Sing buin ada ané ajahin. Ada buin ané makada kenehé garjita. Sing piwal tekén paiguman sing milu-milu dadi krama GSNI miwah IPPI napkala magending. Tiang miwah timpal tiangé di nujuné selagenti magendingan, sing ada ngendingang Génjér-Genjér, Nasakom Bersatu, Resopim, Gentasuri, Kepasilan, Buah Buni, Ngulah Kedis, miwah gendingan lenan. Ané gendingang tiang ajak timpal tiangé makapatpat magilihan: Bengawan Solo, Saputangan Dari Bandung Selatan, Melati di Tapal Batas, Aryati, Putri Cening Ayu, miwah Galang Bulan.

Yén nyén kadén ngorahin, makejang timpalé di sekolahan nawang, tiang ajak timpal tiangé makapatpat dueg magitaran miwah munyiné napkala magending getar.

Di subané duang bulan magitaran, Putu Parka ngorahin tiang. Ketut Santa nagih kacunduk. Kacunduk ajak tiang. Tatujoné kacunduk lakar ngorahin apang milu péntas di katujuné PKI-né ulang taun.  Putu Parka buin ngorahin.

“Ipun mapajar, polih  jinah.”

“Maan pipis apa?”

“Kocap jinah pinaka prabéa numbas busana.”

Sing ngantiang tempo buin, Putu Parka orahin tiang ngaukin wayan Méndra, Gedé Jaya miwah Wayan Warta.

“Mumpung ada galah, mumpung nu mangaso, énggalin alih. Tiang ngantiang di betén jepun di arep ruang guruné.

Disubané mapupul tiang nyambat pangidihné Ketut Santa.

“Ketut Santa sekretaris IPPI kabupaténé sane nganikain Cok?”

Patakoné Wayan Warta sautin tiang aji anggutan. Ningalin tiang maanggutan Wayan Warta macempléng.

“Sampunang kayun, Cok.”

“Nggih Cok. Elingang iraga sareng lima sampun igum ten jagi nyarengin GSNI utawi IPPI,” Wayan Méndra miwah Gedé Jaya sibarengan nimbalin.

Sonder matempo buin, orahin tiang Putu Parka ngorahin Ketut Santa.

“Orahin ia, orahang sing ngisinin pangidihné.”

Buin, limang dinané Gedé Jaya ngorahin tiang, Nyoman Jiwa, wakil ketua GSNI kabupatené mapangidih apang péntas napkala ulang taun PNI-né.

Kapin sing lakar ngisinin pangidihné Nyoman Jiwa, Wayan Warta mapetuéling aji patakon.

“Sampunapi yéning wénten tangkil ka purin Coké, mapinunas mangda ajin duéné nganikain péntas ring ulang tahun PNI-né?”

“Yén ada maatur kéto, yén ajin tiangé nganikain tetep tiang masaut néntén ngiringang pangarsan ajungé.”

“Yéning ajin Cok Agungé nyesed napi ngawinang?”

“Lakar orahang iraga magitaran, sing ada tatujon péntas. Tatujoné anggon ngisinin demen. Lakar matur masi tekén Ajung tiangé.”

“Napi malih jagi nikaang Cok ring ajin duéné?”

“Tiang ajak timpalé makapatpat, masekolah tatujon utamané malajah. Sing milu-milu mapolitik.”

Buin maninné timpal-timpalé ané dadi krama GSNI miwah IPPI masasimbing aji sindiran. Ada nyindirin tiang ajak timpal tiangé makapatpat grup borjuis. Goba malingis, sakéwala nyaliné malakar aji telengis. Ada nyindirin aji gendingan: ada group jalema jelé brakapak. Mua tapak. Yén magending munyinné care ember matepak. Ada nyindirin aji raos. Saling sautin: ada grup, grup feodal. Awalné pondal, tendasné cara bal. Yén magending, ngorahang tiang sing ngelah modal. Tiang jalema feodal tiwas, baang ngidih baas. Ada masi nyindirin aji tulisan di kertasé ada mejang di duur bangku tongos tiangé ajak timpal tiangé makapatpat mejang tas. Isin tulisané ada grup kontra révolusi. Jalan Retul. Anggon rujak campuhin sentul. Lan ganyang laut panggang. Gaénang bangbang. Laut makalima pulang dugdugang. Dugdugang cara pindang.

Sindirina kéto, tiang, ajak timpal tiangé makapatpat sing ngrunguang. Sing nyangetang. Nanging, tiang ajak timpal tiangé makapatpat sing terima dugas Nengah Kandra ngéténg-ngéténg ngorahang grup kuluk berung. Maimbuh nangtangin majaguran. Ngorahin ngrebut sambil nuding aji tujuh kébot.

Gedé Jaya majujuk nuding.

“Wé cicing bendahara IPPI tukang pantet pipis. Cang lawan. Timpal cangé sing demen dadi jalema pengecut buka timpal di kelas ibané. Nyanan payu di klotok. Di sekolahané ené sing ada bani tekén iba, mapan kasub jago néngklung. Nyanan buktiang kaduegan cainé néngklung. Ajak timpal cainé buin patpat apang ada ningting awak ibané yén bah di biasé kéna tendangan cangé!”

Nengah Kondra, nyautin

“Lakar buktiang cang, wé, kuluk berung manyényéh. Cai sing ada apa-apané. Lakar buktiang nyanan di Klotok, raos cainé patuh tekén munyin derim puyung.”

“Wé Basong gudig,, kabisan cainé néngklung tuah akéto suba ngapak-apak. Pamér dini ditu ngédéngang kakembangan téngklung. Téngklung cainé téngklung téndas keléng. Téngklung amah temah!”

Nengah Kondra barak biing muané ketoanga tekén Gedé Jaya. Mara bibihné lakar makemélan, munyin bél pinaka cihna suba telah galahé mangaso maklenténg. Suud makecuh, sarwi mandreng Gedé Jaya, Nengah Kondra makaad. Timpal-timpalné ané paturu IPPI nututin uli duri sarwi makecuh.

Satondén ka Klotok, sanjané, tiang ngadén Gedé Jaya lakar kalah. Sawiréh sing taén dingeh gatra ia malajah téngklung. Kéto masi sing taén tepukin ia néngklung.

Sakéwala, ané kadén tiang ento pelih. Gedé jaya menang nglawan Nengah Kondra.

 

/4/

Satondén tanggal 1 Oktober 1965, tanggal kuda kadén dugasé ento. Ada ramé-ramé di malun pekené. Sing tawang apa ngranaang, nadaksara ramé-raméné biur. Di subané tatasang tiang nlektekang, biure ulian anak majaguran. Tingalin tiang anak muani gedé gangsuh karebut. Ané ngrebut ada sawatara ajak dasa. Marasa kalilih karebut, anaké gedé gangsuh ento malaib beneng kauh. Anaké ané ngrebut nguber.

Biuré makada ramé-raméné suud. Tiang ané mabalih ajak Gedé Jaya dugasé ento, gagéson mulih. Gedur-gedur tangkah tiangé. Nyeh ané ngranaang. Baan nyehé, tiang sing pesu raos nang abuku. Sledét tiang Gedé Jaya. Tepukin tiang muané nyinahang inguh tan kadi.

Teked dangin Balai masyarakaté, mara lakar mabikuk kelod, tepukin tiang anak ramé magrunyungan di ajeng puri agungé. Tundikin tiang Gedé Jaya, ajak tiang kema.

Teked di ajeng Puri Agungé, tiang makesiab anaké magrunyungan ruyu makalé ngraos.

“Anaké ané rebuta matianga.”

“Anaké ané ngrebut suud ngamatiang malaib.”

Sayan makesiab tiang dugas ningeh anak muani pukel ngraos sanget gati.

“Timpalé, PNI, ada ngamatiang. Ané ngamatiang pasti PKI. Timpal-timpal ajak makejang lan nglapor ka kantor polisi.

Suud ngraos kéto, anaké muani pukel ento magedi. Gancang gati tindakané. Didurinné anak muani siteng maguét, sawatara ajak dasa nututin.

Gedé Jaya tundikin tiang. Ajak tiang mulih. Teked di purin tiangé, tiang maatur tekén ajin tiangé. Aturang tiang masi raos anaké muani ané pukel totonan.

Mireng ané aturang tiang, ajin tiangé matangi uli korsi ané linggihina. Sing maosang apa buin mamargi medal.

Buin mani semengané, taméng uli dija kadén suba ramé tepukin tiang majujuk di téras puriné. Seregep saha sanjata. Ada ngaba kléwang maaud, ada ngaba kéris maaud, ada ngaba cabang, ada ngaba tumbak, ada ngaba roti kalung. Makejang maatur ngorahang lakar ngalih ané ngamatiang krama PNI-né di jaban Puri Agungé.

“Suba tawang ané ngamatiang?” Ajin tiangé matakén.

“Sampun,” mabriuk taméngé masaut.

“Nyén ané ngamatiang?”

Selagenti taméngé masaut.

“I Pica, sareng I Miarsa.”

“Kho Hok Djin.”

“I Londo.”

“I Miarsa.”

“I Gobleg, I Rinda, I Rada.”

“I Manis.”

“I Suda.”

“Ajaka adasa ané ngamatiang?”

“Inggih Dwagung.”

Ditu ajin tiangé ngorahin apang nglaporang ka kantor polisi. Yén polisine sing ngejuk, ajin tiangé sing nemalangin ngamatiang.

Tanggal 1 Oktober 1965. Sekolahan tongos tiangé malajah biur. Biur baan gatra. Gatra ané dingeh tiang. Gatra unduk Déwan Jéndralé matiang Déwan Revolusi.

Di mulihé, di salantang rurung, Putu Parka ngorahing tiang.

“Jaga genting kotané niki Cok.”

“Genting kénkén?” tiang matakon.

“Piragi tiang nuni krama GSNI-ne ngraos, yén menang, sakancan GSNI né jag bangkaang.”

“Piragi tiang taler nuni, krama PNI-né ngraos, yén menang, sakancang krama IPPI-né jag tampah. Ketua, Bendahara miwah pamucukné empug tendasné aji batu. Dimakecrot polonné, saup. Sambehang kija-kija.”

“Gedé Jaya indayang takénin,” Wayan Warta ngraos, sareng ipun tiang miragi krama IPPI-né wenten ngraos. Yén menang payu maan mabalih anak nguling pedanda miwah nenggala pura madadiang carik utawi tegal.”

“Jakti Cok, tiang mirage raosé nika,” Gedé Jaya ngraos dugas tolih tiang.

Sekat ento ajin tiangé nganikain apang suud malajah bareng. Apang suud masi magitaran nyabran Saniscara. Ajin tiangé nganikaang guminé sayan genting. Sing buungan lakar ada siat gedé. Siat gedé PKI nglawan PNI. Siat gedé nganggon sanjata.

 

/5/

Munyin cecek di témboké, ngranaang tiang inget tekén déwék. Ngranaang masi nlektekang suraté makapatpat di duur méjané. Maca adané ané ngirim, inget tiang tekén bapané Putu Parka, Wayan Méndra, Gedé Jaya miwah Wayan Warta.

Tiang engsap tanggal kuda kadén dugasé ento. Ané ingetang tiang guminé sayan genting. Ané ingetang tiang lakar ada panumpasan PKI. Bapan timpal tiangé makapatpat teka. Kala ento, tiang nikaina negak di samping korsi ané linggihina. Ajin tiangé malinggih di korsi tamuné ané lantang. Bapan timpal tiangé makapatpat negak majajar di arepé.

“Ampura Dwagung,” bapané Putu Parka maatur “Wenten napi, kantos matitip baos sumangdéna titian sareng patpat tangkil rainané mangkin?”

Sing ngicén selah bapané Wayan Wéndra, Gedé Jaya miwah Wayan Warta matakon, ajin tiangé nelatarang tatujon idané apang tangkil dinané ento. Sawatara buin duang minggu lakar panumpasan krama PKI-né. Ané numpas taméng tentera miwah RPKAD ané lakar teka uli Jakarta. Bapan timpal tiangé makapatpat nikain ida apang sing jejeh. Ajin tiangé nganikaang sing milu matumpas. Ané makrana kapin dadi krama PKI, bapan tiangé makapatpat dadi delik sandi PNI. Delik sandi ané ngranaang ketara BTI-né turba. Ané makada gerakan landerfom PKI-né ketara. Ané ngranaang sakan rarincikan daya PKI-né ketara masi. Kéto masi ngranaang ketara rencana PKI-né nguling pedanda miwah pemangku, nabug bangkén krama PNI-né di bangbangé dalemné selaé meter miwah nenggala sakancan purané dadi tegal, ketara.

Ajin tiangé laut ngarauhang hasil rapaté itelun ané mastiang nyén ané matumpas. Lénan tekén krama PKI-né ané ada di daftaré, ané sing matulis di daftaré sakéwala milu dadi réncang PKI, ané kapingetin mapan gelar-gelur miwah brakapakan. Kepala kantor miwah pagawé sig tongos bapan timpal tiangé makapatpat, magaé milu kena garis. Milu matumpas.

Rapaté masi mutusang, tur ané milu rapat cumpu, bapan timpal tiangé makapatpat sing matumpas. Apang sing ngenah mademen-demenan, rapaté mutusang apang bapan timpal tiangé makapatpat késah uli kotané ené buin aminggu ajak pianak somahné. Satondén késah mabaang kartu miwah surat keterangan pinaka krama PNI. Di majalan késahné atehang taméng kija késah.

“Yén cai makapatpat sing késah ajak pianak somahé uli dini, iang nyeh. Tawang ané nyehang iang?” Ajin tiangé mabaos tumuli matakén.

Bapan timpal tiangé makapatpat sibarengan makitukan.

“Dibi iang ada ngorahin. Pisagan cainé ané PNI suba mapacuk lakar numpas cai makapatpat. Kanti pianak somahné lakar tumpasa.”

Ditu, ajin tiangé masi nganikaang pangarsan idané di rapaté. Ajin tiangé mapangarsa, apang umah bapan tiangé makapatpat sing borbor taméng. Taméngé, ajin tiangé ada ngaturin, lakar ada anak ngencur aji api di subané nuruang lengis gas uli raab kanti batarané. Ajin tiangé di rapaté mapangarsa apang umah bapan timpal tiangé makapatpa kadadiang markas PNI utaminné taméng ané numpas dadua. Sisané dadi markas RPKAD miwah tentera.

“Ané sing sida baan iang nyautin, patakon pamilet rapaté,” ajin tiangé mabaos.

“Napi sane takénanga duagung?” bapané Wayan Warta nyempléngang patakon.

“Ané takonanga nyén sujatinné ngelah umahé makapatpat. Iang sing nyautin ané sujatinné ngelahang. Yén orahang cai ajak pat ngelahang, pasti orahanga mapilih numpas. Dilepeté orahanga kong kali kong ngajak PKI. Ané matakon, uli pidan sing demen ajak iang. Wiréh iang ané sing cumpu ia dadi wakil PNI di kotané ené.

“Raris sapunapi Dwagung nyawis?”

“Iang nyautin aji nem lengkara: buin dasa lemeng orahina ané ngelah. Sautin iang masi aji: apang sing kadanan ngendog yén iang ngaku ané ngelah. Pasauté busan pesuang iang apang sing seseda. De gedeg iang masaut ngaku ngelahang, nah”.

“Nenten dwagung,” bapané Putu Parka nimbalin. Di subané maangkihan buin ngraos.

“Durusang Dwagung ngangkenin, nikaang titiang sareng patpat madunungan.”

“Titiang sareng tiga pateh itungan sareng bapané Putu Parka.” Bapané Wayan Méndra, Gedé Jaya miwah Wayan warta masaut sibarengan.

Suud ngicén kartu misi gambaran banténg ngipuh di sisinné segitiga ané medalanga tekén ajin tiangé, uli kantong kuacané, banban nganika sakéwala santep.

“Pianak iangé dadi saksi. Buin pidan ja guminé degdeg. Kayangé ento tangkil mai. Ditu umah cainé makapatpat lakar ulihang iang.

Buin nem dinané Putu Parka, Wayan Méndra, Gedé Jaya, Wayan Warta teka ka purin tiangé. Teka mapamit tur ngaé pasamayaan lakar kacunduk di subané tuuhé ngenjek nem dasa tiban.

Dugas panumpasané liu krama PKI-né ané kena garis. Liu masi umahné ané maborbor. Dingeh gatra pagawé miwah kepala kantor tongos bapan timpal tiangé makapatpat magaé makejang matumpas. Di sekolahan tiangé, pamucuk IPPI-né dingeh alih tentara. Dingeh abana ka Kodim. Kondén ada dingeh matumpas. Ané ngranaang tiang ngidigang pala gatra unduk ané ngamatiang krama PNI-né di jaba puri agungé. Dingeh bragédéga aji truk. Di desa penasan dingeh siksana. Ané nyiksa krama PNI ajak liu.

 

/6/

Kanti tiang tamat kuliah. Kanti tiang lakar pensiun bulan Méiné jani. Bapan timpal tiangé makapatpat tondén teka. Teka nakonang umahné suang-suang.

Tekén ajin tiangé, taén tiang nakonang. Ajin tiangé mabaos cendet nyawis patakon tiangé.

“Antiang dogén, buin pidan ja teka, kayangé ento serahang umahné makapatpat.

Yén sing pelih ada pang telu tiang nakonang. Yén sing pelih, uli duang tiban ané liwat tiang nakonang. Lebihan tekén pang telu, sing bani tiang nakonin ajin tiangé. Nyeh yén ida bendu. Tiang nawang, yén ajin tiangé bendu, baos ané sing bisa ningehang aji koping medal sakéng lambén idané.

Kapin pakarangan puri Semaracitané linggah, cupek pesan rasaang tiang wiréh okan sameton ajin tiangé ngwangun tongos makejang. Ajin tiangé masameton ajak telu. Suang-suang sametoné madué oka pada matelu. Buina sameton ajin tiangé suba ngelah kompiang pada madadua. Kondén tiang miwah adin tiangé buin patpat. Suba pada ngelah pianak pada telu tur ngelah cucu pada dadua.

Sing sapatau tiang, mulih uli duang minggu penataran di Jakarta adin tiangé makapatpat suba nongosin umah bapané Putu Parka, Wayan Méndra, Gedé Jaya miwah Wayan Warta.

Kala ento tiang makeneh. Pasti ajung nganikain nongosin. Yén sing kéto, sing bani nongosin. Ajin tiangé nganikain nongosin, pasti ulian mireng atur adin tiangé makapatpat. Sing prasida nongos di puri Semaracita ané suba seksek miwak kosek.

Kala ento, tiang makeneh lakar mapatuéling tekén ajin tiangé. Mapatuéling, yén bapan timpal tiangé makapatpat tangkil nagih umahé ané tongosina tekén adin-adin tiangé, kénkén lakar ajin tiangé mabaos. Sakéwala tiang sing bani. Sing bani ulian nyéh ajin tiangé iwang panampén. Di subané iwang panampén mabaos:

“Né urusan ajungé. Da milu-milu.”

Tiang nawang, ajin tiangé sing dadi takonin apa ané makada ida malaksana kéné utawi kéto. Apa ané ngranaang mutusang kéné utawi kéto sondér ngarsaang tetimbang satondéné. Ngarsaang tetimbang tekén ané patut karsain ida.

Ané jejehin tiang di bendun idané di subané mapatuéling. Lénang tekén nuding, ajin tiangé mesuang baos sing sida ningehang aji koping.

Kala ento masi, makita tiang ngorahin kurenan tiangé unduk umahé makapatpat. Unduk tiang dadi saksi ajin tiangé lakar ngawaliang yén bapan timpal tiangé makapatpat tangkil di subané guminé degdeg. Ngekoh tiang ngorahin. Pasaut ané lakar tampi tiang pasti:

“Urusan anak muani da tiang milu-miluanga. Tiang nu inget tekén baosné iaji tekén ibiang dugasé ngaturin tetimbang. Kadén kéné iaji mabaos: awak luh da milu-milu ngurusang urusan anak muani.”

Ada buin ané ngranaang tiang ngekoh ngorahin kurenan tiangé. Tiang lakar upeta aji raos sepet.

“Yén Bli Agung tepén unduk mara inget tekén tiang. Mara ngorahang saha ngidih tetimbang. Cutetné, tiang sing lakar masaut nang abuku.”

Yén sing pelih, ada pang lima tiang suba kétoanga.

Duang bulan ané liwat, di subané petang bulan ajin tiangé maplebonang. Tiang mabuaka adin tiangé makapatpat. Ditu tiang ngorahin unduk umah ané tongosina. Tiang masi ngorahin, dadi saksi. Saksi, dugas ida masamaya lakar ngwaliang umah gelah bapané Putu Parka, Wayan Méndra, Gedé Jaya, miwah Wayan Warta.

Orahin tiang kéto, pasaut adin tiange makapatpat patuh.

“Ampura Bli Agung. Ajung ring tiang ten wénten nganikaang sakadi sané nikaang Bli Agung wawu. Yén wénten becikan tiang ten ngenahin umahé puniki. Lek manahe, ring sampuné ngenahin matilar sakéng deriki ulian umahé tagiha ring sane nuénang.”

Gendingan Putri Cening Ayu ada ngendingang uli pamereman ajung tiangé. Ningeh gendingané ento nadaksara tiang inget tekén awak. Sawiréh ané ngelah munyiné kurenan tiangé, tiang nadaksara inget masi: tiang ané ngorahin kurenan tiangé mabersih-bersih miwah matamped-tamped ditu.

Mara lakar nyemak suratné Putu Parka, Wayan Méndra, Gedé Jaya miwah Wayan Warka, kurenan tiangé teka. Gagéson majalan. Nyekolang surat maamplop coklat di duur mejané. Ngraos sarwi nlektekang tiang disubané majujuk di arepé.

“Suraté ené bakatang tiang dilemari busanané ajung. Sawiréh di bucun suang-suang suraté misi kruna Rahasia, tiang sing bani maca.”

Suud ngraos kéto, kurenan tiangé matilar. Suraté makapatpat jemak tiang. Ané ngirim bapané Putu Parka, Wayan Méndra, Gedé Jaya miwah Wayan Warta. Kertas di tengah amplopné baca tiang selagenti. Tanggal suraté mabinaan. Sakéwala warsa suraté patuh. Pada warsa 1972. Isinné masih patuh: ngaturang umahé makapatpat. Unduké ngaturang ené suba orahanga tekén pianak somahné. Ané makrana ngaturang, ajin tiangé ngranaang nu idup dugasé ento kanti jani.

Suud maca, makejang celepang tiang ka amplopné suang-suang. Laut jampélang tiang dadi besik. Di subané majampélan besikang tiang ajak suratné Putu Parka, Gedé Jaya, Wayan Wéndra miwah Wayan Warka.

Amlapura, 2020

 

IDK Raka Kusuma
embas ring Getakan, Klungkung, 21 Novémber 1957. Dané nyurat makudang-kudang puisi mabasa Bali, satua bawak, esai basa Bali, miwah novélét mabasa Bali. Lianan ring punika, dané taler nyurat puisi, cerpén, lan ésai mabasa Indonésia. Kakawian-kakawian danéné sané mabasa Bali kawedar ring Bali Orti (Bali Post), Médiaswari (Pos Bali), Bali Aga, Jurnal Kawi, miwah Canang Sari. Lan kakawian dané sané mabasa Indonésia kawedar ring Bali Post, Nusa Tenggara, Karya Bakti, Warta Bali, Nafiri, Warta Hindu Dharma, Minggu Pagi, Kedaulatan Rakyat, Mimbar Indonésia, Suara Nusa, Pikiran Rakyat, Suara Karya, Sinar Harapan, Berita Buana, Républika, Singgalang, Analisa, Cak, Kolong, miwah Romansa.Ring warsa 2002 dané ngamolihang Sastra Rancagé antuk baktin ipun ring pangembangan sastra Bali malarapan antuk Majalah Buratwangi lan taler 2011 antuk kakawiannyané sane mamurda “Sang Lelana”. Ngamolihang Penghargaan Widya Pataka saking Gubernur Bali warsa 2012 antuk cakepané sané mamurda “Bégal”. Sareng pangawi saking Karangasem dané ngwangun sanggar sané mawasta Sanggar Buratwangi, lan dané taler dados silih sinunggil pangremba ring sanggaré punika.