Mawa Madui (20)

Olih: Ketut Sugiartha

Sumber Gagambaran: www.deviantart.com

“Kénkén ja carané pang bakat beli lukisané ento.”

“Lukisan apa?”

“Ibi Laras nepukin lukisan melah nanging tusing adepa.”

“Terus?”

“Laras meled meli lukisané ento yadian mael ajiné. Tegarang raosang buin, nyén nawang nyak adepa.”

“O kéto. Nah, lakar cobak.”

Tuun uli mobil Putu mara tangeh yéning Laras tusing ja tuah demen ngigel sakéwala demen masih ngoléksi lukisan. Putu dadi inget tekén umahné Laras di Jakarta, utamané ruang tamu, ané kaias baan makudang lukisan.

“Laras percaya Bli pasti nyidaang ngaé papinehné obah.”

Munyin Laras madingehan sada gugup. Ia ngéncolang majalan nutug Putu. Pelayan jegég mabusana adat madya ané majujuk di malun tokoné nyapatin aji kenyem soméh. Di tengah ada masih makudang pelayan ané sedeng ngladénin tamiu dura negara.

“Lukisané ento ada di bucu,” Laras mapitau tekén Putu. “Laras lakar ka toilét malu.” Tusing ngantosang pasaut Putu, Laras laut majalan ngojog toilét di samping tokoné.

Makelo majujuk klingang-klingeng di bucu Putu sagét ningeh anak matengkém di duriné. Tatkala makipekan dapetanga ada nak muani matuuh sawatara séket tiban. Jaegné tegeh lan kedas kulitné. Paningalané ning, kumisné tebel. Mapan tlektekanga uli duur kanti ka betén Putu lantas nyapatin.

“Om, Swastiastu.”

“Om Swastiastu,” nak muani di arepné ngwales. “Ngrereh napi?”

Takonina buka kéto Putu lantas nyambat lukisan ané meledanga tekén Laras.

“Lukisan?”

“Lukisan sané pastika mabuat pisan kantos kocap nénten ja kaadol.”

Nak muani di maluné Putu buin nlektekang paukudané, buka sangsaya. Nanging Putu tusing nyak mapineh ané tidong-tidong, mirib mula kéto pangabahné uli kadituan. Putu mautsaha tusing ngrambang.

“Bapak minab ten percaya yéning tiang bani numbas lukisan mael. Ten ja tiang sané jagi numbas, timpal tiang.”

Nak muani di arepné anggut-anggut.

“Mangda uning manten, timpal tiang kuciwa sajan yéning ten prasida nuénang lukisan punika.”

“Mangkin dumun,” nak muani ané ngomong ajak Putu lantas nyemak lukisan maukuran sawatara 50 x 75 sénti nganggon sibeh maukir apik.

Putu maplengek ningalin lukisan ané édenganga. Lukisan nak luh ané mesib Laras. Putu minehin sinah ento ané makada Laras bani meli yadiastun mael ajiné.

“Bapak sané nglukis?” Putu nyelehin.

“Nggih.”

“Becik pisan. Bapak nganggén modél daweg nglukis?”

Nak muani ané takonina kituk-kituk.

“Nganggen foto?’ Putu nyedsedang.

“Ten.”

Bibihné Putu klecet-klecet angob. “Becik pisan, pantes timpal tiang gregetan makita ngelahang. Mesib pisan.”

“Niki gelah tiang sané pinih mabuat.”

“Dados kénten?”

Busan-busan nengnenga, Putu marasa ada ané soléh. Eda-eda anak tusing tegteg bakat ajak ngaraos, kéto ia ngrenggeng di kenehné. Tan paraos nak muani di maluné lantas ngelépin Putu apang nutug déwékné ka duri. Buka anak kena guna-guna Putu nunut. Buin jahané ia napetang paukudané suba ada di karang umah ané natahné linggah. Angob ia ningalin tamané ané asri. Makudang entik-entikan bunga melah kaperténin ditu. Putu orahina menék ka balé gedé ané malanté granit. Ditu lantas ia negak di duur karpét barak ané suba makebat. Adegan balé gedéné maukir lan maprada, kéto masih langit-langitné.

“Ngroko?” Putu enjuhina roko nanging ia kituk-kituk.

“Sira ragané?”

“Tiang Putu Mastra.”

“Kéné Putu. Idup tiang buka kajepit. Kajepit baan sima warisan leluhur lan jaman ané masih tusing nyidaang baan ngelidin, jaman modéren.”

Tusing nyidaang Putu marna lakar ngaraosang apa ya nak muani ané sedeng negak di maluné. Ia tusing resep tekén raos ané mara sajan dingeha. Ia bengong mandrengin muan nak muani ané ngisep roko di maluné tur matakon di kenehné, nyapnyap. Tegteg apa tusing jalemané ené? Nguda dadi ngenah cara seniman ané senéwen?

“Ampura, kadén tiang Bapak jaga maosang unduk lukisan punika,” Putu ngingetin.

“Nika sampun sané raosang tiang.”

“Ampura yéning tiang kirang sabar.”

“Lukisan ento gaé tiang ulian kahanan ané makada tiang tusing nyidaang makiba. Dugas ento tiang sedeng marebat ajak déwék tiang padidi.”

“Tiang naen mireng, pakaryan sané luwih sering embas ulian sané makarya sedeng katibén pikobet. Sakadi Mozart, kocap ipun prasida ngembasang pakaryan sané pinih luwih tatkala ipun sedeng patah ati.”

Nak muani di malun Putu negak nengneng paningalan Putu angob sambilanga ngisep roko.

“Ampura, napi Bapak sedeng katibén pikobet dugas makarya lukisan punika?”

“Kénten ja. Putu taén masih ngarasaang?”

Ningeh patakon buka kéto Putu marasa ngancan paek ajak nak muani ané sedeng ajaka ngaraos. Ento awanan ia tusing ragu nuturang unduk paukudané ané taén ngarepin pikobet. Pikobet tresna. “Antuk linggih sané ten pateh pamuputné tiang sareng dané palas. Dané mawit saking puri, tiang wantah wang sudra. Yén Bapak, napi pikobeté?”

“Pateh,” kéto pasautné sinambi ngucek puntung roko di asbak di sampingné. “Ajik tiang ten setuju mapan kurenan tiang masih nak jaba.”

Putu makesiab ningehang. Mara ia tangeh yéning nak muani ané sedeng ajaka ngaraos malénan wangsa ajak déwekné. Makita ia nakonang apa ya wangsané, sakéwala tusing luung rasaanga kenehné. Ento awanan ia mendep dogén, ngantiang kanti orahina.

Prajani Putu ngalusang raosné. Ia matakon adeng-adeng, “Napi sané sampun nibénin Ratu?”

“Yéning tiang ngorahang tusing nyidaang lémpas uli sima ané warisanga tekén leluhuré, anak mula patut kéto. Nanging perlu masih pilihin ané cén patut kalestariang, ané cén patut kutang wiréh tusing nu mapikenoh. Béh, kanti engsap, Putu nakonang apasé busan?”

“Tiang meled uning napi kaberebehan sané sampun nibénin kulawargan Ratu?”

Nak muani ané makumis jempé ento kituk-kituk. “Dugas ajik tiang sungkan, tiang ten baanga nelokin, apa buin ngusud. Biang tiang masih nemah tiang sekadi pianak ané tusing bakti tekén rerama. Tan maa tiang lakar taén nepukin kahanan buka kéto. Kurenan tiang tan sida naanang sebet kenehné nepukin tiang ketoanga, ia lantas melah-melah ngidih mapamit uli jero. Suud ento tiang lantas kajodoang ajak nak luh lénan. Nanging, ajik kéto masi biang tetep kuciwa mapan suba makelo sajan tiang tusing nyidaang ngmaang cucu.”

Sawat kuping Putu ningeh munyi kranting-krinting uli wangunan ané majujuk di sisi kelod. Takeha ada anak sedeng ngaé téh atawa kopi.

“Ampura, tiang nenten ja sué,” Putu ngaraos sinambi makiselan lakar bangun apang tusing ngaé Laras paling ngalihin paukudané.

“Jantos dumun,” anak muani di maluné nambakin. “Kadén Putu meled nawang nyén sujatiné anak luh ané lukis tiang.”

“Pastika sampun Ratu madué rabi.”

Kenyem nak muani ané ajaka ngaraos ngaé Putu tusing percaya yéning pasautné beneh.

“Lakar kija kadropon?” buin Putu tambakina tatkala lakar majujuk.

Buin jahané sagét ada nak luh bajang pesu uli parantenan ngaba naré misi kopi duang cangkir lan jaja Bali mawadah lépékan. Putu ngon nguratiang kanti tusing makijapan. Buka ngipi rasané ia nepukin anak luhé totonan majalan maekin balé géde lantas ngejang cangkir kopi lan jaja mawadah lépékan di duur karpété. Bibihné nadaksara caket tusing nyidaang makemélan.

“Kénkén, Putu, patuh sing ajak lukisané?”

Putu tangkejut buka kadundun uli sirepné. Ia nguratiang muan nak luh ané lantas negak di sampingné. Suud kéto ia mandrengin muan nak muani di arepné. Kaliwat ngon ia kanti ngenah buka kebo mabalih gong. Ia marasa déwékné sajan-sajan belog, tusing bisa ngaraos. Buntu rasaanga otakné.

“Tiang suba nawang nyén sujatiné Putu.”

Putu mara tangeh nyén sujatiné anak muani makumis jempé ané negak di maluné. “Ratu niki dong Déwa Gedé Rai?”

“Béh, Putu suba nawang adan tiangé kéwala Putu sing nawang jlemané.”

Putu ngusap gidatné ané belus aji telapakan limané. Peluhné meliah uli sakancan song buluné buka ia sedeng negak di duur jalikané.

“Tiang suba taén ngarasaang jengah,” Déwa Agung Rai nuturang. “Tiang tusing ja lakar ngaé sentanan tiang bareng ngrasaang kahanan buka kéto ulian kamomoan reramané. Yéning suba galahné ia katemu jodo, lakar depang tiang ia milih gélané padidi. Pait manis idupné anak ia lakar nyalanin.”

Liu sajan lengkara ané meled pesuanga tekén Putu nanging makejang nyangkét di kakolongané. Akatih tusing ja pesu munyiné. Yadiastun kéto tumbén jani ia marasa bangga tekén paukudané. Tumbén jani ia marasa maaji dadi jalema. Ia marasa angayubagia nepukin kahanan ané ngaé ia makesiab buka kéné. Tusing taén ia madadugan lakar marasa tengkejut ané makrana ia liang. Liang ané makada yéh paningalané ngembeng.

Tusing ada lengkara ané nyidaang nuturang unduk rasa bagia ané rasaanga. Laras ané negak di sampingné lantas ngorahin ia nginem kopiné sinambi ngmaang kenyem ané pinih manis. Sanget manisan tekén kopi ané lantas inema. (puput)