Mawa Madui (19)

Olih: Ketut Sugiartha

Gagambaran Manik Sudra

Punyan jeruju ané marérod di sisin tukadé moyogan ampehang angin. Talin pancing Putu masi mayunan. Uli tuni tusing ja santep kenehné mamancing yadiastun aban-abané suba genep buka pales, pancing lan umpan. Tusing rambanga apa ada ebé ané nyaplok banehné. Puyung rasaanga sirahné. Otakné buka suba tusing dadi anggon mapineh. Sanjané ené karasa buka sanja dugas ia katemu siduri ajak Gung Ayu. Sanja ané ngaé atiné remrem buka langit kaliput gulem.

“Ndas bedag! Ada dini ci, mileh bakat alih.”

Putu tengkejut ningeh ada anak misuh di duriné. Wiréh tawanga ané teka tusing ja lénan tekén Duarsa, ia tuah makipekan aslabsaban laut buin nguntul mandrengin yéh tukadé.

“Sing kija-kija jani?”

Duarsa negak di duur batu tongos ia biasané mancing. Di duriné negak ada punyan kampuak gedé madon samah makrana tongosé ento tis. Disubané masang umpan ia laut nylempungang pancingné ka yéh tukadé ané degdeg.

“Sing,” Putu masaut. “Ngekoh.”

“Ngekoh kénkén? Anak ané sedeng kaliput semara biasané saat, ené dadi loyo cara kuangan pitamin?”

Mapan Putu mendep Duarsa lantas maekin. “Ada apa, Tu? Adi kéto sebengé?”

Don kampuak pada aas ampehang angin lantas ulung ka tukadé tur anyudang yéh suluk.

“Ia tusing  majodo ajak cang,” Putu masaut.

“Nyén, Laras?”

Putu manggutan tusing matolihan. Paliatné nu matanjeb di yéh tukadé.

“Péh, kéweh né. Kumat buin ci.”

“Asané cang lakar nepukin nasib cara ipidan.”

Don-don kampuaké buin sambrag ampehang angin, pales ané cekela tekén Putu magejeran buka ada ané ngedeng.

“Laras tresna kén cang kéwala ia tusing nawang yén ento lakar nekaang pikobet.”

“Pikobet apa?”

“Laras to nak Bali, patuh cara Gung Ayu.”

“Ah, masak?”

“Mara cang nawang,” Putu masaut, “Seken nawang uli kartu penduduk gelahné.”

“Men kénkén lantas?”

“Tondén maan cang nakonang, ndasé énggalang pengeng.”

Palesné Duarsa magejeran cara ada ebé ané ngedeng umpané. Ngénggalang ia ngontalang palesné. Ebé nyalian magedé anyari lantas klepak-klepek mautsaha ngelébang awak uli pancingé. Pabaliha akejep ebéné ento satondén celepanga ka dungkiné.

“Ci kénkén itungané?” Duarsa matakon sinambi masang umpan di pancingné.

“Makita cang ngorahin Laras apang ia nawang, kéwala sukeh baan cang mesuang munyi.”

“Adi kéto?”

“Cang tondén siap lakar natak pikobet buka kéto buin?”

“Ndén malu. Apa suba karuan lakar ada pikobet?”

Putu kagiat ningehang patakon Duarsa. Ia lantas matakon tekén paukudané, nguda kéné buka siap gocékan ané makirig satondén mapalu? Apa ané makaciri lakar ada pikobet?

“Yén cang dadi ci, cang sing ja lakar kadropon mapineh buka kéto,” Duarsa ngaraos seken. “Lakar édéngang cang yéning cang nak muani ané ngelah nyali.”

Putu ngon ningehang munyin Duarsa. Ané suba-suba tusing taén dingeha Duarsa ngomong seken buka kéto tur nganggon lengkara ané lantang lan sada sepet. Ento makrana ia tangeh yéning ia suba tusing nu pageh cara ipidan.

“Aksamaang yén cang pelih ngraos. Api kénkén ci ané pinih nawang, cang tuah nyidaang ngmaang papineh, yén dadi anggon.”

Putu mendep. Palesné Duarsa buin magejeran, nanging ebé ané nyaplok umpané léb uli pancingné.

“Sujatiné cang nekain ci lakar nyekenang unduk....”

“Séndratari?” Putu nyangkuak.

“Aa. Petengé ené lakar ngawitin muruk. Ci suba nawang?”

Putu kituk-kituk. “Guruné ento payu bareng?”

“Payu, suba seken raosné ajak Tut Arna.”

***

Ené panyumu balé banjaré buin ramé cara ipidan. Mirib tusing kuangan tekén séket diri kramané ané teka ka balé banjar. Semitané pada galang mapan marasa lega sajan sekaa séndratariné buin idup. Makejang pada meled nawang nyén ya lakar kajudi dadi Kén Sulasih mapan Gung Ayu Prami suba makelo tusing nu meneng di puri. Putu Mastra marasa atiné buka kaubadin nepukin kramané pada saat lakar mabalih anak muruk. Kénkén ya yén suba pentas cara ipidan nganggon busana lengkap?

“Ampura, nyelang margi,” kéto ia ngaraos sinambi nyelag di tengah kramané ané pada majujuk ngebekin natah balé banjaré.

“Mai lakun, kenalanga ya malu,” Tut Arna, kelian gong banjaré, magpagin sambilanga makenyem liang tur ngatehang Putu ka durin panggungé. Ditu lantas ia ngenalang anak luh ané magoba jegég imut mapangawak langsing lanyar.

“Damayanti,” kéto bajangé ané salamina tekén Putu nyambatang adané. Tusing ada kenyem di bibihné. Ulesné ia marasa tusing perlu makenyem mapan suba ngenah manis yadian tusing ja makenyem.

Mendep-mendep Putu marasa kuciwa abedik. Mula saja jegég gobané sakéwala mirib tusing ja dadi tegehin jalemané, kéto Putu ngrenggeng di kenehné. Yén tlektekang uli sebengné, ulesné ia marasa paukudané pinih dueg lan pinih jegég, tusing ada nandingin. Énggal Putu nyidaang muktiang dadugané. Uli panyumu muruk ia suba ngédéngang kabisané, tusing suud-suud melihang ené lan ento.

Putu sangsaya yéning sekaa séndratari ané kawangun buin lakar nyidaang kasub cara ané malu. Nanging apang tusing kadéna tusing cumpu tekén panguruké ia matilesang awak, nuutin sakancan ané orahina tekén panguruké.

Disubané suud muruk mara Tut Arna mapitau tekén Putu yéning Damayanti ento guru kesenian di SMA.

“Ia sarjana seni tari,” kéto Tut Arna nerangang dugas bareng-bareng mulih uli balé banjaré.

Putu anggut-anggut ningehang raos Tut Arna yadiastun nu ada rasa sekel nyangkét di kenehné.

“Putu dadi cara nak sing nyantep tepuk cang?”

“Mirib ulian suba makelo sing taén ngigel,” Putu masaut bawak.

***

Suba tengai dugas Putu ngedatang paningalan. Tusing ada kedis becica dingeha manguci, sakéwala ada anak nguci dingeha di malu, di ruang tamu. Cara munyin anak luh. Putu ngadébras bangun sawiréh tawanga ané ngelah munyiné ento Laras. Méméné suba taén kenalanga ajak Laras lan makadua ngenah adung maraosan. Sada ngon Putu ngantenang unduké ento mapan ia nawang méméné tusing ja pati pesu munyi. Putu nyuahin bokné satondén mukak pintu kamarné.

“Rahajeng semeng,” Laras ané negak di ruang tamu di samping méméné nyapatin Putu soméh.

“Rahajeng semeng,” Putu nyautin. “Julia dija?”

“Nu sirep.”

“Terus ajak nyén mai?”

“Nganggon taksi. Mémé ngorahang koné Putu muruk ibi sanja. Pasti demen, nyidaang ngigel buin cara ipidan.”

Putu maplengek sawiréh dingeha munyin Laras buka masasimbing.

“Kanti jam kuda muruk?”

Putu ngedeng kursi, negak sada joh. “Kanti jam satu yén sing pelih,” Putu masaut.

“Pantes kali jani mara bangun. Nu kiap?”

Putu kituk-kituk. “Minum yéhé malu,” Putu nanjénin mapan tepukina téh di duur méjané nu tileh. “Antiang kejep nah, lakar manjus malu.”

“Nah, lautang. Laras nu perlu maraosan ajak  i mémé.”

Sambilanga mentas di rurungé ané mabatu-batu di betén punyang tiingé, Putu marasa lakar ngancan sukeh nerangang tekén Laras unduk pikobet ané lakar arepina ajak dadua. Laras sinah tusing nawang yéning sujatiné ia ajak Laras buka sedeng majujuk di abingé.

Putu ngénggalang manjus disubané netepang kenehné tusing ja lakar nanggehang buin urusané ené. Ia mautsaha ngedénang bayu. Kahanan apa ja lakar tepukina lakar arepina. Mumpung tondén ja bas tegeh mamongkod, yadiastun ulung tusing ja lakar sangat ngrasaang sakit.

Mulih uli pancoran Putu maplengek di natahé. Maimbuh buin abesik ané bareng ngorta di ruang tamu. Tusing ja Laras lan méméné dogén nanging ada Damayanti masi ditu. Putu nyapa Damayanti nganggon panganjali tatkala liwat di ruang tamu ngojog kamarné. Tusing kakeneh baana ngudiang Damayanti semengan sajan suba teka ka umahné. Ngéncolang ia masalin baju laut bareng negak di ruang tamu. Mara lakar matakon sagét Damayanti ngmalunin ngaraos.

“Ampura yén tiang ngulgul, ulesné Putu lakar luas?”

“Nggih, wéntén napi?”

“Tiang tuah mapitau, buin nyanan ten nyidaang bareng muruk. Tiang lakar ka Denpasar, bapak tiang ngamar di rumah sakit.”

“Nggih, ten kenapi. Dumogi bapak gelis kénak.”

“Suksma, tiang pamit dumun.”

Damayanti bangun uli kursiné. Buka ada sayong nutupin semitané. Krana reramané masuk rumah sakit apa krana ané lénan? Putu marasa tusing luung kenehné. Nanging ia tusing bisa ngaraos apa-apa dugas ngatehang Damayanti menék ka mobilné.

Mabalik ka ruang tamu Putu lantas ngorahang ajak méméné lakar malali ajak Laras. Nanging Putu ngon nepukin Laras sagét nyebeng. Jani muané Laras ané kaliput sayong.

“Laras sakit?” Putu matakon disubané menék ka mobilé.

Laras mendep. Ia nyadahang tunduné di tongosné negak di samping Putu. Paliatné joh.

“Kija jani?” Putu buin matakon sambilanga nyalanang mobil adéng-adéng. Sakéwala Laras tusing masaut.

“Yén oléh-oléhé kuangan lan ka Sukawati.”

“Laras makita ka Batubulan.”

“Oh, kéto... ayuk...” Putu ngenjek gas mobil. “Buin pidan lakar balik ka Jakarta?”

“Bli suba med nimpalin Laras?” Laras mabalik matakon sada kenyat.

Putu engsek. “Laras kénkén ené? Putu kan matakon melah-melah?”

“Sing ada lénan kén to takonang?” Paliat Laras leser ka malu cara tusing makita nolih gobané Putu.

“Nguda sing, nanging Laras siaga sing ajak Putu maraosan seken?”

Laras matolihan. “Unduk apa?”

“Unduk iraga.”

“Iraga jak telu?”

Putu maplengek ningehang patakon Laras ané soléh. Miribké Damayanti ané ngarusuhin papinehné, ané ngaé tangkepné nadaksara malénan.

“Laras,” Putu ngaraos seken. “Ené sing ada kaitané ajak nak lén. Ené unduk iraga ajak dua.”

“Iraga jak dua? Ada apa?”

Paliat Laras buin leser ka malu, nanging yéh paningalané ngembeng.

“Laras seken sing nawang apa mapi-mapi sing nawang?”

“Laras matakon, ada apa? Ento nyiriang Laras tusing nawang. Nguda dadi Bli sangsaya buka kéto?”

“Laras seken sing nawang yéning lakar ada masalah?” Putu ngomong disubané ngunjal angkihan. “Laras seken sing nawang yéning ada témbok ané ngalingin iraga?”

Laras makipekan tur nengneng Putu. “Témboké ento tuah ada di paningalan anak ané ngelah papineh cupit,” ia ngaraos nyimbing buka suba nawang ané ada di papinehné Putu.

“Iraga pada-pada nak Bali kéwala malénan wangsa. Laras sing tangeh yéning ento lakar dadi pikobet?”

“Oh, dong kéné caran Bli apang nyidaang ngejohin Laras?”

“Adi Laras ngomong kéto?”

“Laras nawang isin keneh nak luhé totonan uli kijapané.”

“Déwa Ratu, Laras ngomong apasé? Putu sing ada urusan apa-apa ajak nak luhé totonan.”

“Bli eda bogbog. Yén sing ada urusan apa-apa ngudiang ia semengan suba nekain Bli?”

“Laras kadén suba ningeh apa ané raosanga?”

“Nanging Laras nawang lebihan tekén ané orahanga.”

“Oh, kéto. Yén saja Laras dueg mamaca kenah anak, benehné Laras nawang nyén sujatiné ané tresnain Putu. Nguda dadi sangsaya?”

“Ené ulian Bli padidi. Ngudiang ngrasoang pikobet ané tusing karuan ada yén sing ulian ngelah keneh lén?”

“Dingehang Laras, Putu tuah ngidih apang Laras siaga natak pikobet ané lakar nepén. Ento sinah tusing lakar dadi kelidin.”

“Ah, simpen gén suba padidi pikobet ané pinehin Bli. Laras sing demen ngraosang unduk ento.”

Mara Putu nawang yéning Laras sujatiné keras ati. Saja ngenah kalem di sisi, tusing pati pesu munyi, nanging acepok pesu munyi mangan sajan bisa natunin keneh.

Putu nglékokang mobil ka Taman Ayun, obyék wisata marupa pura ané kaiter baan telaga linggah. Pura ané koné kawangun dugas kadatuan Méngwi sedeng jaya énggal liwatina. Mobilé terus malaib ngliwatin jalan ané kaapit baan carik ané ngaé pemandangané nglangenin. Tusing makelo lantas liwat di désa-désa tongos anak ngaé ukir-ukiran paras lan kayu. Ada masi makudang artshop ané ngebérang lukisan lan baju kaos.

Teked di Batubulan Putu matakon, “Dija lakar singgah?”

“Terus gén, satondén punyan plamboyané ento,” Laras nujuhang limané.

Sebeng Laras suba masalin. Yén ibusan putek latek jani ngenah masunar terang, Apa ané makrana tusing kapineh baana tekén Putu.

“Laras kal meli apa?” Putu matakon pas ngrérénang mobil di tongos parkir. (masambung...)

Ketut Sugiartha
embas ring Baturiti, Tabanan, 9 November 1956. Kakawiannyané ring basa Indonésia sampun kawédar ring Bali Post, Bernas, Detektif & Romantika, Kartini, Media Hindu, Nova, Sarinah, Selecta, Senang, Simponi, Sinar Harapan, Suara Karya, Suara Pembaruan miwah média sané lianan. Pensiunan sinalih tunggil BUMN ring Jakarta puniki mangkin meneng ring Banjar Beringkit, Belayu, Tabanan.