Matching

Olih: I Gusti Lanang Sutéja Naréndra

Sumber Gagambaran: id.pinterest.com

Kurenan tiangé mula pemilih unduk panganggo. Apa ja ané saluka, ugi apang matching koné. Modél, warna, aksésoris, uli baduur kanti tatakan batisné ugi apang matching. Yén sing kéto, bisa buung luas.

Ibi tiang luas kundangan ngantén. Piiih, déwa ratu payasné lebihan tekén ia ané ngantén. Suba menék magandéng ka ondané, ia ngaraos éwa.

“Stop... Stop... Stop Bli!”

“Apa buin kuangan?”

“Masker!”

Tiang nyeledét di spioné, laut masaut,

“To, kadén suba nganggo!”

“Iiih... Sing matching! Masak brokat warna barak nganggo masker biasa?”

“Men... Masker apa anggo?”

“Masker brokat warna sama lah. Icang ngelah masker brokat warna sama. Apang matching!”

Ia gagésonan tuun uli ondané, nyemak masker baru. Piiih... Saja, matching makejang. Masker, brokat, senteng, kamben, kanti sandalné matching. Éh... kebenné masi matching... Déwa ratu!

Di margané ia ngaraos di samping koping tiangé,

“Patutné yén mapayas suba matching buka jani ugi menék mobil. Masak magandéng? Nyanan makebur pedesel Icangé, Bli tanggung jawab!”

Mimih, jani mobil tagihané I Luh. Celekotokané... Kadéna tiang dadi diréktur mirib? Gerimutan basang tiangé nyautin,

“Yén meli mobil, warna apa beliang apang matching?”

Sing sautina raos tiangé wiréh toliha muan tiangé uli spioné suba barak bihing.

Neked di tongosé kundangan, I Luh nyemak sprit dingin. Ditu ia maneman ajak anaké ngundang. Lakar nyiup sprit, maskerné kelésa. Mapelapan pesaja ia nyesep pipétné takut énciné nyelobor. Piiih... Mara tiang tatas nolih, kuting énciné masi matching. Déwa ratu...

“Piiih... Bu Luh ber awét muda. Enu jegég sada kekinian buka anak bajang jaman now!”

Anaké ané ngenemin ngajum I Luh. I Luh nyemak tisu, ngetul bibihné suut nyedot sprit. Taagné tahananga apang sing mamunyi, mawinan makebingan song cunguhné. Lega pesan kenehné kajumang, lantas ngajengit kanti bucun bibihné enteg ka koping.

Tiang makesiab, dewa ratu... Ada ané tusing matching, gigi palsuné sapina nyaluk... Longgong cara pagehan tomplok godél... Celekotokané...

Anaké ané nganemin simpatan, prajani nyaruang nyiup sprit... Badah... Botolné puyung... Srupuuut...

“Ampura tiang ka WC jep gih,” kéto raosné nangges kedék bedah ka tundu.

I Luh manggutan makenyem, ia marasa suba matching.

(Macang Rumah Cinta Seribu Jendela)