Lawat-lawat; Tresna

Olih: IGA Darma Putra

Sumber Gagambaran: id.pinterest.com

Apa madan tresna?

Makejang anaké suba ngelah tetampén ngundukang tresna. Ané lumbrah, tresna ento ngelah ciri-ciri buka kéné: Sabilang tepuk lawatné dogén, kenehe suba sriat-sriut dot ngelahang. Ngidem kedat, tuah muanné ané marawat. Apa ja ané orahanga sing taén nyakitin kuping, tetep luung dogén dingehang. Orahina kéné jeg nyak, orahina kéto jeg nuut. Pokokné sing ada ané lénan, only you dear. Kéto katuturan anaké ané kena panah Sang Hyang Kama.

Kasuén-suén, Dear ento bisa ilang. Mabalik guminé rasang dadi naraka, yadian sujatiné tusing taén tawang apa madan kéto. Matanainé dadi nyangetang kebusné wireh macaplagan ajak kebusbaran keneh awaké padidi. Sabilang dingeh dogén adanné, suba makita makelid joh apang tusing tepuk. Pokokné harus ngelidang awak sig ané lénan, there isn’t only you anymore. Kéto katattwan anaké ané mara ngeh panah Kamané ngaba tatu ané tusing ilang-ilang.

Sajan buka satuan anaké tua-tua, apa ané rasang jani tuah akijapan mata, asledétan tatit. Sing ada ané langgeng cara di pangrumrum kakawin-kakawiné. Makejang ento menang di satua. Jelé melah, demen sebet, makejang maganti-ganti. Wiréh terus maganti-ganti, to karanané liu anak ngorahang idupé cara pitehan rodan montor. Madak tusing bedah ban montoré ento!

Yadian ulian tresna terus ngarasang jelé melah, sing ada anak med mapiteh ditu-ditu dogénan. Tetep anaké dot ngelahang ané demenina. Tetep anaké ngutang ané suba gelahanga. Terus malincer buka kéto, tusing pegat-pegat cara munyin ombak pasihé. Terus ia makuus di kupingé, cara kuusan angkihan iragané.

Idepang tresnané cara rujak, sing taén dingeh anaké kapok ngajeng rujak ulian ngarasang lalah tabiane. Justru lalahe ento ané ubera kanti ngalindeng buduh paling ngalih dagang rujak. Apa buin jangkep makejang rasané ada di rujaké. Misi pakeh, masem, lalah, manis, sepet, pahit. Makejang rasané ento campuh dadi besik ngalekadang jaen. Sajan rujaké cara campuhan rasa.

Suba masih liu iraga maan satua, di campuhan ento tongos malukat. Nglukatin ané boya-boya, ané daki-daki. Dakin awaké ané kasar, apang kedas aji yéh. Dakin awak ané alus, apang leh masih aji tirtha. Makejang ento pesu mulihné di keneh. Yén dot ngelehang awak alus, apang seken kenehé ané lukata. Anyudang aji angkihan ané degdeg pesu mulih. Anak sing ked bersih yéhé kanti ka tengahan kenehé ané paling dalem.

Keneh ané biut mulan luung yén maan malukat di campuhan rasa. Cara ngajeng rujak, katungkul ngelekang jaené, engsap tekén lalahné. Mirib kéto masih yén iraga ngalukat keneh aji gambelan, kidung lan sasolahan. Gaéna apang iraga kalangen nepukin sledétan praginané ané natit nusuk ati. Kéto masih kupingé embana apang nyak dayuh ulian ningehang laras pélog seléndro matiti pitu. Ditu lantas ilang iraga uli jagaté ané biut, ulian maan panglukatan keneh aji sasolahan.

Ento suba bukti, idupé mulan kategul baan rasa. Ia negul, ia masih ane anggo ngelésang. Idupé mulan cara anak makancing di gedong batu.

IGA Darma Putra
embas lan magenah ring Bangli. Kakawiannyané kawedar ring makudang-kudang média, minakadi Bali Post, Pos Bali, Tatkala.co, Suara Saking Bali, miwah sané lianan.