Lawat-lawat; Sing Saja!

Olih: IGA Darma Putra

Sumber Gagambaran: www.davidsongalleries.com

Jani nyén gén orain nutur pasti jeg maluab cara pasih sunami. Eda ja mara ané di sakala, neked ané di niskala bakat baan nyatuang. Di niskala koné ada kéné, ada kéto. Nyidayang ngorahang kéto masih ulian ningeh tutur. Sing taén kros cék, apa beneh apa pelih tuturé ané bakat padingehang ento.

Iraga masih demen ngenehang ané niskala-niskala ento. Yén ada anak nuturang sarwa ané mabo niskala, jeg pasti degeng kupingé ningehang. Matané kanti engsap makijapan. Awaké engsap makrisikan. Sarwa tutur ané nuturang niskala mulan ngalangenin. Wiréh makejang ento ada di wates paningalan iragané. Wireh wates, ia cara ada, cara tusing ada. Mesib cara lawatan di samping paningalané.

Di samping paningalan iragané, ditu ada wates galang ajak peteng. Ditu makejang dadi saru. Nyansan uber apang tepuk ané saru ento, nyansan tusing ngenah. Apa ané ngaranayang kéto? Tuah sing ada lén, ulian iraga ngaba lampu galang adadua. Lampuné ento madan mata. Ané saru di samping-samping ento, yén kipekin prajani dadi galang. Sing buin ada rasa-rasa seken-sing seken. Makejang pokokné ané tepukina tekén matané, ento madan seken.

Suba lantas kéto, ada ané tusing tepukina tekén matané apa ento madan tusing seken? Ada conto ané tusing nyidang tepuk baan mata, luiré: angin, angkihan, entut, munyi, msl. Sing ada anak bani ngorahang anginé tusing ada. Apa buin kanti bani ngorahang angkihan tusing ada, jelas suba tusing ada bani. Entut tusing masih magoba, kéwala yén ento bakat adek, sing bani iraga ngorahang tusing ada. Munyi masih tusing bakat baan ningalin, kéwala iraga percaya munyi ento ada. Iraga cumpu makejang ento ada, yadian tusing pelud baan nepukin. Ento awinan, cutetné tusing karoan makejang ané tusing tepuk ento tusing seken-seken ada.

Agama masih patuh cara paningalan iragané, wireh makejang ané tingalin di guminé dasarin baan agama. Makejang ané tepukina baan matan agamané bakat orahang beneh. Makejang ané sing tepukina, bakat orahang pelih, tusing saja, nguluk-nguluk, bogbog.

Agama ané anggon iraga muktiang para Déwata, Bhatara, Hyang Widhi ento ada. Sakéwala, agama tusing nyidayang ngédéngang kénkén goban Déwata, Bhatara, Hyang Widhi ento apang nyelebongkot di diepan matan agamané. Yén enu iraga kukuh, sinah iraga lakar ngorahang agama tusing neked di Widhi. Yén cara mata, agama ento tusing nyidang nepukin angkihan. Nyén bani ngorahang agamané suba paling beneh, paling saja?

Ada masih katuturan agama buka kéné. Makejang ané ada di guminé ené, dasarné tuah abesik. Ané abesik ento dadi dadua. Ané dadua dadi telu. Ané telu dadi liu. Wiréh ané ngorahang kéto tuah sastra agama, iraga jeg anggut-anggut matutang. Ané abesik ento orahang iraga Widhi. Ané dadua orahang Purusa-Prakerti, Luh-Muani. Yén sing ada luh kalawan muani, éngkénang caran iragané apang lekad di guminé? Buina luh-muani ané kénkén sujatiné ané paling sik maluna idup di guminé? Apaké cara anak Bali, anak India, anak Éropah, anak Amérika, anak Afrika, anak Asia, anak Australia?

Monto malu satua kutang-kutangé. Jeg seken munyiné maluab cara pasih sunami. Makejang ané ningehang bareng ajak anyud. Ané anyud sing ané ningehang dogén, neked ané ngomong masih anyudang munyinné padidi. Ulian anyudé ento, patikaplug tur tusing inget tekén apa ané raosanga. Prajani ngorahang engsap. Prajani ngorahang sing ada manusa ané sempoérna. Engsap, mulan bebekelan uli kadituan. Bekelé ditu aba dini.

IGA Darma Putra
embas lan magenah ring Bangli. Kakawiannyané kawedar ring makudang-kudang média, minakadi Bali Post, Pos Bali, Tatkala.co, Suara Saking Bali, miwah sané lianan.