Bongkling (CCIII - CCX)

Kaketus saking manuskrip duwén Ida I Déwa Gdé Catra Karangasem

/203/

Gusti Agung mangandika,

mené cahi saking napi,

pajalané hulat héncong,

hutusan aglis nyahurin,

bangras hadéng mangatih,

tityang mariki kahutus,

antuk raja di Mekah,

mamantes kayun I Gusti,

lamun purun,

gelisang medhal mayuddha.  

 

/204/

Suwé sampun Gustin tityang,

ngati-hati kamedalin,

kangkat ida suwé ngantos,

yan I Gusti pinda ajrih,

becik manunas hurip,

tur ngaturang pamintuhu,

yan boya sapunika,

becik pyanak lawan rabi,

pacang katur,

ring ida raja di Mekah.

 

/205/

Gusti Agung Pamamoran,

déréng dané manyahurin,

kari ngiketang pangrawos,

mangdé pasahuté becik,

Gusti Kancanasari,

Wayan Tuban Tambakgangsul,

I Gusti Alit Séma,

raris dané manyahurin,

buka busbus,

munyiné twara majangka. 

 

/206/

Né iba padha hutusan,

mahi nyelap mangajahin,

I Gusti tundén manyoso,

buwin nagih panak rabi,

yén iba pisan bani,

sadhyayang jani mangamuk,

kahi nandingin iba,

nah hené pisan timpalin,

yadyan tundun,

dhadha sing pilih kasiddhan. 

 

/207/

Hutusané ndengkik makrak,

né iba teka nyahutin,

twarada anak matakon,

buwin managih pilihin,

tekan kahiné mahi,

twarada kahutus ngamuk,

baan raja di Mekah,

yén kahi kapangandikain,

pacang ngamuk,

i tuni iba nyulémpang. 

 

/208/

Gusti Wayahan Tuban,

Tambakgangsul ngunus keris, 

bangun mabuddhi manggorok,

bawong hutusané sami,

Gusti Kancanasari,

hidhepé pacang manarung,

hutusané makejang,

hutusan serab matangi,

dadi humung,

sami mametek danganan. 

 

/209/

Gusti Agung mangandika,

mendep juwa malu cahi,

twarada pragat ban kéto,

manegak jwa malu cahi,

Gusti Kancanasari,

Wayan Tuban Tambakgangsul,

sampun sami manegak,

raris mangawugang keris,

Gusti Agung,

malih dané mangandika.

 

/210/

Wé cahi padha hutusan,

kema malipetan mulih,

haturin dané mangantos,

bapa pacang manimpalin,

sakayun Gustin cahi,

hutusané raris mantuk,

sampun rawuh ka pondok,

sang prabhu kari katangkil,

sampun katur,

sabikasé di bancingah.

 

 (pacang kalanturang...)