Bedak

Olih: I Gusti Lanang Sutéja Naréndra

Sumber Gagambaran: carnetimaginaire.tumblr.com

“Bli Yan, sujati tiang buka yéhé ning, boya sprité dingin,” kéto simalu chat né I Luh tekén tiang. Sing wales tiang.

Suba muka telun tiang saling pendepin, puik pisah ranjang. Suba muka telun masi tiang sing mulih. Apang boyanan panes basangé nolih kurenan setata munju cara bungut lélé nangal tabya kerinyi. Apang asanina ditu, dong nyak ndasné dingin padidiana, kijep-kijep sing ada nundikin. Sengal-sengal cara mujahir katungin, enggang-engep, poloné!

Buin masuk chat né. “Yéh ning, amun kén ja bahan Bli ngocok, setata dedeh, dangsah buka biasané.”

Apa ya lakar raosné, ber mekulit cara bawang. Pelut, bin tepuk kulit, pelut buin kulit... Piiih...

“Yéning sprité dingin, kocok gigis pasti ngarodok, ngemasin botolné macedar.”

Enu tiang dadi pembaca setia. Mirib dua centang biru, ngeranayang ia sayan semangat ngirim chat. Tawanga tiang mamaca.

“Saja, sprité luung anggo ubad bedak. Sakéwala akejep, kelang kolongané. Pamragat, yéh ning ané ngilangang bedaké. Buina yén Bli kereng nahar sprite, gula darahé menék. Yéh ning anggo panawar. Sing kéto?”

Enu masi tiang mamaca, ngantiang kija lakar tatuek raosné I Luh. Suba dayuh mirib panes basangné, mawanan beber slow raosné. Tanda-tanda nénénan!

“Suba muka telun, yéning Bli bedak, mai mulih. Jumah yéhé ning, mawit klebutan di muncuk gunungé. Terjaga alaminya, dari sumbernya sampai ka tangan anda!”

Glek... tiang katos magelekan buka nguluh medang. Kelang kolongané. Tiang bedak. Gagésonan tiang nyetater onda, kajaplek ajak Dik Stévy ané ngaba sprite dingin madamuh ngetél.

“Lik, Yan...” kéto dogén ia nyapatin, limané gagang kado. Ondan tiangé ber macuet.

Neked jumah, I Luh mogbog. Orahanga déwékné yéh ning, sujati ia arak macampur coca cola. Kocok gigis, ber ngarodok malongkah, tiang punyah!

(Macang Rumah Cinta Seribu Jendela)