Masukit

Olih: I Gusti Lanang Sutéja Naréndra

Sumber Potrekan; pixabay.com

Mapotrék rikala masukit covid adalah wajib hukumnya. Apang ada ortaang di pisbuk, apang viral, misi lantas legan kenehé ber médsos.

Mirib kéto isin keneh kurenan tiangé, mawinan ber saat pesaja ia mapayas lakar luas masukit. Énciné tebel, pupurné tebel, alisné tebel. Biasané yéning ngatehang pianaké I Wayan lakar masukit, pragat madaster dogénan. Jani... piiiihhhh... payasné luihan tekén lakar nyambut Jokowi!

Nyényé pesaja ia nundén tiang motrék dugasé masukit.

“Melahang motrék, Bli!”

Tiang iteh ngéker. Tunggang-tungging, jangkak-jongkok cara anak mamejen.

Cekrék... Cekrék... Cekrék...

“Stop Bu Suster, tondén pas éngkelné!”

Perawaté tengkejut. Ia majadengan bingung. Jaum suntiké suba nganggar, buung suntikanga wiréh I Luh ubah posisi,

“Apang nyak féminim ngenahné Bu! Maaf, ini kenangan sekali seumur hidup. Harus diabadikan!” kéto alasané I Luh. Ada nang ping molas ia ganti posisi, perawaté masi séréha apang berpose manut keneh gelahné. Ambat gerimutan basang perawaté ento, mirib yén dadi, makita ia nyuntik formalin tendasné! Celekotokané....

Antréané suba ramé pesaja. I Luh tondén pragat mapose. Perawaté berangti, “Ampun Bu? Tiang semutan niki nganggarang jaum ten payu-payu!”

I Luh nongos. Lantas suntika. Clekis...

Ngénggalang tiang motrék. Cekrék...

Badah... Bibihné I Luh sedeng kijem. Ilang jegégné. Celekotokané!

Ada masi luungné ngelah médsos. Biasané kurenan tiangé nyebak engger ngatitem dugasé masuntik di Dokter Japa. Jani ulian lakar ngapelud potrékan di médsos, nyak kuat ia masukit. Piiihhh... Mirib ené ané orahanga De Power Op Médsos!

“Kén potrékané ané luung Bli?” Matakon I Luh tekén tiang sambilanga ketal-ketul malinin potrékané di hapéné. Néh, merangkap jani gaén tiangé. Dadi ojék, dadi potografer, jani dadi konsultan gaya. Mbééé...

Suba ada telung dasa menit konsultasi, pocol tiang maang tetimbang. Pameragatné piliha poto ané pinih luunga (manut keneh gelahné). Fotoné ento: Perawaté nganggar nyuntik, I Luh negak makenyem, batisné matumpukang, posisi badan ka kaméra agak miring sedikit, lantas jeriji tujuh ngajak linjongné ngacenggir. “Piiisss...” kéto munyiné dugas mapotrék, kuala sing pireng di potrékané.

Tusing makelo, maklening hapé tiangé. Ada pemberitahuan di pisbuk, “LoéhGéx Cuantiq Muanizzimutzz memperbarui statusnya.”

Ngénggalang tiang mukak pisbuk.

“Divaksin dulu gaés, clekis...” kéto képsiené misi potrekané ané piliha busan. Piiih... Sepanan tiang nolih, laik, love, wow, haha, ber magrudugan. Ternyata liu I Luh ngelah penggemar.

Neked jumah, mara enteg di natahé I Luh ngaku nyelé ati.

“Aduh, Icang puruh Bli. Sirahé sakit, paad, kokohan, sesek angkihané... Aruuuh... Mati Icang jani!”

Mbééé... Éwa tiang ngelut ngarampa I Luh. Inget tiang tekén beritané di tivi unduk anaké ané positif covid ulian suud mavaksin. Néh... Dong dayan... Jani gantiné tiang sengakala. Bes mara tunyan kurenan tiangé seger oger misi sélfi, jani ber ngaku nyelé ati... Mimih... Déwa Ratu!

I Luh magandong mulihan umah, lantas masaré masaput mabudel. Satondén tiang pesuan kamar, I Luh ngaraos adéng-adéng tambis sing dingeh,

“Bli, orahin pegawé LPDné ané ngantiang di ampiké apang mulih. Orahang Icang gelem covid!”

(Macang Rumah Cinta Seribu Jendela)