Lawat-lawat; Seman Munyi

Olih: IGA Darma Putra

Sumber Gagambaran: www.pinterest.com

Munyi ané suba kadung ngetél cara yéh ulung ka tanahé, tusing lakar ngidang nuduk buin. Wiréh ia suba nyusup ka akah punyan-punyanan ané ada ditu. Bisa dogén ia suba nyluksuk ka akah padang gajahé, laut padangé ento amaha tekén sampiné, raris sampiné aturang ka pura lakar anggon upakara. Ditu iraga buin ngaturang munyi ring ida bhatara. Iraga ngorahang lakar naur piutang aji banten Tawur. Mantra aéng-aéng pesu kéwala isin bantené nyaplir ajak mantrané. 

Munyi tusing taén mati, wiréh ia idup di keneh anaké ané ningehang munyiné ento. Nyak ia demen, nyak ia tusing demen, musti munyiné enu idup ditu di kenehné. Yadiastun munyiné idup, iraga tusing nawang éngkén goban munyiné ento. Apaké enu munyi ento gobané cara dugasé mara pesuang, apaké ia suba masalin rupa dadi basang gedeg? Apaké dadi rasa demen, tusing masih tawang.

Munyiné orahanga mangan tur ngidang natunin keneh. Tusing ada anak nawang kénkén goban keneh. Ambunné masih tusing ada nawang, nyak ia miik apa bengu. Rasan keneh apa buin, neked jani iraga tusing nawang apa keneh ento marasa lalah, pakeh, masem, tawah, sepet apa kénkén. Yadiastun iraga tusing nawang kénkén sujatinné gobanné, ambunné, rasanné, iraga tetep ngorahang bisa natunin keneh. Wiréh keneh ento bisa tatunin aji munyi, munyi masih anggo ngubadin. 

Apang ngidang munyiné anggon ngubadin keneh, patut munyiné ento misi bayu. Patuh cara anak ngusadhanin, makejang sarana usadhané acep-acepin aji munyi misi bayu. Yén sing kéto, kuang yahud usadhané. Musti upin-upinin bedik. 

Kéto pakilitan munyiné ajak keneh lan bayu. Buka telu ento sakti. Bayu ané ngidang ngaénang makejang ukudané idup. Mata ngidang makijapan, batis ngidang matindakan, kuping ngidang ningehang, lima ngidang matayungan, makejang ento ulian ada bayu. Bayu ané ngurip awak iragané. Yén ada umah anyar, apanga maurip, isinina rajah dasa bayu. Umahé ento mantranina aji munyi. Tur munyin mantrané apang pasaja, dulurin pangidep ati. Apa madan pangidep ati lénan teken keneh.

Wiréh munyi ento sakti, liu sastrané ngajahin apanga iraga melah-melah ngadut munyi. Tusing dadi ngawag mesuang. Munyi ané ulah-ulah pesu, tusing masaring aji keneh, ento ané lakar natunin keneh anak lénan. Mulan saja seman munyi tusing ada, kéwala sing kuangan anak ngusing sema ulian munyi.

IGA Darma Putra
embas lan magenah ring Bangli. Kakawiannyané kawedar ring makudang-kudang média, minakadi Bali Post, Pos Bali, Tatkala.co, Suara Saking Bali, miwah sané lianan.