Tapakan Ayuning Jagat

Olih: JM Pande Putu Alit Antara

Gagambaran Manik Sudra

Nénten wénten sané uning indik peduman hidupé iriki ring mercepada. Sakéwanten iraga patut mautsaha sané becik mangda karma sané becik taler kebakta bénjangan nincap sunia loka. Indiké punika sekadi kalakonin olih Mémé Darma, ipun akidik nénten menyet lakar dados tapakan, ngiring Ida Betara Turun Kabéh. Sadina-dina ngemargiang pawisik Ida Betara Turun Kabéh, majeng ring para jatma sané ngerauhin ka umahnyané ring désa sané magenah ring wewidangan Bangli. Akéh para jatmané sané sampun presida katulungin olih ipun. Wénten nunas tamba, nunas mangda madué oka, nunas pemargi napi sang atma sané pacang keabén wénten madué sesangi sekari ring mercepada, nunas kekasuban miwah kewibawan mangda tetep dados pejabat, miwah sané sios-siosan. Sampun penyiunan jatma  sané wénten sejebag jagat Bali sané sampun kaicén pitulungan, mangdané kekobetan prasida ical saking soang-soang jatma punika. Punika mawinan Mémé Darma kaloktah tur kewastanan Tapakang Ayuning Jagat.

Sedéréng Mémé Darma dados tapakan nyungsung Ida Betara Turun Kabéh, kalintang pisan kakobetan sané panggihin ipun ring mercepada, napi malih ipun kemaduang olih kurénanné. Mémé Darma ngelah pianak kalih diri, sané kapertama keadanin Gedé Darma miwah sané nomer kalih keadanin Madé Sekar, punika mawinan ipun kaloktah kesambat Mémé Darma olih brayannyané ring désa. Mémé Darma ngelah madu buin kutus diri, ento mekada sering pisan  wénten biyuta ring madun-madunnyané. Minabang samian sampun uning sapunapi polah palih anaké sané memadu, setata biyut yéning nénten presida silih sinunggil manahnyané nénten prasida keapti. Napi malih kurénanné nénten meduwé arta berana akéh, wantah meduwé tegak pekarangan akidik miwah asikut tegalan. Kurénanné wantah ngandelang ngerereh kekaryan ring marginé, dados sopir angkot, sané trayéknyané  saking désa ka kota. Punika mawinan kauripan ipuné sareng kurénan-kurénannyané pas-pasan. Kurénan ipuné sane memadu ngerereh pekaryan sané sida kekaryanin, minakadi wénten sané memuruh numbeg ring carik, memuruh dados pengayah tukang bangunan, medagang metanja, memuruh nyuun ring pasar, miwah sané sios-siosan.

Wénten pengalaman hidup Mémé Darma sané nénten presida kaengsapan, sadawegé durung dados tapakan. Rikanjekan Mémé Darma rauh saking tegalan ngaba saang apesel jagi anggona malebengan di paon. Tan dumadé wénten maduné galak tur sahasa bangras ngeraos, “ih nyai ané sayangana pesan tekén  I Beli Jentol! Apa nyai ngaba guna jarang guyang? Kanti kurénan icangé buduh paling tekén déwék nyainé!”

Kecawis olih Mémé Darma, “Mbok, da ngomong kéto! Tiyang ngantén mai ulian demen tekén I Beli Jentol.”

Digelis kesautin olih maduné, “badah nyai ajaan jelema Luh belog, ujang nyak ajak anak muani ané suba ngelah kurénan ah!”

Kecawis olih Mémé Darma, “minabang suba pejatu karman tiangé memadu ajak mbok, men mbok dadi nyak masi ngenyakin anak muani ané suba ngelah kurénan, apa mbok mapi-mapi sing nawang unduk?” Mara kéto pesautné Mémé Darma, nyajaang pesu gedeg basang maduné. Sahasa nyambak bok tur nyekuk baongné Mémé Darma, tur digelis kepantigang di tanahé. Suud kepantigang buin kelantig aji kayu saang sirahné olih maduné. Tan dumadé Mémé Darma kablinger ngelantas pungkat tusing inget tekén pedéwékanné.

Mémé Darma ngemasin mati, ditu maduné kaejuk olih warga désané kaserahang kakantor polisi. Ring kantor polisi setata maduné uyut tur gelur-gelur ngeling tur kedék. Ditu petugas polisiné ngaba maduné ka rumah sakit jiwa di Bangli, sawiréh ketarka kena penyungkan buduh, mangda presida gelis waras.

Sawané Mémé Darma suba kagenahang ring balé dangin. Kulawarga kurénané suba siaga ngaénang upakara miwah sesajén pacang keanggén upacara mendem sawa ring sétra. Tan dumadé kulawarga kurénané miwah désané makesiab ajak makejang, seantukan buin telunné Mémé Darma kepanggihin kléjat-kléjat di balé dangin. Ditu kurénan miwah kulawargané ngungkabang saput sawané, tan dumadé Mémé Darma nyidayang bangun malih uling baléné tur nyidayang mejalan sekadi jati mula.

Sesukat ento Mémé Darma seneng madéwasraya maturan ka pura-pura sad kahyangan sané wénten ring sejebag jagat Bali. Minakadi Pura Besakih, Batur, Lempuyang, Uluwatu, Pulaki, Melanting, Pucak Mangu miwah sané sios-siosan. Seantukan sering madéwasraya, punika mawinan Ida Betara mapaica waranugraha. Wénten kapaica keris, batu-batu permata, miwah sané sios-siosan. Paica sané mautama kapolihang merupa batu permata utawi manik sané kewastanin manik astagina, paican Ida Betara sané malinggih ring Pura Uluwatu. Manik punika mewarni putih keabu-abuan. Duk meduwé paica manik punika, Mémé Darma sampun kajudi dados tapakan. Makejang para jatmané sané rauh nunas pitulung, kaicén wangsuhan manik astagina miwah kaicénin piteket-piteket manut pawisik sané kaicén majeng ring Ida Betara Turun Kabéh.

Naenin Tapakan Ayuning Jagat nyeritayang indikné presida mewali maurip sedaweg sampun padem duké dumun. Duk punika serasa ngipi, nepukin pondok meraab gelagah tur kajaga olih anak istri. Sabilang jagi macelep ka pondoké punika, nénten kaicén olih anaké istri sané wénten irika. Anaké istri  sané nyaga pondoké irika ngorain  mulih, seantukan pianaknyané buka dadua ngeling sigsigan di mercepada. Ditu anaké istri nujuin margi ngeliwatin pangkung apang presida mewali mulih. Mémé Darma nuutin piteket anaké istri punika, di gelis Mémé Darma nuju pangkung punika. Disisin pangkungé Mémé Darma katekain olih kekalih asu. Asiki asuné mewarni putih, sané malih asiki mewarni selem. Kekalih asuné punika matenggek raksasa. Selantur ipun kekalih asu punika nyemakang jan mangda meresidayang ngeliwatin pangkungé. Malih jebosné Mémé Darma ngenjekin jané ngeliwatin pangkungé. Sesampuné jané kaliwatin olih Mémé Darma, tan dumadé ipun éling malih ring mercepada, wit sampun padem mewali maurip malih. Yéning sané mangkin ka bawos mati suri ring dunia kedokteran modérn.

Kasidiyan tapakan ayuning jagat sampun kasub ring jagat Bali, akéh sampun para jatmané sané meduwé kekobetan katulungin olihnyané. Sakéwanten ipun ngemargiang pitulung majeng ring para janané nénten dados rahina pasah miwah rerahinan pujawali ring pura-pura kahyangan jagat. Seantukan ipun seringan nangkil madéwasraya majeng ring Ida Betara Turun Kabéh.

Wénten malih pawisik sané patut kelaksanayang olih Mémé Darma, duk Mémé Darma  tangkil ring Pura Pulaki Buléléng, mangda nyemput adiné sané wénten ring jaba Pura Pulaki. Digelis Mémé Darma ngojog jabaan Pura Pulaki. Ditu katepukin anak istri makulit putih mabok pirang, anaké istri punika wantah blasteran, méméné asalné saking Jawa miwah bapané asalné saking Belanda. Anaké istri punika taler seneng madéwasraya nyungsung Ida Betara Turun Kabéh, measal saking Tengger Jawa Timur.

“Apa betul ini kakak saya yang bernama Tapakan Ayuning Jagat? (napi patut puniki embok tiyangé sané mewasta Tapakan Ayuning Jagat?),” sapunika raos anaké istri sané wénten ring jaba Pura Pulaki.

Kecawis olih tapakan Mémé Darma, “benar sekali, kok tahu nama saya? Anda siapa? (patut pisan, kok uning adan tiyangé? Ragané sira?).”

Digelis kecawis malih olih anak istri sané ring jaba pura, “saya tahu berkat petunjuk dari Ida Betara Turun Kabéh, disuruh menunggu disini dan harus memanggil kakak tapakan (tiyang uning saking pawisik Ida Betara Turun Kabéh, kanikayang ngantosang driki miwah ngaokin mbok tapakan).”

Irika raris sareng kalih saling gelut maka cihna asih menyama sané sampun katemuang olih Ida Betara Turun Kabéh melarapan maka kalih seneng madéwasraya. Tapakan Ayuning Jagat ngadanin adiné Ayu Suci Déwi, seantukan antuk manah suci nirmala sampung presida katemuang. Drika Ayu Suci Déwi keajak melali ke Bangli, genahnyané Mémé Darma nyungsung Ida Betara Turun Kabéh. Sareng kalih manggihin kanirmalan manah antuk seringnyané madéwasraya sajebag jagat Bali, Nusa Penida, Jawa, miwah Lombok.

JM Pande Putu Alit Antara
embas ring Désa Tohpati Kabupaten Klungkung pinanggal 13 Juli 1970, dané pinaka guru ring SMAN 1 Semarapura. Saking kantun Sekolah Dasar (SD) ngantos mangkin seneng ring indik Budaya lan Sastra Bali, inggih punika seneng ngwacén lontar, nyurat aksara Bali, dharmagita miwah ngeripta satua cutet. Murda satua cutet dané sané naenin katerbitan olih Bali Orti mingguan Bali Post inggih punika Nyentana, Keris Pengantén, Kalulut Arta Berana, Ulian Pipis Panes, Ratun Joged. Naenin polih jayanti ring pacentokan “lomba inovasi pembelajaran SMA/SMK tingkat nasional” inggih punika jayanti kaping kalih warsa 2009 lan jayanti kaping tiga warsa 2011.