Swastyastu Cinta

Olih: Agus Sutrarama

Gagambaran Manik Sudra

Ambu di muncuk gadang tondén ja capuh, sumilir dingin galang kangin kadi kisi-kisi nyandain, bibih tipis ipunné sakabedik tuh, macampuh ngajak sarin bias putih. Hyang Bhayu di muncuk Kintalaya, ngibas ngeberang bokné selem lantang lan makudang rasané sakabedik kalébang...

“Duh, Hyang Widhi.. titip salam rindu tyang..”

Salam nerawangné tamis-tamis ilang, apaké sang sané kasambatang lakar nawang.

“Dis..! Mai ja, né ada anak ané lakar Bli kenalang.”

“Éh, tyang.”

Mirib ulian tangkejutné, baisné Gendis manjekan nyauh, ngenjekin karang né belig ulian bekbekin ujan kerug ibi sanja, mapangsegan ia negak.

“Gendis! Kamu sing kenapa?”

Gedé Raka, sépanan nyagjagin. Makesiab ningalin getih nyrétcét uli baisné Gendis. Becat limané Gedé Raka nampel naen apang getihé tusing telah pesu.

“Bli Dé! Ené ada répanol ngajak bétadin!” Anak muani ané ada di durinné Gedé Raka madan Wayan Landi, gencang masih mesuang ubad tatu uli tengah tas kompékné.

“Nah, Yan. Jalanang suba ento malu. Raga kel nyemakang kapas lan perban, asané ada ditu di ranselé.

“Nah, Bli Dé.”

Dabdab limané Wayan Landi ngisi pagelangan bais putihné Luh Putu Gendis, nyiamang répanol, ngumbah ngisidang krikil-krikil Kintalayané nakal neket di kulit tatuné. Akebiasan Wayan Landi ningalin rawatné Putu Gendis, né agigis jengis, mirib naenang ngangah tatuné. Ulian lek ketara, ngénggalang buin nguntul, nugtugang nyalanang bétadinné. Duh, putih alus, abedik sing ada ngenah bais pendaki, karawat sajan baan sang sané ngelahang, akejep kenehné nerawang.

“Yan, né ada kapas lan perban!”

Wayan Landi ngucekang lamunanné, lantas nakepang kapas di tatuné lan medbed baan perban.

“Suksma.. aa..” Alus suarané Putu Gendis nungkak.

“Nggih.. Tyang, Wayan Landi.” Wayan Landi nyautin baan kenyemné.

Ditu lantas madingehan Gedé Raka kedék ngrikkik, “Hahaha, aget Bli ngajak dokter mai..” Kéto munyiné anggona nyandain I Wayan Landi.

“Dis, né suba Wayan Landi, ané kel kenalang Bli mara. Ia adik kelas pidan dugas pada-pada kuliah di Bukit. Taén acepok ajak bareng mendaki dugasé enu dadi mahasiswa. Makelo sing katemu sagetang pésbuké payu nemuang, jeg ngorahang kangen koné buin mendaki..” Gedé Raka nugtugang saha makenyem ngisi palané Wayan Landi.

“Oo.. nggih..” Bawak sautné Gendis, maksaang kenyung, buka ada satwané nungkak, krunané sing katugtugang.

“Kamu seken nyidaang majalan tuun, Dis?” Gedé Raka nekek ngekehang limané ané gisina baan Putu Gendis, ngasa-ngasain nuunang baisné, maenjekan di salantang batu karang, sinah enu sakitanga baan labuhé ané saja mara.

“Mai, kéné sariné, Hupp!”

Buka tuara ada arah-arah apa, Gedé Rakané awakné saja gedé ganggas majujuk di malunné Putu Gendis né agigis jengis, nyaup ngancit baisné Gendis, ipun kagandong.

“Seken né Bli Dé?” Petakonné Gendis nyangklingan limané di baongné Gedé Raka.

“Demi mi kuah arantang gagaénanné Jeng Ayu Gendis, héhéhé..” Sautné Gedé Raka, sing buungan ngaénang Putu Gendis kimud makenyem.

“Béhh, palingan sing ja nyidang ked di posko, kéné baat awak yangé..” Putu Gendis ngawales buka ngawalék.

“Arah.. baat selaé kilo gén ajum, enu baatan adin Bliné I Kentung, haha..” Abetné Gedé Raka enteg majalan ngandong Gendis nuunin bukit karang. Posko Pesemetonan Pencinta Alamé mula tondén paek, saja.

“Saja, mun Bli jak adik Bliné nak pada patuh hobi makan, kénkén sing awakné gedé kakéné, héhé..”

“Suba jani kéto, apa payu lakar hadiahné ené yén suksés ngandong ked di Posko?”

“Mi.. kuah lalah.. duang rantang, hahaha..”

“Océ!”

Anut adung tetabuhan lampah ajaka dadua ento. Wayan Landi né nugtugin uli duri buka nyilem, mirib kaengsapin, kéwala samar-samar di atiné Wayan Landi nolak ngengsapin ketélan sayangné mara sajan masawang.

Di Posko Pasemetonan Pencinta Alam, sekaané tondén ja buka onyangan mapunduh, kéwala makejang prajani nyagjagin di kala ningalin Putu Gendis kagandong baan Gedé Raka. Ditu lantas semayané kabayah, diapi suba katembahang baan Gedé Raka, Putu Gendis tuara abedik ningehang, duang rantang mi kuahé akijapan kapragatang baan Putu Gendis, mimbuh taluh ceplok ngelangi. Suba pastiné tusing ja makelo nyidaang ngulgulin basang sedukné Gedé Raka.

“Di, barengin nelahang nah..! Raga tonden ja seduk sajan, takutné makutang nyanan payu né. Kéwala eda kanti tawanga ngajak Gendis nah, héhé, apanga demen ia!” Gedé Raka ngenjuhin Wayan Landi mi né a rantang turin majalan ngalih tongos madaar, di durin poskoné.

“Yan, ningalin kamu madaar, raga dadi inget ngajak timpal ragaé ipidan.”

Wayan Landi tusing ja nyelag, ningehang Gedé Raka buka nerawang nyarita.

“Madum-duman makanan, Putu Randu adan timpal ragané ento. Iraga ngajak telu suba buka nyama tugelan, raga, Randu, tekéning Gendis.”

Merawat sebet di labuh munyiné Gedé Raka, Landi ngawanénang nyelag tur nyekenang, “men jani, Putu Randu dija ya Bli Dé?”

“Randu.. atiban ipidan suba malunan ngalahin ka tanah wayah. Saihang ngajak raga, ia mula durian nawang Pencinta Alam lan mendaki, kéwala ané paling simalu nyidang ngentenang iraga apanga setata urati lan tetep tresna ngajak alam. Ia ané ngidupang Pasemetonan Pencinta Alamé ené, ané ngaénang ngansan ramé truna-truniné seneng magabung. Hahh..” Buka ada né kataenang, katungkakan.

“Di, sing kéné sing kéto, jalan daar malu mi kuahé, satondén émbon, haha..”

Buka kaanggep nyama, kéto né jani karasayang baan Landi. Negak ngajak Gedé Raka, ngortoang indik bukit, gunung, alam, pendakian, lan panyaman. Uling Gedé Raka, Landi dadi nawang unduk carita tresnané Randu kapining Gendis. Rasa matimpalné nadaksara medal, turin tumbuh dadi rasa tresna. Kala ento tuah Gedé Raka ané ada lan satya nampi sakancan pakéweh lan carita atiné Putu Randu. Diastun kanti Hyang Tuduh ngelunin sikianné, Randu tondén seken nawang tanggun pajalan tresnané. Gendis né teka nuutin undangan patemon, musti nepukin Randuné suba lemet makakeb di betén abingé.

Galah né ibi tuah dinané Randu ngalahin. Gedé Raka nyambatang tekén Landi, yan makejang anaké marasa kélangan Randu. Kéwala ané sanget ngenah paling ngarasaang tuah Gendis. Diapi tuara ada anak ané seken nawang kesujatian isin atiné Gendis kapining Randu, walesan tresna nungkakné Randu. Gedé Raka masih tusing nawang, ané tuah tawanga, ituni ento, di tongosné Gendis meserot, di beténné tuah abing tongosné Randu ulung. Randu katarka nyauh baisné ulian ujan lantas ulung ka abingné saru baan sayongé dedet. Ento tuah tongos anyarné katemuang olih Randu, tongos né paling melah né lakar kaédéngang ring sang sané pinih luung di atiné, koné musti kagentosin baan angkihan.

Carita Gedé Raka ento ngaénang Landi mapineh, unduk rasané tondén karwan, unduk rasané enu kaengkeban, baan Gendis, baan Raka, baan déwékné pedidi. Diapi sakabedik suba nyidang baan déwékné narka, kénkén ja sekenné Gedé Raka nyatwaang unduk pitresnané Randu ento, ngenah pesan yén sujatiné Gedé Raka mendem tresna dalem kapining Gendis. Kénkén ia urati ngajak Gendis, duga baanna ngandong uli di muncuk bukité nuunang. Ané jani tanguda Landi marasa lakaran ada di tongosné Gedé Raka ipidan, dugas Randu nuturang kapining Gedé Raka unduk carita kasujatian isin atiné. Kéwala, nyidangké Landi lakar dadi Gedé Raka, ané pelut baanna menpen nyimpen kasujatian kenehné nganti kayang jani? Lantas ada kenehné Landi lakar ngurug kedip apiné ngenyorin, desir anginné nundunin, kéwala benehké ento? Dikala kenyungné Gendis neket di malun mata tan kelés-kelés. Babaos nakal dikénkénné nyuryakin. Ah! Rambang to I Raka, né sing bani-bani nyambatang, jeg salip di péngkolan, depang ia sepalanan puyung, ulian ia muani né jejeh mabarung. Eda kéto! Kalaning selem putih kunang-kunang mepatuk di kenehné, buka ipit tindakan baisné ngaridip, lakaran ngumbah lan ngejang rantang miné, sagetang!

Degg!

Kadi sapuhin ambu suci muncuk Kintalaya, tis, lis ayu nyekala di aepné, “Landi, répot? Nyidang ngeteh ka désa?”

Kondén ada selah bibihné masaut, sagétan Gendis buin ngamalunin makenyem di aepné, kenyem manis pesan, angin dinginné nakal ngampehang, Gendis ngidemang peningalanné, Landi naenang jriji limané ané suba genit dot malihin peningalanné Gendis, dipét pradé ada biasné nyelepin.

“Mai, Dis ..!” Saut Landi prajani, jejeh yén bas makelo bisa-bisa Gendis payu muungang pengidihné.

Ditu lantas Landi ngandéng Putu Gendis nganggo motor bébékné, ngukur lantang jalan mabias babukitan Kintalaya. Ada soléhné rasayang ipun, nguda ja aluh Gendis bisa ngajakin ipun ngatehin ka désa, apaké Gedé Raka nawang? To nguda tusing Gedé Raka né ajakina ngatehin, Ah! Makejang ento kakutang, kaentungang, kalébang, kakeberang baan bangetné Ida Hyang Bayu, né tileh padidi nandingin sepi, yén sing a besik jatmané ento nyumunin nguat suara, “Di.. nguda bisa dot jak pencinta alam?” Petakonné Gendis buka ngentenang Gedé Landi.

“Hah, nak kénkén kadén, lamun maan paek ngajak alam bébas to ngaénang keneh yangé adem, damai kéto. Éé.. Dis.”

“Tyang, Di.”

“Lén kén ento masih, yén ada di alam bébas, yang marasa paek ngajak kasujatian, kajujuran. Dikénkénné kasujatian ento bisa ilang uli déwéké, né ngaénang yang marasa joh, sing kenal ngajak déwék padidi. Alam bébasé ané buin nemuang yang ngajak padéwékan yangé..” Ada rasa lega karasaang baan Wayan Landi, rikala nyautin, nuturang unduké ento. Sing pasangkan, ento ané lakar katakonang baan Gendis kapining déwékné. Kadirasa, Gedé Raka ané suba tawanga malunan, tondén taén nakonang unduk ento. Buka gedong kasujatian ané uli makelo kakunci dalem di dasar atiné, ané mara suba nyidaang kabukak baan sang istri ayu, né jani negak di duriné.

“Suksma, Di.. tutur Diné mara suba nyidaang ngaé tyang lega.”

Maseriang bayuné Landi, rikalaning Gendis ngucapang suksma kapining déwékné, tulus. Ia ngerasaang ento tuah biasa-biasa, benehné ia né ngucap suksma kapining Gendis, ané suba dadi ngingetang, ngaénang ia ngansan sumeken ngerasaang pitulung alam bebas kapining déwékné.

“Di, di malun montor truké ento suba marérén, ditu umah Pa Man lan Mé Adé tyangé. Di warung né lakaran tyang meli baas, kal jukut, kal basa, anggo nyakanang semetonné mani.”

Sanja ento, di warungé sedek ramé né anak mabelanja, “Yé.. Tu Gendis, jalan mulihan malu ajak timpalé, Tu.” Kéto abetné ibuké ento, né tuah Mémé Adé né Gendis.

Mara sajan ngeliwatin angkul-angkulé, Landi suba makesiab nepukin buron mabais papat, jaran putih ganggas ngatepak nglicak kalébang di natahé.

“Héhé, ené madan Horsi. Hush! Husyah! Horsi sayang.. , ené madan Landi.” Landi buka ngengkebang ketug bayu ulian buron gedé né jani nyedodog di malunné, mimbuh lek gigis kerana nepukin Gendis né kamonohin baan jaran ané koné maadan I Horsi ento.

“Di, ipidan liu dini anaké ngubuh jaran anggona medagang ngeliwatin babukitan. Ento ipidan dugas jalan aspalé tondén ada.” Suba kéto Gendis ngajakin Landi negak di ambéné, di kursi tiing maulaté, sagétan ada méong selem cenik makecos ka aep né Gendis.

“Mimih, lucuné...” Yén kénkén kadén unduké, akijapan suba jaranné lakaran nyruduk awakné Gendis, enu nyidaang Landi melekuk tur ngelidang Gendis uli I Horsi né numbrag paling, diapi batisne maan masih katlejek.

Tempyang!

I méong selem cenik makecos ilang, ngulungang rantang. Prajani masih I Horsi marérén dengang.

“Di, kamu sing kenapa??” Nyapnyap Gendis tekéning Landi ané mara ngejohang lepetan déwékné.

“Sing kenapa Dis..” Saut Landi buka negarang makenyem, sambilanga naénang sakitné.

“Di! Batis kamuné metatu..” Adéng-adéng gendis marengin Landi negak, laut nyemakang yéh anget lan ubad tatu. Dabdab ia ngomprés baisné Landi, né sebuh turin beréd.

“Sakit Di, o..?” Dikétoné, kéweh saja baan nyautin, sakit sing sakit, sing agetné dadi aget. Rikala sang sekarning ati di aepné marawat sungsut lan ngembeng peningalanné, buka nambakin makudang rasa, pangidih pelih, rasa suksma katur ring Widhi, lan mirib ada sisa.., tongos rasa sayang, apanga payu matemu Semara lan Ratihé. Hah, mirib marasa bas joh kaliwat ipianné, Landi ngelekang paesné.

“Suba luungan asané, Yan?”

“Sampun Pak Man.” Nyautin petakon Pa Man né Gendis, dikala ia jak dadua ngorahang lakaran mebalik ka poskoné.

Urati sajan Pa Man lan Mé Adéné Gendis teken sameton Pencinta Alamé. Makejang babelanjané Gendis katembahang mayah. Ento anggon punia baang semeton Pencinta Alamé koné. Di selahé tunian, penyaman rupakané Gendis ento masih nyatwaang unduk Randu. Tuah ulian Randu warungné nyidang payu majujuk. Ia ané ngajakin timpal-timpalné para Pencinta Alam nguupin nyujukang warungé, duké ento Pa Manné Gendis kena halangan gelem, ngaenang pangerencana warungé dadi nungkak mekelo. Lén kén peluh, Randuné kadukung baan timpal-timpalné masih pelut baana munduhang pipis anggo nulungin meli bahan-bahan bangunanné. Makejang makesiab turin sedih dikala ningeh bencanané nepén Randu. Ngansan galang kenehné Landi lan sing ngarasa salah pilih milu di Pasemetonan Pencinta Alam, kerasa Randu lakar setata dadi conto né melah.

“Yan, ené ada biu susu abedik penpenan mémé, nyanan apang ada kinyukang di posko. Mé Adé lan Pak Man tuah bisa nyambatang suksma, suba ngejohang ponakan kesayangan méméné uli lepetané mara.”

“Tyang né benehné ngucapang suksma Mé Adé.” Kenyem Landiné kesautin baan Gendis, kadi nyandingin kekunang lan gumintang né mentik sakabesik di langité remrem, nyiriang galahné peteng ngantinin. Ipun jaka dadua mepamit, lakaran balik ka poskoné.

Saja nujah jalan lampu montorné Wayan Landi ngaénang galang, kéwala adaké ditu kenehé pada tuara peteng?

“Landi.. binjepan tatuné lakar komprés yang biin nah..?”

Petakonné Gendis ento tuah makeber tan pasaut, Landi mematu. SMS uling Gedé Raka ituni suba kesautin baan Wayan Landi. Beneh pesan yen Gedé Raka sajan mendem tresna dalem kapining Putu Gendis. Tresnané ané kasimpen uli makelo, tuara taén kasambatang. Ituni pesen di HaPéné ento kauk-kauk ngidih tulung.

Di, iraga lakar ngetogang makejang ngajak Gendis. Benehké ento Di? Dukung raga nah, Di..

Nah, suba pasti ento Bli Dé. Semangat!

Yéh matané tuh kagelekang, kenyung satya semayané kasunggiang.

“Dis..”

“Tyang, Di..”

“Sing perlu komprés biin, suba sing sakit.”

Seger, meséh lan nyelepang makejang aban-abanné ka tengah tas ranselné, sajaké? Tuara ada parama shantiné kasambatang baan Landi kapining Gendis. Das lemahé ento tuah Gedé Raka né kasambat sara, ngemauk nyambatang musti mulih ulian Méméné gelem, Landi nembahang Gedé Raka ané nagih nundun Gendis. Ditu Wayan Landi ngorahang suksma kapining Gedé Raka ané suba ngenalang ia ngajak pasemetonan Pencinta Alam.

“Lakaran teka buin kan Di?” Petakonné Gedé Raka.

“Astungkara.” Sautné Landi saha mepamit metilar.

Boya ja kruna

Tuah rasa

Boya ja semaya

Wantah tresna

Gumintang galang

Lan

Desir dingin Kintalaya

Lakar dadi kenangan

Nemu jalan ngajak Sang Ayu ipian

Swastyastu Cinta

Swastyastu Cinta

... suksma ...

***

Semeng ento, abulan liwat, Wayan Landi ada di sanggar sastrané. Sanggarné buka umah nomor dua nik-niké ané demen jak buku, seneng memaca, lan hobi nulis, masih ngajahin nik-niké apang setata urati ngajak lingkungan. Wayan Landi ané nyujukang sanggaré ento pepes ngatehin nik-niké ngayah mebersih nuju piodalan di pura-pura. Di témboké kepasang foto-foto. Foto-foto sastrawan Indonésia, ada masih foto né mebingkai paling gedé, tuah fotoné Wayan Landi ngajak timpal-timpal Pasemetonan Pencinta Alamé ipidan. Ditu ngenah Gedé Raka, lan.. Gendis.

“Bli Yan, ada anak ngalih Bli..” Abesik anak sanggara maekin lan ngabarin Landi ané sedek mersihin foto-fotoné ento. Marérén ia turin makeneh, kéwala tondén ja pragat baana.

“Landi..”

Krunané elek pesuang, rindu raguné madukan, rasa pelihé milu nyapuhang. Tuara ada pilihan, tuah nengilé nguntulang.

Semeng ento, dedari ipianné I Wayan Landi, teka padidian, ngaba ubad rindu, ngaba kenyung di ati, pesaut rasa. Tekek, di limané sang istri ayu buku harian gelahné Landi kagisi. Bukuné misi urekan ibuk ati lan puisi, anak muaniné nemu tresnané di bukit Kintalaya. Ditu Gendis melekuk Landi, buka ngilangang ibuk uyang, ngediang ragu ngelunin rindu, ngampurang pelih, nurus mamilih, lakar ngucapang, sayang.. Alit-alit sanggaré masuryak, riang. Swastyastu, makejang nyambut sapetekan tresnané, girang.

Agus Sutrarama
magenah ring Tabanan. Kakawiannyané naanin kawedar ring Bali Orti Sampun ngamedalang cakepan pupulan satua cutet “Bulan Satwak”.