Puisi-puisi Ni Kadék Rika Riyanti; Potrékan

Sumber Gagambaran; stremplerart.tumblr.com

Jakét Kelawu

 

Ombaké gebiar-gebiur

Langité peteng dedet

Kunang-kunangé mengkeb

Nanging ditu

di sisin pasihé

I Bli Bagus negak

Majakét kelawu

Makeneh tiang metakon:

apaké antiang Bli?

i kunang napi tiang?

 

Sanur, 27 Désémber’20

 

 

Mabakti

 

Iraga majanji lakar mabakti

ditu di Jagatnatha

Jam 8 peteng

Nyigcig tiang ngalih Bli Bagus

Mabukak pintuné

ditu I Bli Bagus majujuk

di paak pintuné

nganggen safari, kamen, lan udeng

Nanging tiang tusing pati rungu

Pintu napiké sané mabukak

pintu jelané napi pintu atin tiang?

 

Sanur, 27 Désémber’20

 

 

Potrékan

 

Dini, di tengah kamaré

tiang nyingakin potrékan iraga

Potrékan sané bisa mamunyi

tur karasayang

Iraga sedeng makenyem ngenah calingné;

kedék kadingehang

Iraga sedeng magelayut;

anget di atin tiang

Nanging, pepesan tiang ningalin potrékan Bli Bagus padidi

adi munyi keréték dingehang tiang?

 

Sanur, 27 Désémber’20

 

Ni Kadék Rika Riyanti
embas ring Dénpasar, 22 Agustus 1996. Mangkin meneng ring Sanur Kauh, Denpasar. Ngawit nyurat duk kantun SMP