Puisi-puisi I Wayan Ésa Bhaskara; Kenyem Lalah Manis
 |
| Sumber Gagambaran; id.pinterest.com |
Kenyem Lalah Manis
drika cingak tiang, nyaputin liang
kenyemné tekek kagisi
kesyab-kesyab nembus ulu ati
driki nembangan kidung
rawat iluh putih landung
maduwé kenyem lalah manis, adung
sané ngaenang, layah tiang sekadi lung
Di Betén Tendané
bengong makeneh-keneh
di betén tendané
nerawang sawang
meték bintang
di duwur téndané
pejalan anginé nguntul
sakadi sané sampun-sampun
ngimbang, laut nyujuh ka tanahé
Timpal di Désa
bedik timpalé di désa
timpal-timpal makejang ngeroko
timpal-timpal makejang majudi
timpal-timpal makejang mamunyah
bedik timpalé di désa
timpal-timpal bisa malayangan
timpal-timpal bisa mapartai-partaian
timpal-timpal magaé di pesiar
bedik timpalé di désa
timpal-timpal ngalin carik
timpal-timpal ngadol tegalan
timpal-timpal tusing nyak matimpal ajak tiang
Dini Ditu
dini tiang ngantos semaya
lemah peteng, kanti makudang-kudang sanja
kanti pemiluné teka
ditu bapak ngedumin semaya
lemah peteng, kanti makudang-kudang sanja
kaliwat ring dunia maya
dini ditu bapak sakadi dagang ubad
ngadol iklan, menahin pura, menahin bale désa
nanging makejang maya-maya
magenah ring Tabanan, Bali. Ngawit 2014 makarya dados guru Bahasa Indonésia ring SMK Negeri 1 Dénpasar. Kakawianipuné marupa puisi, cerpen, miwah esai sané sampun kamuat ring Bali Post, Denpost, Tribun Bali, Pos Bali, tatkala.co, lan Suara Saking Bali.
.jpg)
No comments