PPAM: Pada Pada Apang Majalan

Olih: Komang Sujana

Atiban lebih Covid-19 suba nyengkalén di guminé. Gering agung Covid-19 sanget mapuara kaon ring séktor ékonomi lan pariwisata. Manut data Kemenaker kantos Maret 2021 sawetara 29 juta warga kilangan pakaryan sangkaning PHK wiadin dirumahkan. Warga Bali pamekasné sané sanget keni pakéweh mawinan ngandelang pariwisata. Apa buin jani mawuh kebijakan Pemerintah ngadaang Pemberlakuan Pembatasan Kegiatan Masyarakat (PPKM) Darurat Jawa-Bali ngawit tanggal 3 kantos 20 Juli 2021. Kramané kawatesin makarya lan madagang tuah kantos jam 8 peteng.

Yén kramané ané ngelah gajih bulanan minabang aab jagat covid-19 lan PPKM tusing sanget ngranaang pakéweh. Ané nyansan kéweh rakyat cenik ngandelang hasil harian ané galahné makarya wiadin madagang uling lingsir sanja kantos peteng, cara dagang nasi jinggo, dagang nasi kuning, dagang goréngan, dagang nasi goréng, dagang lalapan, dagang terang bulan, dagang canang, dagang saté lontong rombong, muah ané lénan. Di luung guminé kondén karuan masi dagangané énggal payu apa buin gumi nedeng sayah cara jani mimbuh kawatesin madagang. Tutur dagang nasi jinggo di Jalan Surapati Buléléng ngorahang matakeh mancan maan madagang 30 tali rupiah ulian PPKM. Biasané anaké ramé mablanja meli nasi jinggo sawetara jam 10 peteng.

Lantas kebijakan ané cara kénkén ané paling luung? Manut tiang PPKM gentosin aji PPAM: “Pada-Pada Apang Majalan”. Masyarakaté tusing kawatesin madagang kéwala protokol keséhatan tetep kamargiang. Nganggen masker, cuci tangan, jaga jarak, ané lakar nglaksanaang pakaryan wajib mavaksin, yéning mablanja dedaaran lebeng tusing ngajeng di tongosan wiadin dedaarané apang aba ka jero soang-soang. Tetujoné apang tusing ngaé kekumpulan wiadin kerumunan.

Yén tiang ngrasaang langah anaké meli terang bulan, goréngan, nasi jinggo ngajeng di tongosé mablanja. Yén dagang-dagang ané biasané ramé ngajeng di tongosan, cara kafé, angkringan, tongos-tongos nongkrong kekinian apang kasekenang tusing nampi makan di tempat turmaning nganggén Prokes ketat. Biasané liu anaké ané ampah, tusing nyalanang Prokes disubané Pemerintahé  ngicén galah. Lantas carané mastiang kénkén?

Satgas Covid-19 suba ada uling tingkat pusat kantos ka désa/kelurahan lan désa adat. Anggaran operasional Satgas masi suba ada mawinan désa adat lan dinas jani suba ngelola anggaran ratusan kantos miliaran juta rupiah. Satgas Covidé éné ané patut mastiang wiadin ngawal kebijakan PPAM: Pada-pada Apang Majala. Yén suba ja memengkung mara kenain peringatan kantos katutup.

Di guminé cara jani mula saja PPKM; pada-pada kéweh makeneh, pada-pada kéweh maulehan. Yén kawatesin kantos jam 8 sinah rakyat ceniké pamekas ané gagaéné ngawit lingsir sanja kantos peteng marasa tusing maan keadilan. Pemerintahé patut ngamedalang kebijakan win win solution, Prokes tetep majalan, rakyaté masi tetep idaang maulehan, pada-pada apang majalan. Yén suba pada-pada majalan sinah rakyaté PPKM: pang payu kuala maulehan, pang payu keloan maangkihan.

Komang Sujana (Ki Jugul)
makarya dados guru Bahasa Bali ring Buléléng.