Pindekan: Krya Budaya Pinaka Sarana “Énergi Terbarukan” Kajiwapramanain Bayuning Bali

Olih: I Wayan Jatiyasa

Sumber Potrekan; www.flickr.com

Yéning maosang Bali, janten sampun sané kapikayun wantah kawéntenan pura sané akéh, kahanan palemahan sané ngulangunin miwah asri, parajana Bali sané kumanyama lan santi, miwah kentel pisan ring pamargin upacara agama miwah adat. Punika mawinan Pulo Bali ketah kabaos “Pulau Déwata (The Gods Island), Pulau Seribu Pura (Thousand Témplé Island), utawi Pulau Surga (Island of Paradisé)”. Kawéntenan palemahan sané asri punika nénten prasida ngasorang kaluihan palemahan-palemahan wong duranegarané, minakadinipun Jepang, Koréa, India, miwah panegara ring Eropa. Pinaka bobot kautamayan Bali wantah mawit sangkaning jejer miwah werdinnyané kawéntenan seni miwah budaya Baliné sané sampun katami saking riin. 

Seni budaya Bali punika sampun maakah miwah maumbi ring angga sariran krama Baliné. Tiosan punika, seni budaya Bali sané metu miwah tumbuh kajiwapramanain antuk agama Hindu mawinan dahat mataksu ring saurah-arih kahuripan krama Baliné. Unteng geguét kabudayan Bali kadasarin antuk susastra Hindu miwah katelebang sangkaning pikayun sane tiling nekéng tuas. Samaliha, saluir parupayan krya sané kawetuang wiadin kapikolihang olih para undagi wiadin sangging punika sami mapaiketan ring susastra agama, taler pinaka uparengga sajeroning upacaranipun. 

Panglimbak seni budaya Baliné kaduldulin antuk sakabuatan miwah kawigunan krya ring kahuripan i manusa. Nénten wénten krya sané nénten mawiguna, nénten wénten krya sané nénten dados piranti sajeroning mikolihang pikolih. Sakéwanten krya punika taler nganutin pisarat miwah pakibeh jagat sané sampun nepék ring aab jagat revolusi indutri 4.0 kadi mangkin. Pamargin aab jagat inucap kacihnayang antuk panganggénan piranti-piranti industri sané kadasarin antuk téknologi anyar miwah canggih. Tiosan punika kanggén sarana digital miwah internét pinaka panyokong saluir swakaryan i manusa sané sayan-sayan akéh miwah abot. Malarapan antuk piranti-piranti punika majanten pacang ngawinang swakaryan i manusa dados dangan, gelis, miwah mapikolih becik. 

Piranti-piranti industri sané anyar seringan nénten kasokong antuk prabéa, kawikanan utawi kawagedan, miwah genah. Tiosan punika piranti-piranti taler akéhan ngwetuang pikobet miwah ius sané kaon ring widang Tri Hita Karana, luiré parahyangan, pawongan, miwah palemahan. Ring widang parahyangan, bebuatan uparenggan upacara majanten akéhan kakaryanin antuk wantuan mesin. Sapunika taler sarana sané kanggén ring sajeroning makarya pastika taler wénten saking luu sané kanggen malih wiadin ka-daur ulang. Sané pacang ngirangin kasucian miwah taksu uparengga inucap. Akéhan metu uparengga saking sarana plastik. Yéning sampun kadi asapunika, puniki nyihnayang nénten nginutin piagem wiadin peraturan Pemerintah Provinsi Bali indik utsaha ngirangin panganggénan plastik ring kahuripan krama Bali. Punapi malih, sangkaning gansarnyané panglimbak perékonomian Bali ngawinang santer taler panganggénan barang-barang sané kapikayun “praktis” mawadah wiadin mabungkus antuk plastik. Parilaksana puniki majanten sampun piwal ring wicara Pemerintah Provinsi Bali jagi ngresikin Bali saking luu plastik antuk ngirangin ring sajeroning nganggén sampah plastik. Puniki manut ring Peraturan Gubernur Nomor 97 warsa 2018 indik Pembatasan Timbulan Sampah Plastik Sekali Pakai. Malarapan antuk peraturan inucap pacang prasida ngwangun kaagungan miwah taksu parahyangan Bali saking sakala miwah niskala.

Ring widang pawongan, panganggénan piranti-piranti industri anyar pacang ngirangin kawéntenan linggih undagi miwah sangging ring Bali. Duaning linggihipun sampun kagentosin antuk piranti marupa mesin. Yéning kadi asapunika, majanten taler ngirangin budi citta sajeroning ngarupayang seninipun. Pangupajiwan parajana sané kadasarin antuk kearifan lokal Bali musna kawawa antuk pabrik. 

Ring widang palemahan, panganggénan piranti-piranti industri anyar pacang ngawinang palemahan Bali leteh, cemer, miwah kumel antuk limbah-llimbah produksinipuné. Pacang ngletin pertiwi, tegalan, bangket, tukad, danu, miwah segara. Unteng wicara “Ngwangun Sat Kerthi Loka Bali” sané kanikayang oleh pemerintah majanten nirdon. Palemahan sané leteh, ngawinang taksu Bali rered, parajanané katibén baya, minakadinipun banjir, tanah longsor, abrasi, miwah sané tiosan. Taler, pacang ngawinang sayan ngirangin pangrauh para wisatawané, pamuputnyané raris ngirangin PAD miwah dévisa negara. 

Malarapan saking pamidarta ring ajeng, sampun pastika kabuatang pisan upaya miwah utsaha sané nyakala mangda prasida nawingin pamargi-pamargi kadi asapunika. Santukan taksu Bali pacang nguripang kawéntenan miwah kahanan kahuripan i krama Bali. Bali pinaka pulo alit, sampun kosekan antuk krama, inggihan krama Bali wiadin krama tamiu. Indiké punika majanten muatang sumber énergi sané becik miwah nganutin pakibeh jagat Baliné. Énergi sané mawit saking pakardin sujana Bali, nénten lémpas saking seni budaya miwah agama Hindu ring Bali. Duaning kahuripan Bali magantung antuk pariwisata Budaya. Kabuatang saking kawéntenan, pawerdian, miwah panglimbak seni budaya Bali sané luih miwah ngulangunin, prasida nudut kayun para wisatawa sané rauh ka Bali. Kawéntenan palemahan ring Bali marupa bukit, gunung, danu, miwah segara prasida ngwetuang énergi bayu sané patut kaupapira miwah kawigunayang becik anggén nincapang karahayuan miwah kasejahteraan i krama Bali pinaka “energi terbarukan”. 

 

Énergi Terbarukan

Energi terbarukan inggih punika énergi mawit saking prosés alam sané makalanturan, minakadinipun mawit saking matanai, angin, pamargin toya, miwah panes bumi. Énergi sané kanggén puniki majanten sampun makatah kawéntenanipun, samaliha nénten pacang gelis telas yéning kantos nglantur kaanggén. Tiosan punika, énergi puniki pastika taler nénten nyemerin wiadin ngletehin palemahan Bali. Prasida ngwigunayang kawéntenan bayu sané wénten ring makudang-kudang wewidangan Bali, luiré ring segara miwah pagunungan. 

Ngwigunayang kawéntenan bayu pinaka énergi terbarukan prasida kalaksanayang malarapan antuk nganggén piranti budaya marupa pindekan. Piranti puniki prasida kanggen ring segara miwah pagunungan pacang mikolihang énergi sané kaanggén ring pulo Bali. Panganggénan pindekan pinaka énergi terbarukan sampun kalaksanayang saking dumun oleh Welandan (Belanda), mawinan sering kabaos “Negara Kincir Angin.” Taler panganggénan pindekan sampun lumbrah ring negara sané sampun nglimbak tiosan. 

 

Pindekan Kapramanain antuk Bayu

Pindekan Bali inggih punika krya budaya saking sujana Bali sané kakaryanin antuk gesing. Pindekan sané ketah kauningin wantah pindekan madon kakalih. Pindekané punika prasida mapiteh sangkaning bayu wiadin angin sané ngasirsir, sayan baret kesiran bayu punika sayan gelis pitehan pindekan punika. Pindekan kakaryanin manut bebuatan sang undagi. Wénten pindekan sané kakaryanin antuk gesing sané mapanjang tigang kantos enem méter. Don-don pindekan sané pacang mapiteh punika kakerotin mangda tipis raris kabéngkotang manut kawigunannyané ri tatkala kaampehang bayu sané baret. 

Suaran pindekan punika sayuakti macihna pisan, mabinayan ring suara sunari, lelakut miwah sané tiosan. Soang-soang pindekan ngamedalang suara matios-tiosan, manut ageng-alit miwah cendet-panjang pindekan sané kakaryanin. Suaran pindekan taler pacang mauah-uah manut ageng-alit kesiran bayu sané ngampehang don-don pindekan punika. 

Kawéntenan bayu ring Bali, pinaka pramanan pindekan dahat mautama pisan. Sangkaning bayu punika prasida ngawinang don-don pindekané mapiteh, samaliha ngamedalang suara sane ngulangunin. Pindekan pinaka krya budaya sangging Bali akeh kapanggih ring tegalan, bangket, wiadin ring karang pomahan krama Baliné. Yéning sampun kaaksi wénten pindekan, sayuakti mataksu kawéntenan palemahané punika. 

Manut pakibeh aab jagat kadi mangkin, undagi sané kantun makarya pindekan sayuaktinipun akedik pisan. Akehan undagi sané makarya pindekan sangkaning pacang kaadol nagingin pesanan sadurungnyané. Pindekan sané kaadol punika akéhan taler wantah pindekan sané pacang kanggén pameran utawi kadruénang ngraga (koléksi). Taler wénten sané numbas pindekan pinaka kanggén hiburan antuk suranipun sané jangih miwah nudut kayun sang sapasira ugi sané mirengang. Suara sané jangih ngawinang pikayunané degdeg miwah santi. 

 

Pindekan Sajeroning Kahuripan 

Tiosan ring suara sane jangih, pindekan taler madrue pikenoh sané mabuat pisan ring kahuripan. Ketahnyané, pindekan seringan kanggén ring widang pertanian miwah perikanan. Mungguing kawigunan wiadin pikenoh pindekan sajangkepnyané inggih punika kadi ring sor puniki.

1. Pindekan sané kaadegang ring bangket wiadin sawah pacang ngwetuang suara sané jangih punika pacang ngawinang ajerih kawéntenan i paksi Perit miwah Bondol, mawinan nénten prasida neda miwah ngemesehin wong taniné. 

2. Suaran pindekan sané jangih ring bangkete taler ngawinang ajerih kawéntenan bikul-bikul sané pacang neda pantuné.

3. Pindekan sané kaadegang ring tukadé, prasida kanggén ngunggahang toyan tukad ka bangketé. Toyan tukad sané membah saking pitehan pindekan punika katimba kantos ring abangané raris ngembahin pantuné ring bangketé. Pindekan sané sapunika wénten taler kagenahang ring grobogan toyané sané tegeh, pindekan sané punika taler prasida ngembahang toya kantos ka bangketé. 

4. Pindekan sané kagenahang ring kolam wiadin tambak udang miwah ulam, punika matetujon nyaring miwah ngranjingang angin (oksigen) mangda setata bresih miwah seger. Yéning angin sané ngranjing ka tambak wiadin kolam setata bresih miwah seger, majanten pacang ngawinang sadagingipun minakadi lélé, udang, miwah ulam mrasidayang maurip becik. Angin sané karanjingang pacang masaih ring angin sané wénten ring genah ulam sayuaktinipun. Taler pacang prasida mresihang kawentenan angin sané wénten ring wewidangan tambak wiadin kolam inucap. Tiosan ring nyiagayang takehan angin sané mapikolih becik.

5. Pindekan pinaka sarana hiburan kaanggén tamban rasa ulangun ring sang sané mirengang suarannyané. Wénten pindekan sané suarannyané ngamedalang suara gambelan kadi suaran rindik utawi angklung. Nénten sami undagi prasida makarya pindekan sané kadi asapunika. Silih tunggil undagi (pengrajin) sané sampun ketah ngarya pindekan masuara gambelan inggih punika Bapak I Ketut Sabar saking Dusun Pasek, Desa Aan, Kecamatan Banjarangkan, Kabupaten Klungkung. Kaketus saking Radar Bali (2019), sang sané ngarya pindekan masuara gambelan puniki patut uning suaran gambelan miwah angklung. Soroh pindekan masuara gambelan puniki pinih akéh sané ngarsayang, tiosan sangkaning wentuknyané matiosan ring pindekan sané kalumbrah, taler sangkaning suaranipun prasida ngamedalang suara gambelan ngawinang rasa ulangun ring pikayunan.

6. Pindekan kaanggén sipta kawéntenan bayu/angin. Yening pindekan punika masuara punika nyihnayang wénten kesiran angin. Tiosan punika, saking nyingakin pindekan punika prasida kawikanin kawit pamargin kesiran anginé. Upami: yéning ikut pindekan sané ngaanggén kobér utawi panepas angin punika beneng Kaler, punika nyihnayang pamargin anginé saking Kelod. Miwah salanturipun.

7. Pindekan prasida kaanggén ngwantu sajeroning pamargin penggilingan pantun, panugelan taru, miwah pembangkit listrik tenaga angin.

Sapunika makudang-kudang kawigunan wiadin pikenoh pindekan sajeroning kahuripan i manusa. Sangkaning kawéntenan pindekan, prasida ngirangin panganggénan energi listrik samaliha “ramah lingkungan”, duaning kapikolihang antuk krya budaya sané adiluhung pisan.

 

Pindekan Pinaka Énergi Terbarukan ring Bali

Pindekan kapramanain antuk bayu sané wénten ring wewidangan segara miwah pagunungan Pulo Bali prasida nglimbakang miwah nincapang énergi terbarukan. Énergi punika prasida ngwewehin bebuatan énergi listrik sané kaarsayang ring i krama Bali sané kaepah dados 9 (sia) kabupatén/kota ring Bali. Nénten sangkaning bebuat ring widang pomahan, taler  ring widang pariwisata, instansi/lembaga padruénan pemerintah wiadin swasta, genah umum, miwah sané tiosan. 

Kesiran angin saking segara sané wénten ring Bali, minakadinipun ring Candidasa, Tulamben, Sanur, Kuta, Padang-padang, Soka, Dream Beach, miwah sané lianan prasida nyokong kawéntenan énergi terbarukan mawit saking pindekan puniki. Tiosan malih, kawéntenan kesiran angin sané kapikolihang saking pagunungan minakadi ring Pecatu, Tanah Lot, Gitgit, Seraya, miwah sané tiosan. 

Ring sajeroning ngwangun Bali manut program Nangun Sat Kérthi Loka Bali manut kadi paridabdab Pemerintah Provinsi Bali, patut kakawitin saking mangkin mataki-taki, nyiagayang, nyobiahang, miwah nglaksanayang parikrama sajeroning kahuripan i krama Bali antuk énergi terbarukan. Pindekan pinaka sarana énergi terbarukan punika patut katangiang malih. 

Pindekan Bali pinaka kraya budaya para sujana Bali prasida kalimbakang mangda prasida nincap kawigunanipuné. Prasida nyokong sakabuatan kahuripan masyarakat Bali, nénten amung mawiguna ring widang pertanian miwah perikanan kéwanten, nanging sampun nincap ring saluir kahuripan i krama Bali. 

 

Ngwerdiang Pindekan Ngwangun Taksu Bali 

Pindekan Bali wantah silih tunggil krya budaya sané katami saking dumun rauh mangkin. Ring dija manawi pindekan punika prasida mawiguna, irika pastika pindekan kantun manggeh kawigunayang kantos mangkin. Pamarginipun wantah prasida ngwigunayang sumber daya alam wiadin potensi désa/wewidangan soang-soang mangda setata bresih miwah asri. Pindekan pinaka kabudayaan Bali patut katangiang malih, kawigunayang anggen nyokong panglimbak wisata budaya miwah sakabuatan pamargin kahuripan i krama Bali. 

Yéning sampun sami nyungkemin pamargi becik kadi ring ajeng, majanten pacang prasida satinut ring program pemerintah, nyujur jagat Bali ring aab jagat sané anyar. Wirang miwah sutindih ring kaajegan miwah jenarnyané taksu Bali kadi sané sampun kanikayang ring para widagda-widagdané duké riin. Pawangun wewangunan Bali sané kantun  manggeh katami rauh mangkin pinaka kamahatmian budaya Bali, kawangian budaya Bali, miwah kaluihan Pulo Bali sané kaloktah ngumbara ka duranegara.

I Wayan Jatiyasa
ketua jurusan Prodi Bahasa Bali ring STKIP Agama Hindu Amlapura lan dados penyuluh Bahasa Bali kabupaten Karangasem. Kakawiannyané naanin kawedar ring Bali Orti miwah Médiaswari.