Kudéta

Olih: I Gusti Lanang Sutéja Naréndra

Sumber Gagambaran; imgur.com

Peteng suud madaran, mabalih tivi tiang padaduanan. I Luh nyambilang ngesoh busung lakaran kulit ketipat, tiang nulungin ngulat.

“Piiih... Masan kudéta jani. Di Myanmar kudéta, di Indonésia masi koné ada kudéta partai. “ Tiang ngarenggeng dugasé tiviné nyiarang orta unduk kudéta. I Luh majadengan ngesoh busung, lantas nyautin.

“Apa madan kudéta?”

“Perebutan kekuasaan secara tidak sah. Nyai ber katrok pesaja. Mirib dugasé masekolah ngaléwa dogén!”

I Luh mendep. Lanturanga gaéné ngesoh sambilanga ngarenggeng, “ae ber demen sajan anaké kudéta jani!”

Tiang nyaru-nyaru, nuléngék tiviné sambilang ngulat.

“Tooo... ada lalima anaké ané curigaina lakar kudéta partai!”

Buin tiang ngarenggeng, nuutang raos penyiar tiviné.

“Ada empat kader aktif, dan satu orang di luar partai!”

I Luh makipekan. Jani tuléngéka paningalan tiangé, lantas matakon.

“Ngujang patuh jak kasus icangé, Bli?”

Tiang makesiab, kasus apa ya? Mawanan tiang jeek nakonang.

“Kasus apa, Luh?”

“Kasus kudéta!”

“Maksud Nyainé?”

I Luh nyedogang busungné. Masila pened marep ka tiangé.

“Ada ané lakar mengkudéta posisi icangé dadi istri Bli yang sah!” Mih, ber seken pesaja raosné, sinted tur sepet. Tiang bengong tuara resep. Buin sesed nakonang,

“Maksudné?”

I Luh tarik napas panjang, lantas pesu raosné ngerépéd cara mimis bedil brén.

“Ada lima orang mantan Bliné ané mencoba mengkudéta posisi icangé sebagai istri sah. Émpat orang mantan masih aktif. Artiné enu pepes kontak ngajak Bli di Wé A. Ané aukud suba blokira Wé A Bliné sakéwala enu memberikan harapan. Apa perlu icang ngorahang inisialné?”

Tiang kamemegan sing ngelah saut. Tondén maan nyahsahang bayu, sagét buin ia ngaraos.

“Asal bani Bli maang restu gerakan kudétané ento, awas! Bapan icangé mantan prebekel!” Mimih... Tujuhné goétanga ka baong buka tiuké ngorok baong.

Mbééé... Tiang sing ngelah saut. Ngejer ngetor kélangan bayu. Ngulat ketipat sirikan, ketipat taluh pragatné. Celekotokané...

 

(Macang Rumah Cinta Seribu Jendela)

 

I Gusti Lanang Sutéja Naréndra 
magenah ring Karangasem tur makarya dados guru.