Puisi-puisi Rai Sri Artini; Punyan Beton

Sumber Gagambaran: www.davidsongalleries.com

Bulan Mati

 

Mangkin langité peteng dedet

Dija bulané, sang déwi sane nyunarin langit?

Mangkin bulan padem

Sapa sira sané ningeh suara-suara kapendem?

 

Bulan tuara ngenah

Magedi tan pawarah

Tiang bedak layah

Napi kal anggén mayah

 

Meled tekén sinar galang

Rikala keneh lan gumi peteng

Bulan, sang déwi langit

Iriki tiang ngantosang

 

Sunarin manah titiang

Apang tusing puyung lan peteng

Nandang idup kalara-lara

(Novémber  2020)

 

 

Maselselan

 

Maselselan ngaé tangkah sesek

Ngaé bayu engsek

Sampunang anyud manah

Ring tukad sané madan selsel

Depang sané lintang

Sampunang sumanangsaya

Makejang sampun majalan melah

Lan sané lintang anggén melajah

Apang becikan parisolah

Sampunang engsut

Sampunang sungsut

Ring manah kusut

Ngiring majalan malih

Kenehé lascarya, kenehé melah

Sinah nemu karahayuan

(Novémber 2020)

 

 

Tanah

 

Taén nah

Taén nah

Melahang ngaba papineh

Apang tusing usak manyama

 

Taén nah

Taén nah

Saru pelih beneh

Ngaé sakit keneh

 

Taén nah

Taén nah

Ulian tanah

Bisa engsap tekéning tresna

Tusing inget apa-apa

Peteng dedet manah

Buta kala ngarebeda

(Désember 2020)

 

 

Puyung

 

Wénten sané puyung

Ring keneh anaké lingsir

Ngancan lingsir ngancan suwung

Suwung mangmung

Satua sané sampun lintang

Mapiteh laksana papindekan

Tan wénten sané mirengang

Puyung panyingakané

Puyung tangkahé

Sekadi bangbang ten madaging toya

Rikala anaké lingsir mawali ka tanah wayah

Sampun kasép antuk nagingin toya

Ring mbang tangkahné

Sané wénten wantah toya paketéltél

Saking panyingakan i raga

(Novémber 2020)

 

 

Punyan Beton

 

Kija cariké ilang?

Kija tegalané ilang?

Kija alasé ilang?

Sakadi kena pastu

Carik, tegalan lan alasé masalin rupa

Dadi punyan-punyan beton

Punyan-punyan beton tumbuh subur

Sayan ngelinggahang, sayan ngeliunan

Guminé panes makudus

Kenehé layu dudus

Punyan beton tusing bisa ngisep yéh ujan

Punyan beton tusing bisa ngetisin

Punyan beton tusing bisa ngisiang akah entik-entikan

Kéwala liu anaké nanem punyan beton

Mirib punyan betoné mabuah tur mabunga pipis liu

Ento mawinan anaké demen nanem punyan beton

(Désémber 2020)

 

 

Mémé

 

Mémé,

Tresnané sakadi matan ai

Nyunarin tanpa pilih

 

Mémé,

Tresnané sakadi telaga ening linggah

Ngetisin manah

 

Mémé,

Tresnané sakadi pertiwi

Numbuhin sarwa entik-entikan

Lascarya tan pegat antuk blabar

 

Mémé,

Napi anggén ngwales

Tresna asih kalintang bales

Salantang tuwuh?

(Désémber 2020)

Rai Sri Artini
meneng ring Banjar Tuka, Désa Dalung. Nyurat puisi bahasa Indonésia ngawit warsa 1993 kantos mangkin. Kakawianyané kawedar ring média online utawi média cetak. Mangkin wawu ngawitin nyurat puisi Bali.