Manumadi

Olih: IDG Trinandita

I Komang Alit Juliartha

Yéning embas dados jatma manusa kanikayang manumadi ring jagaté. Rikala punika pastika abot pisan pikamkam sané patut karémba. Sangkaning punika wénten raris ajah-ajah sastra agama sané dados titi pangancan ngamargiang kahuripan.

Ring parikrama kahuripan puniki wénten bacakan brahmacari asrama, gréhasta asrama, wana prasta lan biksuka. Wacakan puniki sampun midabdabin separipolah jatmané nagingin kahuripan. Prasida ngamargiang sakadi patut pastika kahuripan puniki sampun kabaos manut.

Ring bacakan tiosan kabaos kahuripan ring marcapada manumadi dados manusa kabanda antuk catur purusa artha. Inggih punika dharma, artha, kama lan moksa. Ring bacakan puniki minabta sami jatmané pacang nyujur sunia utawi moksa sané daos tetujon pinih untad ring kahuripan puniki. Pastika maduluran dharma (ajah-ajah suci) ngaruruh artha (kebendaan utawi kekayaan) kaanggé nagingin kama (keinginan) pinih untat moksa (manungal ring sangkan paraning dumadi).

Ring bacakan tategenan idup taler wénten patpat sané tan prasida kakelidin. Wénten suka, duka, lara lan pati. Patpat bekel manumadi ring jagaté puniki mapaiketan ring patpat bacakan kahuripan inggih punika cerik, kelih, bajang lan tua. Cerik ngantos kelih kabanda brahmacari, bajang ngaranjing ring grehasta asrama ngelantur tua. Risampun punika nyujur wana prasta lan biksuka

Ring bacakan kahuripan puniki pastika sami sampun wikan. Sami sampun tatas lan sampun prasida nyungkemin indiké punika sami. Kémawon ring pagubugan kahuripan wénten tatiga sané tan prasida katarka lan kauningin olih jatmané ring jagaté saking dumun ngantos mangkin. Minab ngantos kapungkur wekas.

Kapertama rikapan jatmané pacang embas ring jagaté. Galah kali napi lan sané tiosan. Kaping kalih sira jodoh jatmané risampun ngamargiang gréhasta asrama. Kaping tiga rikapan jatmané pacang nyujur sunia loka (padem). Puniki sané sering kasengguh misteri. Minab punika wantah Ida Sang Hyang Paramakawi sané matutang. Kadi punika sering kapiragi dados gendurasa ring jagaté.

Tatiga puniki sané tan prasida kauningin jatmané sané manumadi ring jagaté. Riantuk tan prasida kauningin lan katarka tetiga bacakan punika awinan kasengguh punika wantah sampun panumaya. Sangkaning punika manumadi dados jatma kanikayang maduwé galah nyiagayang raga sumangdané satata sayaga ring galah pinih untat punika. Sangkaning pastika jagi kapolihang.

Minabta punika sami rumasuk ring panumaya kahuripan. Minabta sangkaning punika jatmané patut yatna ring angga sarira. Sumangdané doh saking pikobet lan sida nemu rahayu. Yadiastun wantah utsaha sané prasida kabuat. Indik pematut pastika Ida Sang Hyang Embang sané mastikayang. Wénten kabaos yéning sampun galah magedong batu tan prasida nambakin.

Napi sané kawedar ring ajeng sakadi pamungkah pikayun miragiang orti. Orti sané midartayang indik sawitra ring médsos. Yadiastu tan naening kacunduk kémawon kakawian utawi reriptan nyané ring médsos utawi cakepan sané sampun kamedalan naenin kapiragiang lan kawacén. Sawitra punika tan wénten tios Alit Joule kaloktah kasambat. Aran lengkap I Komang Alit Juliartha. Embas ring Bekasi 15 Juli 1991. Sampun ngalahin (meninggal dunia). Alit puniki wantah sawitra ring Baskom sané aktif lan kréatif pisan ring parikrama sastra bali. Akéh kekawian minekadi puisi bali, satua cutet, esay lan seneng musikalisasi puisi bali live ring fésbuk. Taler aktif ngaripta kakawian tiosan makadi artikel sané kamedalang ring tatkala.co sané taler nganyudin ati ritatkala ngawacén.

Akéh yéning sami kapidartayang. Rasa tan percaya miragiang gatra Alit Joule sampun ngalahin nyujur tanah wayah. Rikala semeng, 29 Januari 2021 mukak HP kapiragi indik punika. Pastika akéh pisan sané makesiab lan tangkejut miragiang ortiné punika. Majanten ring fésbuk akéh pisan ucapan belasungkawa lan rumasa sungsut katinggalin sawitra sané sampun sakadi manyama.

Tan mapisalah rikala silih tunggil warginé nemu pati (ngalahin) pastika biyur ortiné. Raris sami ngamedalang rasa pedalem. Sami kabecikan lan kamelahan ipun sakantun nyeneng sami kacarca. Ipun naening makarya ring kapal pesiar kémawon saking genah makarya tan lali ring sastra bali lan satata ngaripta kakawian sané ngangobin pisan. Pastika metu rasa duhkita dahat pisan. Ipun kantun wimuda pisan pastika suwé dados angenan. Minab sami angga ring Suara Saking Bali, Baskom, tatkalo.co miwah sané tiosan rumasa kadi punika. Napi malih timpal timpal rumaketnyané.

Ring panguntat atur, dumogi Alit Joule polih genah sané becik. Nyujur sunia loka lan kulawarga sané katinggalin prasida nerima panumaya sané sampun majanten puniki. Dumogi iraga sami taler prasida ngulati kabecikang sang sané ngalahin indik susastra lan kakawian sané sampun prasida kasobyahang. Mitegepin kasusastraan Bali sané patut kapiara lan karémba. Om swargantu, mokcantu, sunyantu, murcantu. Om ksama sampurnaya namah swaha.

Batubulan, 1 Fébruari 2021

I Déwa Gedé Trinandita
urati lan seneng ring parikrama Bali.