Bongkling (CLXXVII – CLXXXVI)

Kaketus saking manuskrip duwén Ida I Déwa Gdé Catra Karangasem 

/177/

Yan ratu sami mangasah,

satanding tandingé sami,

miwah kasaktiné reko,

bedikan né ajak kasih,

yén sampun ajak kasih,

i rika cingakin dumun,

yén sampun ya kacidra,

masa kalah ban ngembarin,

ditu lawut,

sang prabhu manggawé siyat. 

 

/178/

Yén di nu né mapamitra,

da suhud mangayatnain,

sinya sagét padha kéto,

pan padha nggawé piranti,

kénkén antuk ngitungin,

apanga dadi katungkul,

twara ada ngitungang,

manglawan awaké buwin,

ditu lawut,

pasangin daya upaya.

 

/179/

Ada né buwin ingetang,

tatelu karana polih,

saking pagelaran reko,

lén ada sakaring sugih,

saking pamitra buwin,

yén suba kéto sang prabhu,

pedas ida ngalahang,

sahanan musuhé sami,

ada musuh,

kéweh pisan mangalahang. 

 

/180/

Musuhé né lwihing wangsa,

kadi munyiné i tuni,

papitu kaucap reko,

karana sang nggisi gumi,

wiwéka sahi-sahi,

heda pati celap-celup,

mamagehang sasana,

puput sampun kapiragi,

tingkah ratu,

né pacang mangunang siyat. 

 

/181/

I Gusti mangkin kahendonan,

déning kawulané kidik,

tan wénten wénten pangrawos,

becikan mangalih kanti,

yan dingkén kasenengin,

ratuné genah mahencub,

mangdé sampun gelisan,

tampek musuhé nekain,

keni sampun,

I Gusti kuciwa daya. 

 

/182/

Gusti Agung mamatutang,

yan manah tityangé mangkin,

mangiring kadi pangrawos,

parandha mangalih kanti, 

wénten ratu asiki,

kereng malih liwat agung,

Cokorddha Jayasingha,

ririhé twara nandingin,

mula kasub,

saking dumun ring Jagatra. 

 

/183/

Ngodag panjak abalulang,

déning tityang dumun sasih,

wilang tityang boya habot,

yan ida rawuh ngantinin,

nah cahi Ketut Kenjing,

miwah cahi Padang Gambuh,

cahi kema majalan,

tongosin gelaré sami,

marep kawuh,

heda kurangan prayatna. 

 

/184/

Né bapa Wayahan Hambwak,

bareng kén Bapa Sampidi,

miwah bapa Wayan Gedot,

marep kelod manongosin,

ira majalan jani,

marek Cokorddha Ratu,

Singha Jayalengkara,

nira nunas pacang kanti,

Gusti Agung,

sampun puput mangandika. 

 

/185/

Sané kapangandikayang,

sampun dané mamisinggih,

tan kocap punika reko,

I Gusti Agung mamarggi,

watara telung wengi,

mangliwat alasé agung,

wus rawuh di Jagatra,

sang prabhu sedek katangkil,

para agung,

mamarek betén manegak. 

 

/186/

Hibek tangkilané hatap,

waluya twah gunung sari,

déning mirah pagencorot,

selut prabekelé sami,

sutéja pahyas ngendih,

déning anak agung agung,

kahotan soca mirah,

alunggwéng paramadani,

bagus-bagus,

sasolah kadi ring surat.  

(masambung....)