Puisi-puisi I Komang Alit Juliartha; Pradé Wénten
 |
| Sumber: weheartit.com |
Bapaké
Bapaké
Dot pesan
Makatang laut nyuang
Nguasayang
Bapaké
Obral makejang
Janji akranjang
Goar-goar kutang-kutang
Sajan?
Bapaké
Adéng-adéng majalan
Pang sing slimputan
Bibihé nak sing matulang
Aluh élah ngitukang
Bapaké
Dumadak ané kaorahang
Seken kalaksanayang
Yén mani puan
Sagét menék jabatan
Pang sing pocol satuané onyang
Nganti bangkeng kopingé ningehang
Féb/2018
Tetagihan
Ané alihin
Mengkeb ditu
Jejeh pesu
Ané kelidin
Nadak teka
Ngelut iba
Ané tagih
Tusing matanggu
Tusing mabucu
Ané ada
Paksa nguasa
Tuara saja
Waringin, Dés 2017
Pradé
Wénten
Pradé wénten
Icén titiang nunas
Satmaka tirta
Nyiratin rasa
Pradé wénten
Banggiang titiang makta
Pinaka dipa
Nuluh alas madurgama
Pradé wénten
Titiang misadia
Nyaga upapira
Kalaning lahru masa
mademang toya
Kala sumilir makta riris
tedun membah ring pertiwi
Irika titiang ngaturang
Sekaring mandala utama
Labadee, 2018
Mémé
(Padidi nungkulang sebet ati)
Joh tiang lakar nyidang mayah
piutang tekén Mémé
Bas kaliwat alpaka tiang malaksana
Matungkas nungkasin sapituduh Mémé
Mesuang munyi ané nyakitin
keneh Mémé
Mambul-ambulan ngemasin nganti luas
uling jumah
Ampurayang tiang, Mé
Tiang tusing inget sia bulan mémé
baat ngaba tiang maidehan di tengah basangé
Nganti tiang lekad Mémé las ngemang
tiang susu satmaka tirta utama
Nganti suba nyidang majalan Mémé
tekek ngisiang tiang apang seken nawang rurung
Neked jani tiang suba nawang
pajalan idup kéwala tondén nawang mayah makudang-kudang yasan Mémé tekén tiang
Adaké Mémé nagih apang tiang mayah
utang
Adaké Mémé nuntut apang tiang mayah
ento makejang
Tiang merasa
Tresnan Mémé tusing mamerih
Tresnan Mémé sujati
Suci nresnain pianak buka tiang
Ngantos sakayang-kayang
Ngantos tanah ring karang wayah
Mlekut ragan Mémé mewali
matunggalan ring Hyang Tuduh.
Blancan, Kintamani, 18 April 2015
Penglipuran
Penglipuran genah nglipurang lara ati
Masliahan nyingak kaluihan Widhi
Alas tiing kaler kauh
Jarané banban majalan mangiterin,
dumun
Penataran pura
Pamargi adat,
Purwa dresta
Nyiriang kuna, désa
Krama sutrepti
Karang mamadu pinaka bukti
Sepi
Merdéka gumanti
Nyangkepin sahananing pamargi,
nguni
Kaptén Mudita padem iriki
Ring tengahing rana
Binginé nyaksiang
Kesiran angin ngampehang samian
Unduk indik payudan
Jengis masiat, puputan
2014
Coklat
Valentine
Yén sekenang ngaresepang
Coklat tuah ané ngawinang
Gigi sakit ngemasin nganti maguyang
Kéwala tios truna-truniné
mangorahang
Manis coklaté wantah nyiriang
Ané madan tresna lan sayang
Maadukan tur mabesikan
Ngametuang bagia ring kauripan
Coklaté jani makacakan
Liu anaké nanjenang
yéning kayun durus matumbasan
Bareng-bareng ngarasayang ngajak
gegélan
Manis coklat ring rahina kasih
sayang
14 Fébruari anaké nyantenang
Bangli, 3 Fébruari 2014
I Komang Alit Juliarthaembas ring Bekasi, 15 Juli 1991. Dané alumni saking program studi Pendidikan Bahasa Bali IHDN Dénpasar lan meneng ring Banjar Kubu, Kelurahan Kubu, Kabupatén Bangli. Kakawian-kakawiannyané marupa puisi, satua cutet, lan ésai kamuat ring surat kabar sakadi Bali Orti (Bali Post), lan Média Swari (Pos Bali). Cakepané sané sampun kawedar marupa pupulan satua cutet sané mamurda “Swécan Widhi” warsa 2015 lan ngamolihang hadiah Sastra Rancagé warsa 2016. Warsa 2016 dané ngamedalang cakepan marupa novél sané mamurda "Satyaning Ati" lan 2019 satua cutet mamurda "Antologi Ling". Ipun nyujur genah sunia Sukra Kliwon Watugunung, 29 Januari 2021.
No comments