Hardiknas 2021: Sampunké Para Guru ‘Merdéka Mengajar’?

Olih: Komang Sujana (Ki Jugul)

Sumber Gagambaran: id.pinterest.com

Menteri Pendidikan, Kebudayaan, Riset dan Teknologi, Nadiém Makarim, ngwetuang program Merdéka Belajar sané matetujon nincapang mutu pendidikan ring Indonésia. Nyantos mangkin Merdéka Belajar sampun wénten 10 épisode. Merdéka Belajar sané akéh kabaosang olih krama pamekas tenaga pendidik miwah kependidikan inggih punika Merdéka Belajar épisode I indik Asésmen Kompetensi Minimun (AKM) sané ngentosin Ujian Nasional (UN), épisode V indik guru penggerak, miwah sekolah penggerak pinaka program merdéka belajar épisode VII.

Majalaran program Merdéka Belajar pemerintah pamekas Kémdikbud mapangapti para guru prasida nincapang kaweruhan pédagogi, setata madué inovasi-inovasi nganutin panglimbak téknologi digital. Guru nénten ja tuah dados pendidik nicapang préstasi akademik sisia, nanging nglimbakang makasami poténsi sisia (Profil Pelajar Pancasila). Guru taler kaptiang mangda sida berbagi miwah berkolaborasi. Guru nénten ja tuah madué swadarma ngajahin sisia sakéwanten dados méntor majeng ring para guru lianan, saling ngwantu muputang pakaryan pamekas sané mapaiketan sareng teknologi digital.

Makasami program sané kawedarang olih Méndikbud Nadiém Makarim punika sampun janten mapangapti nincapang mutu pendidikan ring Indonésia. Napi malih manut ring hasil tés PISA 2018, préstasi Indonésia kantun doh ring sor yéning saihang ring 78 negara sané nyarengin.

Sané patut kabligbagang inggih punika napiké pemerintah sampun nguratiang pikobet sané wénten pamekas pikobet para guru nglaksanayang Merdéka Belajar? Napiké para guru sampun sayaga Serentak Bergerak, Wujudkan Merdeka Belajar sekadi téma Hardiknas 2021?

Kasujatiané satus ribu lintang guru ring Indonésia kantun statusné honorér. Para guru ngaptiang mangda pemerintah nguratiang kesejahteraan guru tur sida kadadosang ASN. Pangapti punika sampun wénten pasaur madasar antuk program PPPK (Pegawai Pemerintah dengan Perjanjian Kerja) warsa 2021. Pemerintah jagi ngrereh kantos ayuta guru PPPK. Yadiastun sakadi asapunika taler kantun wénten pikobet, sakadi guru bahasa daérah durung janten kawéntenané ring perekrutan PPPK warsané mangkin. Mawinan ring portal Guru Belajar GTK Kémdikbud Séri Belajar Mandiri Calon Guru ASN PPPK nénten wénten pilihan guru bahasa daérah. Pikobet lianan metu saking guru honor sané anyar sané durung wénten ring data Dapodik. Napiké guru sané durung ngranjing ring Dapodik miwah durung madué NUPTK dados nyarengin program PPPK? Makéh guru honor sampun mayusa lintang ring 35 warsa kapiambeng ring sajeroning téknologi. Yéning nénten lulus tés napiké jagi setata salantang tuuh dados guru honor? Niki taler durung janten tinglas parindikané. Indiké punika ngawinang nasib guru honor pamekas guru bahasa daérah kantun durung janten utawi durung ‘merdéka’.

Pikobet salanturné indik kaweruhan téknologi digital. Ring pembelajaran jarak jauh (PJJ) sakadi mangkin kapisaratang pisan mangda nganggén média pembelajaran digital. Sakéwanten durung sami guru, sisia, wiadin sekolah madué piranti téknologi digital sané bécik, sakadi kantun wénten guru miwah sisia durung madué gawai, sekolah taler pamekas ring daérah 3T piranti téknologi sakadi komputer kantun kirang, napi malih aksés internét sané durung wénten. Lian ring punika akéh guru kantun kapiambeng ring téknologi, durung sayaga nganutin panglimbang TIK. Kawéntenan puniki sinah ngawinang prosés belajar-mengajar nénten prasida ‘merdéka’.

Program Merdéka Belajar matetujon mangda prosés belajar-mengajar mamargi bécik, guru miwah sisia seneng saha marasa aman ri kala malajah ngawénang para sisia madué galah nglimbakang sakancan kaweruhan miwah softskill. Sakéwanten pendidikan ring Indonésia durung prasida kabaos aman pamekas ring wewidangan konflik. Sakadi kasus anyar penémbakan kakalih guru ring Puncak Jaya Papua olih kelompok kriminal bersenjata (KKB) sané mangkin sampun kasengguh téroris olih pemerintah. Indiké puniki sampun sinah guru, sisia, krama, nénten madué rasa aman ngamargiang paplajahan ring sekolah.

Manut pikobet punika para guru pamekas guru honor saking Sabang kantos Mérauké kantun ‘kajajah’ indik kesejahteraan, téknologi, miwah rasa aman. Pemerintah mangda mastiang para guru ngrasayang ‘Merdéka Mengajar’ antuk nincapang program PPPK miwah CPNS guru, nincapang program piranti téknologi digital mangda digitalisasi sékolah sané pinaka sinalih tunggil program Merdéka Belajar warsa 2021 prasida mamargi becik, saha mastiang rasa aman pinaka pakantah para guru miwah sisia malajah ring sekolah. Merdéka Mengajar pinaka dasar Merdéka Belajar.

 

 

Komang Sujana (Ki Jugul)
makarya dados guru Bahasa Bali ring Buléléng.