Gitanjali (23)

Olih: Rabindranath Tagore

Sumber Gagambaran: www.flickr.com

/90/

Punapi sané jagi aturang titiang ring Ida Bhetara Yamadipati, duk Ida tedun ring kubun titiangé? 

Titiang jagi ngaturang takilan urip titiangé sané mebuntil ageng ring tamiun titiangé nénten metalang tangan Idané duk Ida mantuk. 

Mekasami pemupun angguré sané legit sané tedunang titiang ring raina masan ngaasin titiangé miwah wengi masan panes titiangé, batin titiangé mekasami taler sané punduhang titiang mekasami antuk urip titiangé sané bincuh, jagi aturang titiang ring Ida, duk sampun rauh tutug sengker titiangé pét Bhetara Yamadipati tedun ring kubun titiangé.

 

/91/ 

I Ratu sané pinih pungkura negepin urip titiangé, padem, padem titiangé, i riki durusang sampun tedun raris mekisi-kisi ring titiang. Sué sampun I Ratu antosang titiang; I Ratu sampun sané ngawinang, tampa suun titiang sekancan sedih miwah gargitan uripé. Mekasami sané wénten ring sikian titiangé, sané duénang titiang, sané acep-acepang titiang, taler baktin titiangé mekabungkul, setata membah ring anggan I Ratuné, ring tibuané sané singid. Antuk cecingak sané aseledétan tur sané pinih pungkura ring penyuryanan I Ratuné, ngawinang kantos ka wekas urip titiangé I Ratu sané nuénang. 

Sekaré sampun ketanding tur sekar tamané sampun nyukuh kanggén ring nganténé. Duk sampun meserah, nganténé jagi ngaonin kubun ipuné, raris tangkil ring Ida Sesuhunan ipuné, pedéwékan ring sepi singid wenginé. 

 

/92/ 

Uning titiang, bénjang pungkur jagi rauh taler, telas kelisat matan titiangé ring jagaté, nyelebseb uripé ngaonin titiang, raris ngusapang rurub kelupakan matan titiangé. 

Sekéwanten wenginé bintangé jagi mekemit, raris semengé kepit sekadi sané sampun-sampun, galahé megulung-gulungan sekadi ombak-ombakan segarané sané ngampihang soroh gargita miwah sedih manahé. 

Pét manah-manahin titiang tutug sengker titiangé, lung sampun antuka sané ngelantud-lantudin, raris ring sunar pademé ton titiang linggih I Ratuné, akéh medaging kewibuhan sané nénten kerenga. Kagungané megenah ring genahé sané pinih andapa, kagungané dados sané pinih néntena. 

Sekancan sané saat ipit-ipitang titiang miwah sekancan sané sampun keniang titiang bengayang sampun mekasami ical. Sané duénang titiang wantah artha branané sané duké dumun setata kutang titiang tur setata nénten rengaang titiang. 

 

/93/ 

Sané mangkin titiang sampun kelugra. Nikaang ring titiang mangda becik-becik memargi, inggih ida dané! Untukang titiang tendas titiangé, sané mangkin titiang ngelungsur mepamit. 

Puniki sereg kubun titiangé nénten titiang ngelungsur peduman ring kubun titiangé malih. Sané lungsur titiang wantah pengenikan duéné sané nyunyur manis. 

Sué sampun titiang ngiring ida dané mesandingan, sekéwanten punapi sané lungsur titiang akéhan ring punapi sané sida aturang titiang. Sané mangkin sampun nyaluk wengi, sampun padem taler suaré sané nerangin dedet kubun titiangé. Dedauhané sampun rauh, sané mangkin titiang ngelungsur mepamit. 

 

/94/

Astitiang apang rahayu pejalan tiangé mangkin, Nyoman! Langité barak, ampun galang kangin, ngulangunin rurungé ané lakar tuut tiang.

Ampunang sesed nakonang napi ané bekelang tiang luas merika. Tiang luas, liman tiangé metalang, nanging keneh tiangé bek misi acep-acepan. 

Lakar saluk tiang pepayasan rangkat tiangé. Ten ja lakar saluk tiang kudrang kelambin gegéndongé, tur kapi ja lakar kesengkalan, ten tiang lakar jejeh. 

Bintangé pekenyit galang yéning pejalan tiangé ampun tutug, sarin kidung sanjané ané sedih nika lakar kepit uli di kori agungé. (masambung...)

Catetan: Kabasabaliang olih Komang Berata lan kawedar antuk Sanggar Buratwangi warsa 2002