Bali Literasi Midabdabin Révolusi Industri 4.0

Olih: I Nyoman Agus Sudipta

Sumber: twitter.com

Pakibeh jagat mangkin sané kasengguh abad-21, sujatinyané ngaptiang mangda manusa sida nabdabang padéwékan ipuné nganutin aab jagat. Abad-21 mapangapti mangda manusa sida madué jnana sané utama, santukan punika anggén serana nyanggra tur midabdabin kawéntenan globalisasi. Manusa ring abad-21 kaaptiang pisan mangda madué kawikanan, luir ipun: 1) Berpikir kritis (critical thinking), inggih punika mangda prasida madué papineh sané tajep lan sida muputang sakancan pikobet nganutin wiwékajnana; 2) Berkomunikasi (communication), inggih punika mangda prasida mababaosan sané mardawa mawit saking papineh becik; 3) Kolaborasi (collaboration), inggih punika prasida ngwangun paiketan yadiastun matiosan wangsa, agama, lan adat istiadat sané kadasarin antuk rasa manyama braya lan paras-paros ngapti tatujon sané utama; 4) Berkréativitas (créativity), inggih punika mangda prasida nincapang swakirti sané mawiguna ring kauripan puniki. Kawikanan indik pakibeh abad-21, sujati dados bantang anggén midabdabin globalisasi sané sampun ngranjing éra révolusi industri 4.0. Kawéntenan révolusi industri 4.0 mapangapti pisan, mangda manusa sami sida madué kawikanan nganutin pakibeh téknologi informasi lan digital sané sayan nglimbak. Indik puniki sujati sané patut kadabdabin, mangda pamargi révolusi industri 4.0 nénten ngawinang pikobet. Punika mawinan kaluihan manusa patut pisan katincapang nganutin abad-21, utamanipun midabdabin révolusi industri 4.0.

Manusa pinaka prani sané luih madué Tri Pramana, luir ipun: sabda, bayu lan idep. Kaluihan sané utama punika mawit saking idep, santukan baburon wantah madué sabda lan bayu, raris entik-entikan wantah madué bayu. Yéning rerehang kawéntenan sarwa prani nénten lémpas ring bayu pinaka kauripan utawi prana. Bayu punika sané ngawinang sarwa prani prasida ngamargiang sakancan swadharma ring kauripan puniki. Indik bayu taler wénten ring Bhuana Agung lan Bhuana Alit sané munggah ring Panca Maha Bhuta. Dadosnyané, bayu dahating mautama pisan ring kauripan puniki. Napi malih bayu pramana ring manusa mabuat pisan anggén nincapang sahananing kaluihan sané wénten. Yéning manusa nénten égar lan seed pisan nincapang kaluihan sané kadasarin antuk bayu pramana sané becik, pastika tatujon sané kaaptiang nénten prasida kapanggih. Santukan bayu pramana gumanti kasujatian manusa sujana. Nganutin Sad Kértih silih sinunggil ipun mapangapti pisan sida kapanggih Jana Kértih punika manusa sané sujana.

Mangda kapanggih manusa sujana pinaka Jana Kértih manut panglimbak révolusi industri 4.0, patut pisan kawangun parikrama sané seneng melajah. Sakadi sané munggah ring Niti Sastra mangda setata ngamargiang taki-takining séwaka guna widya. Mangda selantang tuuh setata malajah sané kabaos long life éducation. Manut kadi daging geguritan Selampah Laku mangda sida setata “nandurin karang awak”. Sané anggén nandurin padéwékan wantah guna widya mawit saking seneng melajahin sastra. Parilaksana puniki manut pakibeh abad-21, kamargiang antuk parikrama literasi. Tatujon Gerakan Literasi Nasional (GLN) punika anggén nincapang lan nguripang pamargi literasi ring kauripan puniki sané kakawitin saking kulawarga, sekolah lan ring krama, anggén bantang pamargi séwaka guna widya mangda sida nincap karahayuan lan kasukertan ring jagaté puniki.

Literasi ring kulawarga kamargiang olih guru rupaka antuk parilaksana seneng ngwacén lan sida nyelagang galah rikala nyirepang alit-alitnyané antuk parikrama ngwacén satua. Taler mangda ring gria madué perpustakaan keluarga utawi ngarya pojok baca, sané kagenahang ring kamar tamiu, balé daja, balé dauh, balé dangin utawi genah becik masandekan lan mapupul sareng kulawarga. Literasi ring sekolah kamargiang olih guru pangajian rikala jagi ngawitin ngajahin ring kelas. Punika taler kamargiang ékstra sastra, jurnalistik lan téater pinaka galah lan genah para sisya melajah lan nglimbakang indik literasi ring sekolah. Literasi ring krama kamargiang ring wewidangan désa adat mangda sida nganutin program gerakan literasi masyarakat. Pamargi literasi ring wewidangan désa adat nganutin Peraturan Daérah Provinsi Bali Nomor 4 warsa 2019 parindikan Désa Adat ring Bali, Pasal 25 butir l, irika munggah indik kapustakaan lan taman bacaan. Puniki matatujon mangda kawangun perpustakaan ring wewidangan désa adat sajebag Bali. Taler punika munggah ring Undang-undang Nomor 43 warsa 2007 parindikan perpustakaan, kabaos irika mangda pemerintah pusat, pemerintah daérah lan masyarakat mautsaha ngawéntenang taman bacaan masyarakat lan rumah baca anggén nincapang budaya seneng ngwacén. Yéning sampun ring désa adat kawangun perpustakaan sané kapiara becik, pastika pamargi literasi sayan nglimbak mangda budaya nyastra sané sampun katami saking nguni sida mamargi antar lan rahayu. Taler ring pura, utamanipun ring Kahyangan Tiga, kagenahang buku indik sastra agama, mangda rikala para pamedek nyantosang pamargi pamuspaan sida nagingin galah punika antuk ngwacén buku. Sujatinyané pamargi budaya literasi patut pisan kadabdabin saking mangkin antuk bayu pramana sané égar lan seed pisan mangda kapanggih manusa sujana. Ngiring aptiang Bali literasi anggén midabdabin révolusi industri 4.0, mangda kapanggih Bali rahayu prayojana mahottama sujana (bayu pramana).