Tukad Tepi Siring Kangin

Olih: IDK Raka Kusuma

Gagambaran Manik Sudra

Di sisin tukadé ané membah di tepi siring kangin kota K-né Putu Widiastuti majujuk. Yéhé ané membah ngatebénang tlektekanga. Sing makijepan ia nlektekang. Teraké bulanan, ngranaang embahan tukadé sing suluk. Teraké bulanan, ngranaang batuné ané patrambiah sing ada misi lumut. Yadiastun aketulan. Teraké bulanan, nyinahang tukadé sing taén embahin gentuh. Teraké bulanan, ngranaang pajalan yéhé malégodan. Légodané adéng. Ujan ngripis uli das lemahé kanti semengan, sing ngranaang becat pajalan yéh tukadé. Kéto masi anginé ané ngusirsir, sing ngranaang légodan yéh tukadé mecatang.

Langité ané lad kaput gulem sayan galang. Warnan pelungné sayan ngilis ngenah. Sunaran ainé, angetné, rasaanga sayan ngliput awakné. Dingin ané ngaput déwékné, diastun sing sanget, sayan ilang. Unduké ento ngranaang Putu Widiastuti sayan nlektekang tukadé. Maangkihan ia, dugas nepukin kelapan warna bianglala di yéhé. Kelapan warnané ento sayan ngilis ngenah wiréh entéran suriané sayan ngéntér tur sayan ngranaang langit lan guminé galang. Di betén warnané ento, tingalina sayan ngilis warnan gambarané: pelung irung. Tingalina masi dasar tukadé ané marupa bias miwah krikil mawarna selem sayan cedang. Bé palang timah ané ladné sing tepukina, sayan ngenah mauber-uberan.

Sisiran anginé maretang. Bajunné ané kena tempuh maglibiran. Bokné kena kesiran nglibir. Ané pinih sangeta nglibir, piakan bokné ané di kenawan miwah ané dadi poni di gidatné. Apang sing macladukan lima kenawané anggona ngisi piakan bokné ané di kanawan.

Putu Widiastuti sing makrisikan, dugas kelapan warna bianglalané ngebekin yéh tukadé. Ia sing makrisikan masi, dugas kelapan warna bianglalané malingsé dadi warna bianglala lantang membat, adéng-adéng maangkidan uli tukadé tur ngamenékang. Sayan negehang. Sayan negehang. Napkala tegeh warna bianglalané suba asah tekén bataran panakul sisin tukadé tongosné majujuk, adéng-adéng nyujur awakné. Sayan maakang, sayan maakang. Sing makrisikan ia dugas warna bianglalané nglikub awakné makaukud.

Likub warna bianglala, Putu Widiastuti ngrasaang awakné ané suba anget sayan anget. Dugas angeté nglikub awakné maka ukud, Putu Widiastuti ngidem. Di kedatné ia makenyem. Buin limang pitehan jaum geles jam di lima kébotné, Putu Widiastuti maangkihan sawatara pang telu, laut matingalan kangin. Tingalina batu gedé patrambiah apit batu cenik liu tan kadi.

Dangin batu pinih kangin tukadé, bias membat entikin lempeni lan entikan lénan. Dangin biasé membat totonan, di tongosé tegeh, umah abungkul majujuk marep kangin. Umahé ento nglajur uli kaja ngelodang. Tembokné mawarna putih. Gentengné ucem warnané makejang. Delod dangin umahé totonan, di tongosé ané tegehan, palinggih ngadeg. Palinggihé ento masaput kain poléng. Dajan palinggihé punyan poh nglejer. Di muncukné pinjekan mapincer. Pincerané sing sanget, sing adéng.

Samar sawat, Putu Widiastuti ningeh munyin suling. Jangih angeringih munyinné. Anaké ané ngamunyiang sulingé buka anak sedih kingking kalahian gagélan ané tresnaina. Nadaksara Putu Widiastuti inget tekén misané ané dadi juru suling kléntangan di banjarné. Ané nyuling gending sedih sabilang peteng, krana kalaina tekén gagélané ngantén ajak anak muani lénan ané ngranaang.

Gruéngan munyin kapal terbang, makada Putu Widiastuti prajani nuléngék marep kangin. Di langité badangin tingalina samar sawat punyan nyuh majajar. Muncuk punyan nyuhé abedik sing maglibiran. Langit dangin jajaran punyan nyuhé warnan pelungné sing buka warnan langit di duur sirahné. Sing pelung irung ngenah. Pelung mueg ngenah.

Putu Widiastuti makejengan, dugas ningeh anak mageluran uli tukadé. Anaké ané mageluran toliha. Tepukina majujuk di duur batuné. Marep kaja. Ada sawatara solas depa johné uli tongosné majujuk. Anaké ento, anak muani.

Wiréh ané mara geluranga tekén anaké ento sing pedas dingeha, Putu Widiastuti ngantiang anaké ento mageluran buin. Buin dasa pitehan jaum geles jam di limané ané kébot, anaké ento buin mageluran. Sekenanga ningehang.

“Tiang dini ngantiang! Ané antiang sing teka! Orahin tiang tukad, orahin, buin pidan ia teka mai? Buin pidan?! sajaba idéwa, tukad, sing ada buin patut takonin tiang! Sing ada! Sing ada. Sing ada!”

Mendep akesep. Bengong. Buin mageluran. Munyinné sangetan tekén ané suba geluranga.

“Tukad, tukad! Gagélan tiangé, ané ngorahin ngantiang dini, sing taén piwal tekén semaya. Sing taén ngelong janji. Dija ja ngorahin ngantiang pastika nekain. Kacihnain baan ngaukin adan tiangé pang telu. Laut ngorahang: tiang teka, tiang teka, tiang teka! Sanggra tiang aji kenyem. Da nyanggra aji kenyem masem. Sanggra tiang aji kenyem manis!”

Buin mendep. Buin bengong. Paningalané ulenganga ningalin grobogan ning dangin damé. Grobogan ané membat lantang. Tan péndah langsé putih. Langsé sing taén mapiakan. Sing taén maélogan utawi magélohan.

Nlektekang anaké ané mageluran, totonan, Putu Widiastuti matakon tekén déwékné. Nyén, nyén antianga? Dadi soléh? Dadi di tengah tukadé ngantiang? Suba majanji mirib ipidan lakar kacunduk di tengah tukadé ténénan? Kacunduk mesikang tresna. Kacunduk mesikang awak lan keneh di umahé ané lakar tongosina bareng di subané mapawiwahan?

Buin Putu Widiastuti matakon tekén dewékné. Ngudiang anaké muani ento patuh tekén iraga? Patuh, pada-pada ngantiang. Binané anaké muani ento ngantiang di tengah tukadé. Iraga ngantiang dini, di sisi kauh tukadé ténénan. Ngantiang sing ulian nagih ngantiang. Ngantiang, orahina. Orahina ngantiang. Ané ngorahin ngantiang, patuh tekén anaké muani ento: gagélan. Tetujoné ngantiang, lakar mesikang tresna dadi paiketan alaki-rabi di subané makalah-kalahan. Makalah-kalahan suud mabia kaon di paengkeban. Di paengkeban ané tongosné sing tawang. Sing tawang, wiréh tondén kacunduk lan tondén orahina tekén gagélané ané lakar ngorahang teka. Teka lakar ngajakin ngrorod.

Putu Widiastuti nyekenang anaké ané mageluran ento. Pangadegné nyempaka. Bagus genjing. Bokné inggel buka embotan blayag. Selem. Tan péndah mangsi. Mabaju kaos lengen dawa. Warnané kuning rimrim. Buka warnan bunga coblongé. Macelana jeans. Masepatu mawarna pelung nguda. Ngandong tas. Tas ané gandonga mawarna selem. Masruet-sruet sakéwala warna sruat-sruétné sing ngilis ngenah.

Napkala angin nglibirang bok lan lengen bajunné, Putu Widiastuti buin ningeh anaké muani ento mageluran.

“Suba uli aminggu majujuk, uli tengai kanti sanja dini. Suba aminggu ngantiang. Sing masi teka. Ngorahin ngantiang dini sakéwala sing teka mai. Sing biasa ia kakéné. Sing biasa ia piwal tekén semaya. Sing biasa ia ngelong janji!”

Mendep akesep buin mageluran.

“Tukad, tukad, tukad! Dugasé bareng kuliah di Yogya, ia ngorahang dugasé cerik, satondén mandus ngajak idéwa ngorta. Taén ia mai, mapétang besen tekéñ idewa? Besen, ngorahang lakar teka mai, nyagjagin tiang. Orahin, orahin tiang tukad. Orahin, orahin tiang!

Suba aminggu ia kakéto di duur batuné ento? Mimih Déwa Ratu! Putu Widiastuti makeneh. Dija ia nongos dini? Ngelah panyamaan mirib dini? Mimih Déwa Ratu! Kodag baana aminggu ngantiang. Kodag baana aminggu gelar-gelur nakonang ané tresnaina teken tukadé. Kodag baana cara anak buduh. Yén idéwék da ka aminggu, buin mani sing teka jag kalian polonné. Iraga teka mai, disisin tukadé ngantiang gagélan ané ngorahin ngantiang, cihna tresnané sanget. Cihna sanget nresnain. Sakéwala di subané antiang, buin mani sing teka to artinné nirdon iraga nresnain. To artinné ia sing tresna tekén idéwék. Lamun suba kéto, ngudiang idéwék nresnain anak sing nresnain? Jag macuet suba uli dini.

Nadaksara anaké ento ngibehang awakné marep kangin. Nadaksara mabading. Putu Widiastuti nyeh. Mapan ia ngadén anaké ento nlektekang déwékné. Nyeh disubané nlektekang, nyagjagin déwékné. Laut menal. Laut mokpokin. Laut ngingsak.

Putu Widiastuti lega. Anaké ento sing nlektekang awakné. Anaké ento nlektekang langit. Nlektekang sambil masidekep. Nlektekang sing makijepan. Tan maa majengking. Tan maa mageluran.

“Langit badauh! Langit badauh! Di tongosé mapasahan ia ngorahang mulih ka kota palekadané dauh tukadé ené. Buin limang bulané tiang orahina ngantiang dini. Satondén ia teka sing baanga magedi. Ia ngorahang pasti teka. Ia ngorahang sing taén sing nekain yén ngorahin ngantiang dija ja!”

Ningeh gelurané ento, Putu Widiastuti ngrémon di keneh. Dadi patuh unduké ané nepén? Binané buin abedik, sing orahina ngantiang di tengah tukadé. Orahina ngantiang di sisin tukadé ténénan. Soléh hati jalemané. Awakné, jujukné sing patuh. Sikut busanané sing patuh. Isin kenehné mabinaan. Sakéwala patuh unduké ané nepén. Ané pinih patuh, gagélane paturu uli dini. Paturu uli kota dauh tukadé ené. Mirib ené pinaka bukti raosné ipekak mabinaan diguminé ené ada patuhné. Ané patuh diguminé ené ada binané. Patuh lan mabinaané sujatinné besik. matunggalan.

Anaké ento ngibehang awakné marep kelod. Limané makadua jengkinganga di bangkiangné. Paliatné nrawang sawang. Akesep paliatné kéto. Nu nyengkingang lima di bangkiangné, anaké ento nyureng batuné ané patrambiah kanti joh badelod. Patrambiah liu gati. Yén peték, kanti buin telun sing pragat. Ané makada, lantang tukadé sing sida baan nepain.

Bibih anaké ento makemikan. Putu Widiastuti sing nawang, apa ané kemikanga. Ningalin sebengné buka anak sebet, Putu Widiastuti tuah nebag. Nebag, anaké ento mesuang raos nyelsel déwék. Nyélsél déwék, duaning marasa nirdon ngantiang. Duaning marasa tresnané ané kaliwat sangat sing ajinina tekén gagélané ané kanti aminggu antianga.

Widiastuti buin nebag, ané raosanga aji kemikan bibih anaké ento kruna ané nyinahang keneh sebet. Sebet, krana tresnané pegat, pegat, ulian ané antianga megatin tan pakrana. Megatin, ulian linyok tekén semaya. Megatin, ulian ngelong janji di subané ngorahin ngantiang di duur batu tukadé. Megatin, ulian sing satia wacana tur tan pagatra.

Sapatutné, Putu Widiastuti ngraos di keneh, gagélané ngorahin utusan nekain anaké muani ento. Utusané ento, yén tusing papétina surat, papétina raos. Surat lan raos ané mastikaang lakar teka apa tusing. Lakar nyambung benang tresnané apa lakar megatang. Lakar ngalanturang tresnané apa lakar munggel. Lakar nunggalang tresnané apa lakar masahang. Masahang aidupan. Sepatutné, gagélané ngorahin utusan nekain anaké muani ento.

Tan maa, anaké ento mabading. Majujuk marep kaja, sing buin nyengkingang lima di bangkiangné. Nadaksara tujuh kenawané enjuhanga menek. Di subané tujuh kenawané tegehan tekén gidatné, anaké ento nulis di anginé. Putu Widiastuti nyekenang nlektekang apang nawang apa ané tulisa. Sakéwala sing nawang ia. Sing nawang masi, kénkéñ munyin tulisan ané gaéna tekén anaké ento di anginé. Kapin sing nawang, Putu Widiastuti ngéras-érasang: pasti katiba tekén gagélané. Pasti katiba kapining ané suba aminggu antianga di duur batu tukadé.

Apang nawang kénkén keneh anaké ento, Putu Widiastuti nlektekang muané. Sebeng anaké ento sing nyinahang sebet. Sebeng anaké ento nyinahang, sebet ané matumpuk-tumpuk di kenehné malecat kija kapa. Ané nglecatang gedeg ané metu nadaksara tur ngrudeg. Ngrudeg tan parérénan. Nerjak sakancan ané nemalangin. Paningalané, sing buin tingalina kuyu waluya anak mara seger uli gelem bulanan. Paningalané, kapin sing sanget, masunar. Nyinahang las caria kélangan. Diastun ané ilang gagélan ané suba satmakaanga sigaran awak lan kenehné. Ané sing sida ada ngelésang, kapin manusa sakti mulang pamegat tresna tekén déwékné miwah gagélané. Kapin balian siket mulang pangedeg kapining déwékné utawi gagélané. Kapin ada anak teka ngaba keris nagih ngamatiang déwékné utawi gagélané. Kapin makudang-kudang préman nekain tur ngorahin apang suud ngulat tresna dadi ulat-ulatan kinasih.

Munyin sulingé ané buin madingehan, ngranaang anaké ento ngrérénang tujuhné nulis di anginé. Ngranaang anaké ento ngidemang paningalan. Di ngedatné, lima kenawané selukanga ka kantong celanané. Putu Widiastuti nyekenang nlektekang ané pesuanga lan kebéranga aji limané makadua. Saputangan, sing marasa Putu Widiastuti ngraos di keneh. saputangan mawarna barak nguda, Putu Widiastuti buin ngraos di keneh. Napkala anginé ngusirsir anaké ento sayaga lakar nyongkok. Limané, makadua, nu manjer saputangan. Di nyongkokné, saputangané ané pucela aji lima kenawané laut anyudanga. Sing toliha saputangané anyud.

Adéng-adéng anaké ento nyegjegang awak. Di subané seken majujuk ia makecos lan makecos ngelodang. Ngecosin batu ané nges patrambiah. Sabilang ngenjek batu, awakné abedik sing maoyagan. Awakné tan péndah turus mapacekang di tanahé belus. Tekéd disisin tukadé paak kauh, sawatara limang depa uli tongosné majujuk, anaké ento makecos menék.

Dugas batisné ngenjek sisin rurungé, Putu Widiastuti nyledét anaké ento. Jeg-jeg awakné marep kangin. Sing makijepan nlektekang batu tongosné majujuk. Lima kenawané ulapanga pang telu. Lima kenawané tuunanga. Buin batu tongosné majujuk tlektekanga. Sing makijepan paningalané nlektekang. Sebengné nu nyinahang las caria kélangan gagélan. Tan maa anaké muani ento mabading. Laut majalan, majalan, majalan lan majalan. Gancang gati tindakané. Sing runguanga anak ajaka dadua nlektekang déwékné.

Nyledét anaké majujuk ajaka dadua ento, Putu Widiastuti ngeh, lénan tekéñ déwékné ada anak mabalih anaké ané mageluran ento. Nadaksara, ada kelebeh di kenehné ngorahin: anaké ané ajaka dadua ento. sinalih tunggil nawang pariundukan anaké ané mageluran di duur batu tukadé. Sing ngantiang tempo buin Putu Widiastuti nindakang batisné. Putu Widiastuti ngutsahayang tindakané sing ngranaang sangsaya anaké ané ajaka dua ento.

Maselat buin duang depa uli anaké ané ajaka dadua ento ia ngrérénang tindakan. Apang sing sangsayaina ia nyemak buku gambar miwah potlot uli koper cenik ané téngténga. Sonder matémpo buin, suud nyekolang koper cenikné, ia ngambar. Ané gambara bet ané membat dangin tanggun kangin tukadé. Gambara masi kedis ané ngencegin miwah kedis ané makeber uli kaja ngelodang. Sarwi ngambar ia ngoping ané raosanga tekén anaké ané ajaka dadua ento.

“Uli dija anaké muani busan?”

“Wedné seken sing tawang.”

“Uli pidan ia kakéto?”

“Uli aminggu.”

“Sangkal tawang?”

“Pitung dina ané liwat, sedek negak di warungé dauhné, anaké muani ento tepukin ka tukadé. Dugas majujuk di duur batuné ento, iang patitakon, lakar ngudiang ia ditu? Ento makada iang nyagjagin mai. Majujuk dini nlektekang ia.”

“Suba kéto?”

“Kaden ngudiang.”

“Lantas?”

“Gelur-gelur ia uli tongosné majujuk. Mapan tongosné mageluran sing joh, pedas dingeh gelurané. Buin maninné, buin puanné, buin teluné buka dinané jani ia mageluran. Ané geluranga patuh. Sakéwala nganyudang saputangan mara ituni.”

“Apa ané geluranga?”

“Unteng ané geluranga, nakonang tekén tukadé apa ané geluranga.”

“Dadi nakonang buin pidan teka?”

“Manut gelurané majanji kacunduk.”

“Ané nyanjinin kacunduk ditu nyén?”

“Ané luh.”

Teked ditu raosé reneng. Sarwi mapi-mapi ngambar, Putu Widiastuti ngésérang tlapakan batisné kelod buin telung késéran. Koper cenik gelahné depina. Di subané telung késéran ia majadengan. Nu mapi-mapi ngambar, sekenanga ningehang raos anaké ané ajaka dadua ento, ané kakawitin buin.

“Apa ya ngranaang anaké muani ento kakéto. Sing ya buduh?”

“Sing.”

“Sing? Awake nawang? Yén nawang orahin apa.”

Mendep akesep. Buin duang kijepang paningalan, ané takonina tur, ané orahina ngorahin, ngraos tabuh raosné sumeken gati.

“Anaké muani ento bareng kuliah ajaka gagélané di Yogyakarta. Limang bulan ané liwat, di subané maan gaé, gagélan anaké muani ento orahina mulih tekén reramané. Satondéñ ngalahin, gagélan anaké muani ento ngorahin ia mai buin limang bulané. Tur ngorahin ngantiang duur batu tukadé ené. Sing maang magedi satondén gagélané teka.”

“Dadi kéto?”

“Di tekané lakar ngrorod.”

“Endén malu. Gagélan anaké muani ento uli dija?”

“Uli dini. Lakar lanturang raosné.”

“Lautang.”

“Teked jumahné, gagelan anaké muani ento pajangkepanga ajak misané. Gagélana muani ento sing bani langgia tekén reramané. Telung bulan ané liwat, dugas masan ujané bales, gagélan anaké muani ento ngorahang lakar meli rujak.”

“Lantas?”

Reneng reraosané. Galahé ento anggona tekén Putu Widiastuti ngraos di keneh. Gagélan anaké muani ento ngorahang meli rujak. Seken ya rujak belina? Sing ya ngorahang meli rujak, tau-tau portas belina? Di lengi reramané, portasé campuhina sprite utawi yéh lantas inema?

Gagélan anaké muani ento buka kéto, pastika sing demen teken misané. Gagélan anaké muani ento buka kéto, krana marasa mapaksa majangkepang. Marasa mapaksa nemenin anak muani ané sing demenina. Nyén nawang, anak muani ané jangkepanga tekén déwékné anak muani beler. Nyén nawang misané ento nawang déwékné sing genten buin. Di nawangné, misané marasa matémbérang wiréh marasa maan lungsuran anak muani lén. Di subané marasa matémbérang misané mabalik némbérang. Lénan tekén saru-saruna, nyén nawang misané ngawai masesimbing lan maang raos ané nyakitin. Sing nyidaang naanang sakit ati, pesu dikenehné mragatang awak aji portas. Nyén nawang....

Reraosan anaké ajaka dadua ento buin kakawitin, ngranaang Putu Widiastuti suud ngraos di keneh.

“Payu gagélan anaké muani ento meli rujak?”

“Sing.”

“Sing?”

“Aa.”

“Men kija ia?”

“Ia nyujur jembatan tukadé ené.”

“Ngudiang ia kema?”

“Mulang awak ka tukadé.”

“Dewa Ratu! Mulang awak?”

“Aa. Wiréh dugasé ento blabar gedé anyud ia prajani dugas awakné ngenceg di yéhé.”

“Bakatanga sawané?”

“Sing.”

“Kanti jani?”

“Kanti sakayang-kayang.”

Buin reneng reraosané. Galahé ento buin anggona ngraos di keneh tekén Putu Widiastuti. Béh! pelih idéwék nebag. Kadén meli portas, tau-tau mulang awak ka blabar tukadé ené. Yén kéto, pastika sanget pesan sakit atinné. Pastika sakit ati tekén reramané. Sakit atinné sekeba di ati, wiréh sing bani kadanan alpaka guru. Pastika masi sakit ati tekén misané ané pajangkepanga ajak déwékné. Lénan teken sakit ati, sebet ia tan kadi. Sebet, krana ngelong janji. Kapin ngelong janji sing ulian déwékné. Ngelong janji ulian kapajangkepang. Lénan tekén sebet ia marasa pelih gedé. Marasa pelih gedé. Wiréh megatin tresna kapin megatin sing ulian déwékné. Megatin ulian nyak megatin. Nyak megatin krana nyak kapajangkepang.

Béh! amul ené linggah tukadé, diblabarné, apa buin blabar gedé inih becat palaib yéhné? Inih sanget geburan lan gulungan yéhné? Sing dadi sing apa ngencegin pastika anyudanga laut jungklemanga tur kelemanga.

Reraosané buin kakawitin. Putu Widiastuti nyekenang ningehang.

“Mimih, adi kétoanga ragané?”

“Iang sing nawang apa sekené ané makada. Yén jemak uli kasugihan, bek ngelah. Misané ané dadi kurenané, masi sugih.

“Endén malu. Lakar ada takonang.”

“Apa ané lakar takonang?”

“Dadi tatas nawang?”

“Ada ngorahin.”

“Nyén ngorahin?”

“Kanténan iangé, Putu Kartika. Gagélan anaké muani ento adinné. Putu Kartika nawang unduk adinné, adinné ané ngorahin. Kéto masi, Putu Kartika nawang anaké muani ané ngantiang di tukadé gagélan adinné, adinné taen ngédéngin potrékané.”

“Ngudiang ditu orahina ngantiang?”

“Ményél! Kadén suba orahin lakar majalan ngrorod. Lénan tekén ento iang orahina masi.”

“Apa buin orahina?”

“Putu Kartika, buin jebos lakar kacunduk ajak gagélané. Kacunduk dini di sisin tukadé ené. Di kacundukné lakar ajaka mulihné, lakar anggona kurenan. Adané seken sing orahina. Adana orahina Tu Wid.”

Putu Widiastuti makesiab ningeh raosé ento. Tuwid, adan ané sambata tekén Putu Kartika nyabran ngaukin déwékné. Baan makesiabné. Potlot lan buku gambaré sing rasaanga ulung ka tukadé.

Amlapura, 2013-2016

IDK Raka Kusuma
embas ring Getakan, Klungkung, 21 Novémber 1957. Dané nyurat makudang-kudang puisi mabasa Bali, satua bawak, esai basa Bali, miwah novélét mabasa Bali. Lianan ring punika, dané taler nyurat puisi, cerpén, lan ésai mabasa Indonésia. Kakawian-kakawian danéné sané mabasa Bali kawedar ring Bali Orti (Bali Post), Médiaswari (Pos Bali), Bali Aga, Jurnal Kawi, miwah Canang Sari. Lan kakawian dané sané mabasa Indonésia kawedar ring Bali Post, Nusa Tenggara, Karya Bakti, Warta Bali, Nafiri, Warta Hindu Dharma, Minggu Pagi, Kedaulatan Rakyat, Mimbar Indonésia, Suara Nusa, Pikiran Rakyat, Suara Karya, Sinar Harapan, Berita Buana, Républika, Singgalang, Analisa, Cak, Kolong, miwah Romansa.Ring warsa 2002 dané ngamolihang Sastra Rancagé antuk baktin ipun ring pangembangan sastra Bali malarapan antuk Majalah Buratwangi lan taler 2011 antuk kakawiannyané sane mamurda “Sang Lelana”. Ngamolihang Penghargaan Widya Pataka saking Gubernur Bali warsa 2012 antuk cakepané sané mamurda “Bégal”. Sareng pangawi saking Karangasem dané ngwangun sanggar sané mawasta Sanggar Buratwangi, lan dané taler dados silih sinunggil pangremba ring sanggaré punika.