Pageh Kantos Mati

Olih: I Wayan Kuntara

Sumber Gagambaran; pixabay.com

Kala punika suryané wawu metangi saking pasirepannyané. Anginé nglinus ngiterin sarira, ngrasuk ngetisin ati. Pantun gadang miwah sarwa taru maégolan nuutin desiran angin. Sunaran suryané ngendihin kauripan sané prasida ngangetin jiwa. Katimpalin suaran kedisé saling sautin, suaran suryak kaléng magantung, lan suaran pindekané malingser di duur capil lelakuté. Duh, asri tur nganyudin ati. Ring kubu maraab ambengan kacingak anak lanang lingsir sané nénten sios mawasta Pekak Pageh. Irika ipun negak ngaduk-ngaduk kopi anget sinambi ngisep roko. Ah, jeg masepuk andus kopi ajak rokoné saling kilit.

Pekak Pageh ipidan polih makarya dados pegawai tetap ring hotél bintang lima tur irika ipun akéh polih gaji. Yadiastun asapunika, Pekak Pageh durung madué rabi kantos mangkin tur idup wantah adiri. Rasa jejeh ipun maekin anak istri sané makada. Sinah sampun Pekak Pageh wibuhing arta brana, akéh madué tabungan. Mawinan sadina-dina jinahnyané wantah kaanggén prabéa ring carik miwah masliahan ka tajen. Akéh anak maosang ipun nuduk jaum kilangan kandik, duaning ipun ngutang pakaryan dados pegawai hotél sané gajiné akéh. Rasa liang Pekak Pageh nénten kapolihang saking pakaryan punika. Ipun marasa liang yéning ngambil pakaryan ring carik tur masliahan ka tajen. Pekak Pageh anak susila, subhakti, lan barés pisan. Pantun sané katandurin ipun yéning sampun manyi, kaselip dados beras, lan atenga saking pikolih manyi punika kaicén ipun ring anak tuara sané wénten ring désan ipuné.

Sedeng itepé ngopi sinambi tan surud nglepus-nglepusin andus roko ipuné, rauh Bapa Gedé, pajalané magegésonan di pundukané nuju kubu nyagjagin Pekak Pageh. Neked ring kubu Pan Gedé kauk-kauk matakén kapining Pekak Pageh.

“Pa... Pa… Éngkén suba ada nyet lakar ngadep tanahé ené?”

“Dé, suba sesai Bapa ngorain, kadung ja apa aba Dé mai, nyén ja ajak Dé mai, Bapa sing lakar ngadep carik tetamian panglingsir Bapané né. Bapa mabéla pati ngirtiang tanah Bapané ené. Bapa suba maketimun pait tekén reraman Bapané ipidan.”

Kadi asapunika Pekak Pageh nyawis pitakén Bapa Gedé sané geginannyané pinaka makelar tanah ring desané. Minab sampun ping limolas ipun ka kubune Pekak Pageh ngaba munyi manis mangda Pekak Pageh ngadol carik ipun. Sakancan utsaha sampun kamargiang olih Bapa Gedé. Nyanjiang lakar ngalihang Pekak Pageh kurenan, numbasang sakancan papayasan bungah, ngupahin bodyguard anggén nyejehin Pekak Pageh, miwah sakancan utsaha sané lianan. Nanging kantun nénten ngawinang Pekak Pageh makirig yadiastun gedé gegodané.

Bapa Gedé taler kantun durung makirig, santukan ipun sampun biuta tekéning jinah sané pacang kapolihang saking invéstor yéning mrasidayang ngrumrum Pekak Pageh ngadol cariknyané. Ipun setata kedék saha nglanturang nyawis bebaosan Pekak Pageh.

“Hahaha... Pa… Pa.. reraman Bapa nak suba mati, tusing kal tawanga Bapa ngadep tanahé ené. Melahan adep suba Pa. Nak lakar anggona nyujukang villa. Pang ada tongos torisé pules salami ye nongos di Bali. Kan luung Pa, idup dadiné pariwisatané di Bali yén bek ada toris ka Bali.”

Asapunika bebaosan Bapa Gedé, nglantur Pekak Pageh nyawis.

“Yadiapin reraman Bapa suba mati, kéwala semayané tusing dadi milu mati. Né angkihan bapa dadi saksi, ngantos Bapa mati Gedé tusing lakar nyidang makatang cariké ené. De... ingetang pertiwiné, eda tuah inget pipis dogén! Silih tunggil tetujon torisé ka Bali to nak lakar ningalin kawéntenan carik Bali sané asri. Yén telah cariké kajujukang beton sinah makelo-kelo sing kal ada aliha buin torisé ka Bali. Biin abesik, sing kuangan tongos pules apa torisé di Bali. Kan suba liu ada hotél wiadin villa di Bali. To gén sing telah ban ye mulesin. Jani magedi suba uli dini Dé! Pocol yén Gedé tuah lakar ngorta kéto ajak Bapa.”

Bih, panes pesan Bapa Gedé mirengang. Ri kala majalan ngamulihang, paliatané Bapa Gedé nelik nyingakin Pekak Pageh, tujuh limané ané tangébot setata nuding Pekak Pageh sinambi ngraos ngajak Pekak Pageh.

“Nah Pa. Tolih mani nah, eda kauka cang Gedé yén sing nyidang makatang tanah Bapané. Tolih buin mani Pa!”

Asapunika bebaosan Bapa Gedé kapining Pekak Pageh. Nanging Pekak Pageh kantun dabdab kenehné sinambi nglantur nyiup kopiné sané ngancan émbon saha itep nglepusin andus rokoné sané kantun atugel. Ipun nénten ajerih, sawiréh ring manah ipun semaya punika pinaka wecana sané sampun sapatutnyané kamargiang. Yadiastun sakancan baya lan gegodan pacang ngrauhin. Mabéla pati pacang nyaga kawéntenan tetamian cariké satmaka ngirtiang tanahé sané wénten ring Bali. Duh pageh pesan Pekak Pageh sekadi wastannyané.

Rahinané bénjang Bapa Gedé nunas tulung kapining Jero Bendésa mangda sida nulungin ngrumrum Pekak Pageh. Drika Bapa Gedé ngakuang jinah akéh majeng ring Jero Bendésa. Gedé-gedé pisan ortané Bapa Gedé masemaya pacang ngawi désané maju, taler sida ngwetuang genah pakaryan majeng Krama Désa yening Pekak Pageh kayun ngadol carik ipun. Jero Bendésa cumpu tekéning munyi manis Bapa Gedéné. Nglantur sang kakalih nuju kubuné Pekak Pageh. Saking semeng kantos lingsir Bapa Gedé lan Jero Bendésa ngrumrum Pekak Pageh tusing masih nekaang punapa-punapi alias mamocol, mawinan Pekak Pageh kantun pageh ring baosnyané.

Kacarita mangkin sampun awuku Pekak Pageh nénten mrasidayang ka cariké krana sungkan. Bapa Gedé taler sampun awuku glindang-glindeng ngliwatin kubu Pekak Pageh nanging nénten ngamanggihin Pekak Pageh.  Kocap sampun asasih sungkan Pekak Pageh sayan rahat. Pantun druéné tan parungu. Pundukané sampun bet olih entikan padang gajahé. Langité remrem tan pasurya, anginé wantah ngesirin taruné dabdab. Botol kaléngé lan pindekané di duur capil lelakuté sedih tan pasuara mangantosang sapangrauh Pekak Pageh.

Salanturnyané, ring rahina pangawit sasih sabeh ageng tan pasurud. Endihan tatit ngiringang suaran kerug sané ngejerang jagat. Kawéntenan punika satmaka nyihnayang jagaté sedih. Wenginé punika wénten orti Pekak Pageh sampun padem mawinan sungkan rahat taler yusané sampun séndéh kauh.

Sawatara wénten kalih wuku sawusan pademnyané Pekak Pageh, Jero Bendésa ngamargiang sangkep banjar ring Balé Banjar. Sangkep punika kasarengin olih Prajuru Désa taler Krama Désa, sané maosang indik kawéntenan tanah druén Pekak Pageh. Mawinan manut ring awig désa, yéning kawéntenan sakadi Pekak Pageh sané nénten madué preti sentana, samaliha ipun nénten wénten namiang wasiat, sinah sampun tanah Pekak Pageh punika kadruénang olih désa. Jero Bendésa ngamargiang sangkep punika sujatinyané taler matetujon mangda pangrencana corah dané sareng Bapa Gedé prasida mamargi. Ring pasangkepan Jero Bendésa mabaosan majeng ring krama tur ring arep prajuru makasami sané rauh.

“Majeng ring Prajuru Désa, punika taler Krama Désané sami. Duaning tanah Pekak Pageh sampun sah mangkin kadruénang olih désa, samaliha nénten wénten sané ngupapira, titiang manados Bendésa ring désané puniki madué pikenoh. Sapunapi yéning tanah Pekak Pageh kaadol ring invéstor? Niki sampun wénten invéstor saking luar sané jagi numbas tanah punika pacang kawangun villa. Kawéntenan puniki pacang prasida ngwantu payuk jakan iraga, taler prasida ngwetuang genah pakaryan majeng Krama Désa, tur sida ngawi désa iraga puniki maju wiadin kaloktah. Punapi kraman titiangé sareng sami?”

Mirengang bebaosan Jero Bendésané sakadi punika, ngawinang Bapa Gedé gargita pisan ring keneh ipun. Krama tiosan wantah pakrimik, santukan wénten sané cumpu lan nénten cumpu. Wénten sagetan silih tunggil Krama Désane mawasta Bapa Subhakti ngunggahang tangan ipun saha mabaosan.

“Om Swastyastu Jero Bendésa miwah Prajuru Désa ring ajeng sané wangiang titiang, tur para Krama Désané sané tresnasihin titiang. Titiang uning bebaosan Jero Bendésa iwau becik pisan tetujonnyané. Nanging titiang nénten nyungkemin yéning tanah Pekak Pageh punika pacang kaadol napi malih kaanggén ngwangun villa. Sinah ngawi Pekak Pageh sané sampun dados Bhatara Hyang pacang duka. Titiang uning pisan sapunapi Pekak Pageh nyayangin tetamiannyané punika. Ipun ngirtiang tanahnyané mangda nénten kaadol miwah mangda setata marupa carik, nénten tios. Iraga sareng sami sampun uning asapunapi beciknyané parisolah ipun saenuné maurip majeng krama sami, nénten mabuat malih titiang nlatarang maka siki. Yéning nénten wénten sané ngupapira, taler mangda tanah punika ngwetuang genah pakaryan, tur ngawi désa maju wiadin kaloktah, titiang pacang ngontrak tanah Pekak Pagehé punika. Tanah punika pacang kantun kadruénang olih désa, titiang wantah ngontrak. Pacang titiang dadosang agro wisata. Yéning sampun asapunika, sinah sampun tanah punika kantun marupa carik. Salanturnyané prasida taler ngwetuang genah pakaryan sané mabuat majeng krama, tur sida ngawi désa puniki maju wiadin kaloktah.”

Mirengang baos Bapa Subhakti sakadi punika, prajuru miwah kramané makasami nyakapwakang tangan saha marasa angob taler cumpu sareng napi sané kabaosang Bapa Subhakti. Bapa Subhakti anak mula sugih ring désa, nanging ipun tusing taén sombong lan setata lascarya matulung. Ipun setata rungu ring kawéntenan désan ipuné. Duh, satmaka swécan Hyang Prama Kawi, ilang sané pageh, embas sané subhakti. Pekak Pageh mangkin sampun makenyem ring Sunia Loka. Karma becik ipun saenuné maurip prasida ngwetuang phala sakadi pangaptin ipun. Carik genah nandurin pantun, boya ja beton.

Lian carita, mirengang bebaosan Bapa Subhakti ngawinang Bapa Gedé tan binayan kadi kebo mabalih gong. Ipun wantah bengong, tan prasida ngraos, nénten prasida nglawan, napi malih ngwetuang daya corah mangda carik Pekak Pageh prasida kawangunin villa. Sané mangkin Bapa Gedé sampun makirig makelarin carik Pekak Pageh. Nanging parindikan punika nénten ngawinang Bapa Gedé wusan ngambil karya makelar nanjénang tanah Bali ring invéstor. Ah, uripé wantah sakadi asapunika. Becik kalawan kaon, rwa binéddha setata madampingan, nanging karma phala nénten pacang makijapan.

I Wayan Kuntara
Magenah ring Désa Bedulu, Kecamatan Blahbatuh, Kabupatén Gianyar. Alumnus Himasaba Undiksha warsa 2011. Sané mangkin makarya dados Penyuluh Bahasa Bali.