Lawat-lawat; Nilem

Olih: IGA Darma Putra

Sumber Gagambaran; id.pinterest.com

Endih bulané dadi sundih yén guminé peteng dedet. Endihané ento patuhanga cara anak dueg tur putra suputra. Yén putra suputra ento endihan, kulawargané koné dadi peteng. Anak suputra koné ané lakar dadi lampu, tur ngalangin peteng dedet kulawargané.

Apa buin sedekan purnama, endih bulané bisa makalangan. Sakéwala yén suba panamaya tilem, ditu bulané lakar kilangan caya. Tusing ada endihan bulan ané ngalangin peteng dedet kulawarga.

Suba lantas kéto, ditu iraga mlajah buin mapanampén. Ngorahang tilemé tuah pajadeng bulané apang maan ngoyong. Ngoyong patuh tekén anak mangaso. Sing ada jelékné mangaso kapah-kapah.

Maangkihan masih kéto. Iraga ajaina apang mangaso maangkihan. Yén tusing ngidang mangaso maangkihan, oraina iraga ngulehang apang pajalan angkihané tusing cara biasané. Celepang angkihané uli song-song awaké ané tusing biasa, pesuné masih kéto.

Pajalan angkihan ané kéto orahanga pajalan pesu mulih. Uli dija ia pesu, uli ditu masih ia mulih. Mesib cara anak ngejang prabot, dija jang ditu jemak. Angkihan masih cara prabot. Ia ané anggon nglebengang sarwa ajengan ané macelep ka ukudané. Basang koné cara bungut paon ané morbor, angkihan ané ngupin-upinin apanga apiné ngedén-ngedénang.

Basangé masih oraina mangaso. Ulian terus ngajengang bé jaen-jaen, oraina iraga apang ngajeng don-donan. Yén bes makelo ngajeng don-donan, oraina iraga ngajeng nasi putih dogén. Ngajeng nasi putih nuutin purnama tilem. Di purnamané dadi ngajeng nasi putih limolas kepel. Bin maniné tuah dadi patbelas kepel. Bin puané, dadi telulas kepel. Terus kéto kanti tilem. Di tilemé sing dadi ngajengang apa-apa.

Ditu suba ajahina basangé apang mangaso. Lénan tekén basang, layahé masih mangaso. Sing ia pragat ngredek kemu mai ulian ngajeng nginum kéné kéto. Sing masih ia ngredek ulian mesuang munyi kéto kéné. Pokokné orain layahé apanga matapa mamegeng tusing ngudiang-ngudiang.

Ané paling kéweh miribang mangaso pules. Suba sabilang wai iraga biasa mulesang awak. Sing di petengé dogén, wiréh di lemahné masih misi iraga pules. Yén ngidang pules mulan jaen. Apa buin pulesé leplep sing ningehang apa-apa. Sing ningehang munyi tani karoan. Sing ningalin goba magenepan. Cutetné makejang oraina ngoyong.

Ngoyong di pedeman cara janiné mulan keweh. Iraga terus-terusan uber keneh padidi. Jeg magupuk kenehe pragat ngedotang kéné kéto. Yén tusing tuutin, ditu lantas lakar dadi panyakit. Panyakité masih tusing tawah-tawah wiréh orahanga iraga nyakitang keneh.

Kondén ada dokter ngidang ngubadin keneh ané sakit. Baang tutur apeti tusing mintulin. Baang baas ajakanan masih tusing ngutgut. Apa ja ubad keneh lénan tekén keneh? Keneh ento sakti. Ia ngaé sakit, ia masih ane ngubadin. [*]

IGA Darma Putra
embas lan magenah ring Bangli. Kakawiannyané kawedar ring makudang-kudang média, minakadi Bali Post, Pos Bali, Tatkala.co, Suara Saking Bali, miwah sané lianan.