Kolok

Olih: JM Pandé Putu Alit Antara

Sumber: id.pinterest.com

Cok cok cok, gasal gasal gasal, tluda, tluda, tluda, akéto uyut para bebotohé di kalangan tajené. Sang pekembar pacang siaga lakar ngalébang siapé ané lakar maadu. Sedekan ento siap ané lakar mapalu ulesné pada aéng tur ngagaokin. Ané sisi kangin siapé mabulu biing jambul godég rupa, ané sisi kauh siapé mabulu putih bang karna dimpil karo. I Wayan Godar kagiat kenehné mara nepukin siapé kadadua buka kéto ulesné, ia tondén bani metoh. Di sampingné ada anak tua ané ngorain ia apang ngetohin siapé ané biing.

“Hé.. Yan Godar, ento tohin ané mabulu biing, sinah lakar menang, bapa lakar ngetoin ento masi,” Wayan Godar tengkejut, sawiréh ada anak tua ané ngorain ngetohin siap biing, buina anaké tua ento nawang adané.

Pamuputné saja menang siapé ané biing, ngalahang siap putihé.

“Suksma bapa, suba ngorain tiang ngetohin siap biing, dadiné tiang menang satus tali rupiah,” kéto raosné Wayan Godar.

“Bapa masi maan ukupan korblah rupiah Yan, jalan jani ka warung Yan, bapa dot nginem arak,” akéto pacawis anaké tua tur sahasa ngisiang limané Wayan Godar ngajakin majalan ka warung dagang araké.

“Jero dagang tiang meli araké asloki,” kéto raos anaké tua ento tur ngenjuin dagangé pipis. Dagangé lantas ngenjuin arak asloki tur digelis kainem olih anaké odah ento.

“Yan kénkén dadi tusing meli arak? Bapa ané nraktir!”

Kacawis olih Wayan Godar, “Tiang tusing biasa nginem arak Pa, takut punyah.”

Katimbal olih anaké tua, “Ha... ha.. ha.. sajan Wayan belog né….! Nah tusing kénkén, buin mani bapa ngajain apang tusing punyah,” akéto raosné laut magedi ngojog kalangan tajené.

Di mulihné uling matajen Wayan Godar mapineh-pineh, adi nawang anaké tua ento tekén adané tur sabilang metoh setata menang. Pamuputné di umahné ia inguh ngenehang nyén sujatiné anaké tua ento. Buin teluné katemu buin Wayan Godar tekén anaké tua ento. Ia suba inget teken ciri-ciriné. Pengadegné tegeh, kumis jempé, bokné selem sada kekeh.

“Hé… Bapa buin katemu, kénkén kabaré?” kéto penyapa Wayan Godar, kacawis olih Bapa Botoh, “Né cening nu inget tekén bapa, ajanian seger oger, yén sing maan matajen bisa puruh bapané kumat,” akéto panyawisné.

Cok cok cok, gasal gasal gasal, dapang dapang, kéto iur munyih bebotohé ngebekin kalangané.

“Yan Godar, ento tohin ané ba daja, sinah lakar menang!” kéto Bapa Botoh nujuin Wayan Godar apang ngetohin siap brumbun ngalawan siap ijo. Pamuputné saja menang siap brumbuné ento. Wayan Godar maan ukupan satus tali rupiah. Ban sesai nuutin Bapa Botoh ento makrana ia terus menang metoh.

“Yan Godar, buin kesep yén suba suud tajené ajaka melali ka umah Bapané ditu di bongkol bukité daja,” akéto raosné Bapa Botoh.

“Nah Bapa, tiang apang nawang umah Bapané, sawiréh Bapa terus nulungin tiang kanti tiang menang terus,” akéto penyawisné Wayan Godar.

Di subané suud tajené, ditu Wayan Godar ajaka Bapa Botoh majalan ngajanang uling désa tongos tajené, nuju bongkol bukité ba daja. Teked ditu ia marasa makesiab, sawiréh umah Bapa Botohé malénan pesan. Umahné maraab ambengan, bentukné bunder mapintu abesik tur tusing misi jendéla. Ampikné nu aji tanah. Ditu ia ajaka negak di ampiké ané matatakan tikeh pandan.

“Nah Yan Godar, jani Bapa ngajain apang bisa nginem tuak miwah arak,” kéto raosné Bapa Botoh tur sahasa macelep mulihan lakar nyemak tuak miwah arak. Bapa Botoh nyemak limang botol arak tekén telung botol tuak, muang ngaba cangkir dadua ané antik jenengné.

“Né Yan cobain atengah cangkir malu!” akéto raosné sambilanga ngenjoin Wayan Godar. Pamuputné Wayan Godar bani nginem araké tuah atengah cangkir. Lén pesan ajak Bapa Botoh, nyidayang nginem petang botol arak miwah telung botol tuak. Wayan Godar makesiab tekén Bapa Botoh, ia marasa matimpal tusing ajak manusa, sawiréh yén manusa sinah suba punyah, akéto papinehné.

“Yan da tengkejut, Bapa suba biasa nginem dasa botol awai,” akéto raosné Bapa Botoh. Bapa Botoh ngaku ngelah pianak luh adiri, tur kurenané suba makelo ngalain mati. Buin jebosné sasubané suud nginem tuak arak, ajaka Wayan Godar malali-lali di pisagané Bapa Botoh, ané umahné patuh cara umahné Bapa Botoh.

“Nah jani Wayan mulih malu, suba makelo dini, né baanga ngidih siap dadua,” kéto raosné Bapa Botoh.

Ditu lantas Wayan Godar atuanga ka pamesuné tekén Bapa Botoh. Teked di pamesuné, dapetanga guminé suba sandikala, ditu ngénggalang Wayan Godar mulih ka umahné, kabenengan umahné tusing joh pesan tekén tongosé matajen.

“Bli Wayan, dadi mara Bli teka, ené suba jam kutus peteng kanti, biasané jam lima suba teked jumah,” akéto patakon kurenané sambilanga yagjagin ané muani.

“Luh kadung Bli maan melali kema sik Bapa Botoh, tur Bli baanga ngidih siap dadua, né jemakin siapé Luh, pejang ditu delod, tekepin aji guungan,” kéto raosné Wayan Godar, sambilanga ngenjoin siapé. Disubané ngejang siapé, lantas Luh Cablek ngaénang kurenané kopi.

“Né ngopi malu Bli! Jani baang tiang ngidih pipis anggon meli daarang nasi, uling tuni pianaké ajaka tatelu ngeling sing nyak madaar, pragat nagih beliang bakso,” kéto raosné Luh Cablek tekén kurenané.

“Nah da Luh sebet, né ada pipis satus tali rupiah, beliang apa sakitan pianaké! Bli beliang roko abongkos,” akéto penyawis Wayan Godar laut nyeluk kantong ngamaang kurenané pipis.

Sasukat Wayan Godar matimpal ajak Bapa Botoh, prajani hidupné matingtingan. Uling gaginané ngangon bébék, jani ané Luh masi suba ngelah warung kopi miwah ngadep jaja bali. Wayan Godar tetep ia sadina-dina ngangon bébék, sakéwala yén maan galah luung ia luas ka tajen. Siap ané baanga tekén Bapa Botoh ané mabulu putih kaadanin I Mayajaya, ento abana ka tajen tur tohina ayuta rupiah. Nasibné mula aget, siapé ento menang ngalawan siap biing jambul. Sakéwala siap putih ané menang ento satekedné jumahné tusing nyak neda, ngrungkukang pamuputné mati. Sedih pesan Wayan Godar tekén matin siapé ané sayangana ento.

Buin pitung dinané, teka Bapa Botoh ka umahné Wayan Godar, saha ngaba gapgapan biu telung ijas. Dinané ento sawetara jam lima nyoréang.

“Bapa dadi nawang umah tiangé? Nyén ané nujuin,” kéto patakonné Wayan Godar, sambilanga nyagjagin Bapa Botoh, lantas ngajak ka ampiké balé daja. Sautina tekén Bapa Botoh “Bapa matakon tekén pisagan ceningé”. Wayan Godar ngorain kurenané Luh Cablek apang ngaé kopi dadua. Di kenehné Luh Cablek bingung, adi dadua ngaé kopi? Tusing tepukina ada tamiu, sakéwala apang tusing nguyut ajaka ané muani, ia nuutin dogén tetagian kurenané. Makelo Wayan Godar matutur-tuturan ajak Bapa Botoh, sawiréh arang kacunduk di tajen. Sakéwala ia enu inget tekén legané Bapa Botoh ngamaang ia gagelaran “aji kepatining sata”, ento makrana ia tusing taén kalah yéning luas matajen. Pamuputné Bapa Botoh ngaraos kakéné, “cening Wayan Godar, tekan bapané mai wantah mapisarat pesan, apanga jani cening nyuang pianak bapané ané bajang anggon kurenan.”

Kacawis olih Wayan Godar, “Bapa tiang tusing nyidayang ngisinin pangidih Bapané, sawiréh tiang suba ngelah kurenan, miwah suba kapaica sentana tigang diri.”

Ping telu ping pat Bapa Botoh ngidih olas tekén Wayan Godar apanga nyuang pianakné. Sakéwala terus katulak tekén Wayan Godar. Prajani gedeg pesan Bapa Botoh, muané barak, batis ngejer, ditu lantas ia nyekuk Wayan Godar, suud nyekuk lantas ia magedi ngadébras.

Wayan Godar makesiab, sawiréh suud kacekuk ia tusing nyidayang ngomong, jani ia kolok. Ditu kurenan miwah pianakné inguh paling tekén unduké ané nibénin bapané. Suba mailehan Wayan Godar ajaka maubad ka balian-balian sané sidi di wawengkon gumi Bali, masi tusing seger ia. Pamuputné, minab suba panumaya ia seger oger sakadi jati mula, tusing ubadina jeg seger padidiana, bisa buin ngomong. Wayan Godar ngaraksa gelem kolok sawatara nem bulan. Di segerné makita masi ia ka tajené tur setata menang yéning ia maan metoh. Inget ia tekén pabesen Bapa Botoh, kakéné, “Cening Wayan Godar, melahang ngubuh siap Bapané ané mabulu buik tekén gagelaran aji kepatining sata sinah Wayan terus menang matajen, sakéwala menang metohé tusing dadi lebihan tekén ping telu.” Wayan Godar nu inget tekén gagelaran “aji kepatining sata” pabaang Bapa Botoh ané sujatiné wong samar, regepang japané ané setata ingetana, asapuniki:

“Ong idep aku Sanghyang Yamadipati

Anugraha pawisik patining sata ayam

Manjing maring adnyananku

Betél tingal kepatining sata ayam

Saananing ayam maring pajudén

Teka karaksa, kapatinnia dénku

Tan molah maring awakku

Wastu sidi mandi japa mantranku”

Gagelaran punika patut kabratain abulan pitung dina, ngajeng nasi putih toya putih, wus punika malih malukat nganggé toyan tukad, danu, pasih, klebutan 11 klebutan, bulakan miwah toyan campuhan tukad-pasih sané magenah ring pasisi kelod. Genah malukaté irika ring pamuunan sétrané, rahina nemonin Kajeng Kliwon Enyitan. Punika suba kalaksanayang olih Wayan Godar, ento mawinan gagelaran “aji patining sata” suba nyusup maring angga sariran ipun miwah sampun sidi mandi tur sampun kabuktiyang ritatkala Wayan Godar nganggén ring pajudén.

Mapewanengan nem bulan uling segerné, I Wayan Godar buin lalinina tekén nyamané Bapa Botoh. Ia melali ngajak kurenan miwah pianakné sawatara tuwuhné duang tiban. Ditu Wayan Godar inced ngorahin ngaénang kurenané Luh Cablek kopi tatelu. Kurenané buin marasa tengkejut sawiréh tawanga tusing ada tamiu dadi liu ngaé kopi. Sakéwala bes takutné ajak kurenané, payu masi ia ngaé kopi tatelu, lantas abana ka ampik umahné ba daja di tongos Wayan Godaré negak. Ditu Wayan Godar ngamaang tamiuné kopi padun besik tekén jaja-jaja bali. Kurenané Luh Cablek buin ngojog warungné sawiréh ada ané mablanja. Sagét wong samar ané matamiu ka umahné ia salah tampi, sawiréh pianakné tusing baanga pisuguh inuman. Ditu lantas wong samaré pedih sahasa ngaraos kakéné, “Ih cai Wayan Godar, dadi pianak cangé tusing gaénang téh! Sajan jelema tusing ngelah pangrasa, amonto suba tulungin terus di tajen apang kanti menang!”

Katimbal olih Wayan Godar, “Ampura Bli Gedé, tiang lali ngorain kurenan tiangé ngaé téh.”

Prajani wong samaré majujuk tur lantas ngomong, “Bah né cai sajan jelema merekak!” akéto bangras wong samaré, laut ia ngampok pipiné Wayan Godar nganti Wayan Godar nyeréndéng tur pungkat maglebug di ampiké. Ban gedegné lantas wong samaré ajaka kurenan muwah pianakné muliha tanpa sangkan.

Luh Cablek, kurenané Wayan Godar nyagjagin kurenané, sawiréh dingeha ada munyi maglebug uling di warungné, dapetanga kurenané suba niwang. Di subané Wayan Godar inget, sagét kurenané Luh Cablek makesiab sawiréh ané muani tusing nyidayang ngomong, tan pesangkan kena gering kolok. Ditu buin kurenan muwah kulawargané paling ngalih balian apang sida seger kolokné Wayan Godar. Miribang suba panumaya, maan Luh Cablek pawisik apang ngajak kurenané maubad ka balian sidi mandi ané ada di gumin Ubudé.

Jero Balian masemedi tur ngregepang Ida Sesuhunan sané kasungsung. Ditu Wayan Godar kadusdus baan dupa solas katih terus kaicén wangsuhan saananing paica sané kadruénang. Jeg prajani Wayan Godar pungkat tusing inget tekén déwék. Disubané ia nyidayang bangun tur inget, ditu Jero Balian ngaraos tekén Luh Cablek kakéné, “Nah Luh apang énggal kurenan Luhé seger, jani siap ané baanga tekén wong samaré lébang ditu di tukad campuhan Ubud.”

Kacawis olih Luh Cablek, “Tiang ngiring petunjuk Jeroné, mangkin tiang jagi mapamit.”

Malih jero Balian nyawis, “Nah énggalin mulih, terus siapé ento lébang di Tukad Campuhan Ubud, bekelin canang sari masesari jinah pis bolong 11 kéténg muwah dupa 11 katih.”

Disubané siapé kalébang di Tukad Campuhan Ubud, jeg prajani seger oger Wayan Godar, suud ngeraksa gelem kolok. Prejani ia majanji lakar suud dadi bebotoh tur suud lakar matimpal ajak wong samar. Jani gaginané Wayan Godar wantah dadi pangangon bébék, nyakap tanah carik, tukang uwut  muwah nulungin kurenané madagang di warung. Yadin bedik maan gunakaya, sakéwala kenehné nyak luungan tekén ané suba-suba matimpal ajak wong samar. Kulawargané jani pakedék pakenyung sawiréh tusing buin ada gagodan panyengkalén tekén wong samar.    

JM Pande Putu Alit Antara
embas ring Désa Tohpati Kabupaten Klungkung pinanggal 13 Juli 1970, dané pinaka guru ring SMAN 1 Semarapura. Saking kantun Sekolah Dasar (SD) ngantos mangkin seneng ring indik Budaya lan Sastra Bali, inggih punika seneng ngwacén lontar, nyurat aksara Bali, dharmagita miwah ngeripta satua cutet. Murda satua cutet dané sané naenin katerbitan olih Bali Orti mingguan Bali Post inggih punika Nyentana, Keris Pengantén, Kalulut Arta Berana, Ulian Pipis Panes, Ratun Joged. Naenin polih jayanti ring pacentokan “lomba inovasi pembelajaran SMA/SMK tingkat nasional” inggih punika jayanti kaping kalih warsa 2009 lan jayanti kaping tiga warsa 2011.