Gitanjali (22)

Olih: Rabindranath Tagore

Sumber: id.pinterest.com

/86/

Utusan I Ratuné, Widiadara, ngadeg ring embakan kubun titiangé. Dané ngelintangin segara sané durung naan wikanin dané raris rauhang dané dedauhan I Ratuné ka kubun titiangé. 

Wenginé dedet, manah titiangé jejep sekéwanten titiang jagi ngenjit suar dumun, ngampakang jelanan, raris nguntukang tendas ring dané pinaka atur pemendak. Utusan I Ratuné sané mangkin sampun tedun ring kubun titiangé? 

Dané jagi pendak titiang antuk sembah miwah toyan mata. Dané jagi pendak titiang raris genahang titiang kesugihan manah titiangé ring cokor danéné. 

Dané jagi mewali pét sampun ngemargiang karyan danéné, mekecagan lawat leteng ring semeng titiangé. Raris ring kubun titiangé, sané kantun wantah déwék titiangé melekeneng, pinaka aturan titiangé sané pinih ungkur ring I Ratu. 

 

/87/ 

Nyapih sampun manah titiangé, jagi rereh titiang ipun, mileh ring metén titiangé; sekéwanten ipun nénten panggihin titiang. 

Alit kubun titiangé, sané sampun keni ambil, yadin wau apisan, nénten perah jagi kekeniang malih. Sekéwanten purin I Ratuné ageng tur nénten metanggu, inggih Ratu Sesuhunan titiangé, raris duk titiang ngererehin ipun, rauh sampun titiang ring lawangan duéné.

Titiang mejujuk ring sor kereb emas ambara sandi kaon I Ratuné, raris titiang ngedatang matan titiangé sané meled pisan ngetonin I Ratu. 

Rauh sampun titiang ring simbangan kederikaané, ring genahé sané nénten wénten sané sida ical nénten wénten acep-acepan, nénten wénten bagia, nénten wénten taler pepatran prerai sané kanten ring toyan matané. Inggih, rarisang celebang sampun urip titiangé sané sampun metalang puniki, ring segarané, rarisang celebang sampun ring toyané sané pinih dalema. Banget titiang mepengelungsur, icén bantes apisan titiang ngerasanin embanané sané ngulangunin sané munyahin ring bhuana agungé mekabungkul. 

 

/88/ 

Ratu sané melinggih ring purané sané benyah megelaturan puniki, talin winané sané pegat nénten malih ngaturang sarin kidung indik kagungan I Ratuné! Tanggurané nénten malih neluktak galahé duké jagi ngarcana I Ratu senunggil wengi. Ambarané sepi singid, semaliha mangmung ring suter I Ratuné. 

Sayong masan sekaré sané ngumbara, tangkil ring linggih I Ratuné sané sintru. Ipun makta ortin sekaré sané nénten kantun malih katur ring I Ratu duké ngarcana. 

Pedekan I Ratuné sané setata ngelungsur wara nugraha, rauh sané mangkin durung kepica. Wenginé, duk sunar miwah lawaté awor ring kecud buké, sampun kenyel ipun, raris tangkil ipun ka purané sané benyah megelaturan, manah ipuné nyakit iseng.

Sering pisan sepi singid piodalan I Ratuné, Ratu sané melinggih ring purané sané benyah megelaturan. Sering pisan tegak piodalan I Ratuné rauh kepademan suar.

Akéh arcané sané wau kepuputang antuk sanggingé sané widagda, raris suciang ipun ring tukadé sané nirmala, sekéwanten nénten kélingan pét tegak piodalané rauh. 

Wantah I Ratu sané melinggih ring purané sané benyah megelaturan kantun durung karcana tur setata nénten kélingang. 

 

/89/ 

Sané mangkin nénten kantun umiung antuk atur-atur punget bangras sané kepit saking bungut titiangé sekadi asapunika sampun pikarsan Sesuhunan titiangé. Ngawit sané mangkin kantos ka wekas, mekisi-kisi titiang mebaos. Atur manah titiangé jagi keselediang ring sarin kidungé.

Ida danéné pati kepug lunga ka pasar Sesuhunan titiangé. Sané metumbasan miwah sané madolan i rika mepunduh. Sekéwanten titiang nénten polih merika, antuk bincuh titiangé ngambil karya. 

Bengayang sampun mangda kembang sekaré sané mentik ring tetamanan titiangé, yadin durung pingenan ipuné; taler bengayang sampun duk wau tengainé pelapan nyawané ngaturang sarin kidungé sané kepit saking kampid ipuné. 

Dauh-dauhan titiang nungkasang pemarginé sané becik miwah pemarginé sané kaon, sekéwanten sané mangkin sesenengan sewitran titiangé duké titiang nénten medué sané jagi keripitang titiang, inggih nuturang daging manah titiangé ring ipun; sekéwanten nénten uning titiang, punapi pikenoh dedauhané sané nadaksara puniki, sané nénten medué tetujon Sané sumeken. (masambung...)

 

Catetan: Kabasabaliang olih Komang Berata lan kawedar antuk Sanggar Buratwangi warsa 2002