Bongkling (CLXI – CLXVIII)

Kaketus saking manuskrip duwén Ida I Déwa Gdé Catra Karangasem 

/161/ 

Yadin tuwarawa,

héman pisan ban ngembarin,

janma tuyuh bwin mamogol,

hené ratu kalah buwin,

ratu pati dayanin,

bas manggelah daya liyu,

manyekjek tajin gelah,

patihé mawetu helik,

depin ipun,

gawénang ya pang masiyat.

 

/162/

Ratu né manyacad déwa,

padhané ring upadrawi, t

an urung ya bhrasta tinon,

bas twara nuhutang aji,

karana mangemasin,

déwa dhandhané katepuk,

ratu twara ngidhepang,

hujar bhatarané lewih,

twara gebug,

iya suba hénggal hilang. 

 

/163/

Ratu tan jenek di désa,

sing jalan-jalan malali,

di désan anaké mondok,

panjaké padha orahin,

magilih tundén ngiring,

maduluran buncal sangu,

né kéné papadhanya,

buka gajahé né bejit,

gedhé landung,

luwas ngendonin bowaya. 

 

/164/

Gajahé jwa masih kalah,

hento ya gedhé kén cenik,

kéto siptan nyané hento,

né liyu kalah ban kikit,

kalah ratuné buwin,

néné liyu nggelah musuh,

bas sahi kembulinya,

ngadu kakrengané jani,

pacang amuk,

pamuputa masih kalah. 

 

/165/

Ratu né twara bisa,

masiyat kalaning wengi,

kéné kalah nyané reko,

jalané kagebag wengi,

buka gowak kendonin,

ban cegingan lan katutu,

déning i kedis gowak,

twara tahén sabéng wengi,

buwin ratu,

tan pangiring satya dharmma. 

 

/166/

Mapuhara ya matukar,

tekéning né ajak kasih,

awaké sahi manglinyok,

twara pageh nang awahi,

krana twara da dadi,

sang ratu twara mamusuh,

mangalih kakasihan,

punika wilangin sami,

né rong puluh,

puput wus darthayang bapa.

 

/167/

Gusti Agung humatura,

Parandha durusang malih,

sampun nugelang pangrawos,

yan hengkén nyandang kasihin,

hengkén ratu né polih,

yan hengkén unggwané luhung,

punika ya ndikayang,

keni tityang sami huning,

Prandha Agung,

durusang malih ngandika. 

 

/168/

Sahur Ida Ganggasura,

nah buwin alihang koping,

pang hemed ningeh pangrawos,

né pesu bawu akikit,

anghing akéhan kari,

né ada cacakan ratu,

ajak makakasihan,

ratu né liwating sakti,

ratu sadhu,

demené kén kakasihan. (pacang kalanturang...)