Warsa Lami, Warsa Anyar Miwah Pandemi Covid-19

Olih: I Komang Alit Juliartha

Sumber Gagambaran; id.pinterest.com

Warsa 2020 sampun matilar. Makudang-kudang pamargi kauripan sampun kamargiang. Sapunika taler inggihan suka kalawan dukaning urip sakasiki mamargi ngicénin iraga sareng sami paplajahan. Gumanti minab nika sané dados unteng risajeroning warsa lami masalin ka warsa sané anyar. 

Sakémaon, ngantos mangkin kantun jagaté kaliput antuk gering agung virus korona sané mawit saking China. Minapta saking sasih Maret 2020 virus corona utawi ketah kasengguh Covid 19 puniki sayan nglimbak kawéntenannyané. Boya wantah ring China kémantén nanging mangkin sampun ring sajebag jagat. Indonesia taler keni. Bilih-bilih ring warsa anyar 2021 puniki sayan nglimbak gering agung covid-19 ring panegara iraga.

Indiké puniki gumanti banget ngawetuang pikobet ring masarakat pamekas sané makarya ring wawidangan perhotelan lan kapal pesiar. Akéh kramané nénten makarya utawi dirumahkan riantukan nénten wénten tamiu saking dura negara rauh ka Indonesia. Taler sameton sané makarya ring kapal pesiar kirang langkung 10 bulan sampun nénten makarya ngawinang nénten wénten prabiaya anggén serahina.  

Sujatiné nénten wantah ring perhotelan miwah kapal pesiar manten kadi keni kabrebehan, sakéwanten samian wawidangan. Minakadi ring sekolah, mangkin muridé ten malajah tatap muka. Sami nganggén daring utawi online. Yening murid sané sampun SMA utawi kuliah ten dados masalah riantukan sampun sapatutnyané murid SMA utawi mahasisya ngarereh ilmu praragan. Guru utawi dosén wantan nuntun tur ngicén pajalan. Nanging gumanti dados pikebot risajeroning murid SMP napimalih SD utawi TK sane kantun muatang peratian saking guru ring sekolah.  Yening jumah akeh sané nenten seleg malajah. Yapitui nyetor tugas, tugas punika minapta wénten anak sané ngarayanin. Niki taler dados masalah, yening guru rupaka makarya, sinah nénten mrasidang  serahina nimpalin okan ipuné malajah. Bilih-bilih wénten murid puriné ring pagunungan gumanti sukil pisan ngarereh sinyal. 

Sios ring perhotelan taler sekolah, UMKM taler keni. Akeh UMKM sané tutup sangkaning sepi. Ring sekolah taler keni, kantin sekolah tutup sangkaning nénten wénten murid masuk. Warung fotokopi, warung internét taler sepi. Krama sané madue utsaha kos-kosan taler sepi. Langah wénten murid utawi krama sané ngekost sangkaning sekolah nénten ngamargiang pembelajaran tatap muka. Akéh taler karyawan sané dirumahkan. Dadosné wusan ngekost. 

Ring rumah sakit taler sepi. Napi mawinan sepi? Masarakaté mangkin sada jejeh yening jagi maubad ka rumah sakit riantukan sadurung mapriksa musti rapid test dumun utawi maswab. Yening non-reaktit ten dados masalah. Sakémaon yéning réaktif nika minab sané jagi panjang pamarginé. Punika mawinan akéh masarakaté jejeh maubad ka rumah sakit. Telar wénten pembatasan pengunjung ring rumah sakit sané mawinan sepi ring rumah sakit. Tan ramé kadi dumun. Parkir sepi. Tukang parkir akidik polih rejeki. Kantin-kantin ring rumah sakit taler sepi.

Ring désa nénten kadadosang makarya kegiatan-kegiatan sané ngawetuang krumunan masarakat. Dadosné yéning ka pura nénten dados sareng akéh. Wénten pamargi siosan taler pateh. Kalayonsekaran, ngabén miwah sané siosan.

Gumantiné ring warsa 2021 pangapti patut gambel risajeroning kauripan. Pangapti mangda sida ical digelis virusé puniki. Taler digelis wénten obat kanggén senjata maperang ngalawan virus corona. 13 Januari 2021 sampun kamedalang vaksin olih guru wisesa. Presidan Joko Widodo pinaka sang sane kapertama mavaksin ngicén conto ring masarakat sapisanan ngrauhang indik vaksin puniki nénten ngawetuang pikobet siosan. Iraga pinaka masarakat patut ngawantu pamerintah ngicalang covid-19 antuk tetep ngamargiang protokol keséhatan risajeroning kauriapan. Pangaptiné wantah asiki, gering agung digelis ical taler jagaté sida mawali becik kadi jatimula. Masarakat mrasidang malih makarya, polih rejeki anggén ngamertanin kulawarga ipuné makasami. Dumogi.

Bangli, 14 Januari 2021

I Komang Alit Juliartha
embas ring Bekasi, 15 Juli 1991. Dané alumni saking program studi Pendidikan Bahasa Bali IHDN Dénpasar lan meneng ring Banjar Kubu, Kelurahan Kubu, Kabupatén Bangli. Kakawian-kakawiannyané marupa puisi, satua cutet, lan ésai kamuat ring surat kabar sakadi Bali Orti (Bali Post), lan Média Swari (Pos Bali). Cakepané sané sampun kawedar marupa pupulan satua cutet sané mamurda “Swécan Widhi” warsa 2015 lan ngamolihang hadiah Sastra Rancagé warsa 2016. Warsa 2016 dané ngamedalang cakepan marupa novél sané mamurda "Satyaning Ati" lan 2019 satua cutet mamurda "Antologi Ling". Ipun nyujur genah sunia Sukra Kliwon Watugunung, 29 Januari 2021.