Puisi-puisi Érkaja Pamungsu; CitraKara

Sumber Gagambaran; www.deviantart.com

Ané Kedat

 

di dangin

ada kedat, tangkahé nrugtug

nglambet angkihané tawah

nyampuh kampuhé tuh

matimpuh; matampih; matampah

 

di delod

ada ai matatakan ujan

kerugan ombak tusing nyidaang nambak

nyibak embatan benang samben

kelem; remrem; kerem

 

di dauh

campah-cumampah cauh-cauh

ngruguh ngajiang kabisan ring aji griguh

dong mekain ragané tan pabayuh

inguh; limuh; raja buduh!

 

di daja

pangkaja layu ulian tusing ada né ngugu

tani-tani sambrag tan patali

ali-aliné tan patampi

kapacal; kauntal; engsut di panggal

 

di tengah

kedaté kapah-kapah

nengok kangin natahé mabin

makipekan kelod tebané kipa

nyledét kauh uma-mel gebuh

nolih né kaja, tusing ada raja

 

kija?

kija, suryané enteg?

dija pacer guminé tan mapincer?

dija?

kadén kija, sing kadén dija!

 

Smaratunggal, Wrespati Paing Medangsia, panglong 7, ka 4, 1942.

 

 

CitraKara

 

mai,

selag punyan jagung kapaté ané pula bareng

ditu sekenang, nguwat pajalané tan palawat

 

bareng-bareng

krincingang tindakané melah

tiang,

nyuabang don jangung ané matebu,

ané makada iraga matemu

 

eda

kepung tanahé ngalintik ulung

ka tukadé

ka tungtung angkihané

 

antosang ditu

di betén punyan padang tuwuhé

medem malingkuh

caling, kukun, giginé kukuh

tiang kantun niti tuwuh

 

mai,

tuut sanané mamunduk

ingetang eda ngundap

pajalané nu joh, andap

mabatas kelir angkihan

matampih

 

CitraKara

ditu ingetang, antosang tiang

di pabinan silané

di betén punyan pinusé

guwat rupan tiangé

tatasang marawat

nyitrakara

Sang CitraKara

katampi Bhagawan Citra Gotra

 

Smaratunggal, Wrespati Kliwon, purnama kaa 4, 1942.

Erkaja Pamungsu
alumni FIB Unud, lan magenah ring Bangli. Mangkin makarya dados wartawan Media Bali.