Ngwacén “BABI BABI BABI”

Olih: Putu Oka Sukanta

Karya sastra miwah seni, maang ruang ané bébas katafsirang uli makudang-kudang sudut pandang, wiadin uli kénkén rasané anaké mamaca kakawiané totonan. Rasané totonan dadi tetujon karya seni, satondéné neked ka tetujon utama, ngenénin indik misi ané dot orahanga tekén pangawiné. Tiang percaya, tusing ada karya seni ané tusing ngelah misi.

Novél matebel 136 halaman ané katerbitang olih Penerbit MAHIMA, warsa 2020 ené, nyaritayang indik anak luh, murid SD kelas VI, beling. Ulian unduké totonan, bapané, Kondra gedeg tekén pianakné. Ia netes pianakné, tur kaplegéndang apang ia nyak ngaku nyén sujatiné ané melingin Ratna. Ulian maan munyi kasar lan kaplegéndang olih bapané, Ratna masaut: Babi! Babi! Babi!

Ené tuah ané makada kulawargané I Kondra biut. Kurenané, Murni tusing nyidaang ngorahang apa rikala nepukin kurenané kasar, ané ngaénang kulawargané sayan uwug. Kondra ngorahang yéning ané melingin Ratna tuah kucit. Kondra percaya tekén apa ané orahanga tekén Ratna: Babi, ané katulis misi tanda seru olih pangawiné. Ulian belingin kucit, manut panampénné Kondra, ia lantas ngelah rarincikan lakar nganténang Ratna ngajak kucit, lan kurenané tusing setuju. Ulian kurenané tusing satinut tekén Kondra, ia maan KDRT (Kekerasan Dalam Rumah Tangga, vérbal wiadin fisik). Konflikné ené kagarap rapi lan kakembangang olih sang pangawi. Murni maang kulukné ngamah bantené ané lakar anggona upacara pawiwahan pianakné buin maniné. Ratna, uli suud baang munyi setata ngoyong di kamarné, tusing milu-milu ngusak-asik konflik ané gaéna tekén pangawiné, Putu Supartika. Pamuputné, Murni tepukina ngantung iban di punya croringé.

Sekenké Ratna belingin kucit, cara pangakuné tekén Kondra? Ulian belingin kucit, ané lakar lekadanga tekén Ratna apaké kucit, manusa mawaak kucit, ané lakar ngaénang kulawargané lek?

Makejang undukné Kondra ané mlegéndang kurenané miwah pianakné tuah ulian ia pelih ngartiang munyiné Ratna ané ngorahang ibané belingin kucit. Unduké totonan macampur ngajak keneh bingungné, lan ento kaolah olih pangawiné. Kondra ané dadi penguasa tunggal di jumahné, tusing nyak ningeh munyin kurenané. Apaké ené réfléksi kenyataan lan kebenaran sosial? Yéning unduké ento beneh, perlu ada penghukuman sosial, moril wiadin hukum tekén pelaku kekerasan? Yadiastun novel ené tuah asil kayalan. Bisa dogén, buutné kulawargané totonan, tuah karma ané katerima. Tiang masih maan tatuek uli novelé ené, “Da ngawag-ngawag nampi munyin anak, yéning pelih lakar pelih masih penadiné.”

Ané melingin Ratna boya ja kucit, nanging bisa dogén anak muani ané mabikas cara kucit. Di Bab XVII, katulis: Ratna melahirkan pada hari Minggu sore. Ia melahirkan bayi berwujud manusia, bukan babi berkepala manusia, manusia berkepala babi ataupun seekor babi. Benar-benar bayi berwujud manusia, namun bayinya mati tersedak air ketuban.

Jakarta 8 Nop. 2020