Lulusan 2020

Olih: Kadék Sintia Érnawati

Sumber Gagambaran; greensboro.com

Semengan pesan, sawetara jam 05.30 bapa sampun negak di kursi tiingé sambilanga ngopi, duaning lakar ka tegalé mamula kacang. Lén tekén i mémé, iteh di paon ngaé ajengan nasi. Yén tiang, Luh Moglong sedek makikén lakar majalan masuk. Mapupur, masuah, maanci, kéwala bedik, apang sabates ngenah barak dogén bibihé. Girang pesan kenehé lakar majalan masuk, maan matepuk ngajak timpal, macanda ngajak timpal, buina maan matepuk ngajak Gedé Adi, gagélanné tersayang.

“Luh, mai nyampain malu!” omongné i mémé sambilanga bangkes-bangkes ulian bon goréngan sambelné. Ngénggalang tiang mempen buku pelajaran ka tasé, makeprés miik, nyanan yén matepuk ngajak Gedé Adi apang tusing mebo masem. Suba pragat makikén lantas ka paon tur negak di kursiné.

“Bapa suba majalan ka tegalé, Mé?”

“Suba Luh, apang nyak apa melah entikan kacangé kayangné. Néh ngajeng malu Luh!” kéto mémé sambilanga nyemakang nasi.

“Mih, bedikin Mé! Luh énggal-énggalan né. Bungkusang masé nasi Mé nah, lakar anggon bekel nyanan. Kelas teluné maan pelajaran tambahan, lakar énggal Ujian Nasional.”

Suba suud makejang, ngénggalang lantas tiang nyetater motor, duaning suba jam 07.00, buin kejep dogén bél masuk.

“NGÉÉÉNGGGG,” neked suba di sekolah SMA Negeri 1 Gerokgak, ngénggalang tiang markir motoré, lantas malaib ka kelas XII Bahasa 2. Mara neked pintu kelasé, suba ramé teka timpal-timpalé. Ada ané nutur-nutur, ada ané mabalih HP, ada masé ané kepung-kepungan, cara anak cenik dogén. Suba ngejang tas di bangkuné, tiang milu macerita-cerita ngajak timpal-timpalé, di kursi paling kuri di pojok kelasé. Wénten Gék Gita, Madé Sindi, Rahma, tekén Luh Budi.

“Éh, nawang sing timpal-timpal. Anak suba liu koné di Wuhan anaké positif corona ba!” kéto omongné Luh Budi sambilanga nelik paningalané ngomong.

“Nak sing ja di Wuhan dogén, ba ka negara-negara lén koné masé,” Gék Gita nyautin.

“Ow ba, tapi nak di Indonésia ondén ada koné, nak sing nyidaang macelep koné virusé ka Indonésia. Tenang dogén!” Madé Sindi nyautin sambilanga ngajeng goréngan.

“Méhh, nyén ngoraang?! Iraga harus hati-hati dogén masé!” Ondén pragat tiang nyautin lantas bélé mamunyi. “NÉÉÉÉTTTTTT” Nyiriang lakar kumpul di lapangan, duaning lakar ada pengumuman makejang muridé pada kumpul di lapangan. Kéto masé kelas XII IPS 1, kelasné Gedé Adi. Majalan tiang ajak timpal-timpalé di lorong kelasé, ngaliwatin kelasné Gedé Adi. Dengak-dengok tiang ningalin, tusing masé ada ngenah, kanti paling ngalih-ngalihin. Sagétan suba di lapangan ngamalunin.

“Selamat pagi Luh,” omongné Gedé Adi sambilanga makenyem manis.

“Iss Gedé, Luh paling ngalih-ngalihin di kelas, sagétan Gedé suba neked di lapangan malunan.”

“Hé hé hé hé... Maaf Luh. Dé nak uling main baskét busan ajak timpalé di lapangan. Pas bél langsung lantas ngoyong di lapangan. Eda naké gedeg Luh, nyanan lalininé ja ka kelas.”

Mara mirengang kéto, makenyem girang langsung tiang, bagia kenehé. Suba kéto, mabaris lantas iraga di barisan masing-masing kelasé. Liu pesan maan pengumuman, pengumuman mayah SPP, pelanggaran, Pemantapan sareng Ujian Nasional, nyantos pengumuman ngeninin indik baya corona. Lemet asan batisé majujuk makelo. Suba suud pengumuman, makejang murid-muridé ka kelas masing-masing. Yéning kelas tiangé pelajaran Bahasa Inggris sané simalu. Macelep kuping kanan mesu kuping kiri, ulian tusing bisa plajaran Bahasa Inggris. Suba lantas istirahat, tiang ngajak timpal-timpalé mablanja ka kantin, meli makanan ringan apang ada amikang di kelas sambilang nutur-nutur.

“Éh Gedé, suba makelo ngantiang Dé? Luh uling meli amik-amikan busan.”

“Sing Luh, Dé mara masé mai,” kéto pasautné Gedé Adi negak di bangku tiangé sambilanga ngomong-ngomong ngajak timpal muani-muani di kelas.

“Luh, mani sanja ka Pasisi Pulaki yuk, Dé sambilang mancing. Né timpal-timpalé bareng koné masé mani.”

“MILU!” kéto timpal-timpalé né luh masaut.

Gelisang carita, buin mani sanja teka Gedé Adi nyemput tiang jumah, lakar malali ka Pasisi Pulaki. Di jalané tiang ngajak Gedé Adi nutur-nutur sambilang negakin motor.

“Luh, kayang kelulusan corat-corét baju yuk?”

“Yuk Dé, pokokné baju Luhé kal bek misi tanda tangan timpal-timpalé. Luh kal nyait baju kebayak masé kayangné Dé, kal anggon pas acara graduation.”

“Mihh sajaan, Dé masé kal nyéwa jas anggon kayang to.”

“Ihhh, Luh ba sing sabar ngantiang kayang to Dé,” sambilang kenyem-kenyem.

“Men kayang ba lulus, Luh kal lanjut kuliah apa magaé?”

“Kenehé sih kuliah Dé, ngalih jurusan Bahasa Bali ukana di Undiksha. Luh ba sih man ngomong ajak orang tua, dan meréka ba setuju Luh kuliah.”

“Mai bareng-bareng kayangné daftar, Dé masé ukan ngalih Bidikmisi di Undiksha, kal ngalih jurusan Akuntansi. Nah ajaka men kayangné bareng-bareng daftar nyak. Ané jani Ujian Nasionalé gen malu itungang pang bareng-bareng nyidang lulus.”

“Nah Dé,” sambilang kenyem-kenyem pedidi ngelut bangkiangné Gedé Adi.

Énggal pajalan motorné Gedé Adi, sagét suba neked di Pasisi Pulaki. Timpal-timpalé suba pada ngantiang. Gedé Adi ngénggalang mancing ngajak timpal-timpalé né muani. Ditu ada masé Gék Gita, Madé Sindi, Rahma, tekén Luh Budi, lantas iraga maplalian bias di sisin pasihé.

“Ihhhh, ba sing sabar ngantiang kelulusan kayangné, astungkara ja makejang lulus,” kéto omongné Gék Gita.

“Pokokné sebelum kelulusan iraga harus menikmati detik-detik terakhir bersama. Patutné ngumpul-ngumpul, melali-melali pada, pang ada ceritaang mani ajak panak-panaké,” omongné Luh Budi.

“Saja to, sebelum paketéstés ajak makejang, ada né kuliah, ada né magaé, ada ané ka pesiar koné, pasti kal kapah tepuk,” kéto pesautné Madé Sindi.

“Hahahaha, kadén panak udang, téstés,” sambilang kedék tiang nyautin ajak timpal-timpalé né lén.

Rahma maplalian HP sambilanga ngomong, “Éh, nawang sing. Ba koné ada di Indonésia né positif corona ba, né di Bali adi orahanga ba ada koné masé positif besik!”

“Masak nyén? Ije man info to, sing hoax nyen to.”

“Sing Luh, né ba seken-seken beritané.”

“Bih, jeg takut bana. Nah saling jaga keséhatan gén ba men kéto, astungkara ja sing ngliunang!”

Énggal galahé majalan, kadirasa ngipi asané. Setiap hari ngancan ngliunang dogén anaké sané positif corona. Ring Jakarta, Banten, Jawa Barat, Jawa Tengah, Jawa Timur, nyantos Bali, énggal pajalan virusé, para dokter suba pada kualahan makejang. Inguh paling bana ngenehang, taukut bes kaliwat takut, duaning suba ada né ngalain ulian virusé ené. Ulian virus coronané ené masé makejang sekolahé libur 14 hari, anggén pencegahan apang tusing ngaliunang anaké positif. Tiap hari guru-guruné ngicén soal-soal onliné. Duaning umah tiangé di bongkol gunungé, kéweh pesen ngalih signal, kebyat kebyut signal HP-né cara kenehé sané rasayang jani. Sasampuné 14 hari, tusing ja medikang anaké sané positif, nanging ngancan nambah, nambah terus nambah ngaliunang. Liunan anaké ngalahin ketimbang anaké seger. Ento ngaénang liburé diperpanjang sampai batas waktu ané tusing nyidaang ditentukan. Makejang tempat wisata, hotél, kantor, tur sekolah-sekolahé tutup, makejang tundénanga stay at home, ngoyong jumah, magaé jumah, malajah jumah. Yéning mesu apang nganggon masker, tusing dadi mesu joh, jaga jarak aman, jaga kebersihan tangan. Ngancan gawat guminé jani ulian virus ané madan corona ené.

Sebet kenehé, makelo suba tusing masuk, sing nyidang metepuk ngajak timpal-timpalé. Suba iseng pesan masé tiang ajak Gedé Adi, makelo tusing taén tepuk duaning Gedé Adi ngoyong lén désa ngajak tiang, tusing bani mesu joh, tusing bani saling nglalinin. mih Ujian Nasional payuné ditiadakan, ngancan sebet kenehé. Énggal-énggal ja ilang virus coronané ené.

Sabtu, 2 Méi 2020, makejang murid-murid kelas XII kumpul di lapangan baskét. Bagia kenehé nyidaang matepuk ngajak timpal-timpalé, duaning suba makelo pesan libur ulian virus corona, buina matepuk ngajak Gedé Adi ané bakat isengang gati.   

“Dé, ketug bayuné ba, lulus ja iraga ow?”

“Tenang Luh, astungkara pasti lulus.”

Iraga makejang mabaris di lapangan baskét, ané jani kepala sekolahé ngamaang pengumuman.

“Sebelumnya diingatkan kembali untuk acara graduation akan dilaksanakan minggu depan pada hari Sabtu, 9 Méi 2020, diharapkan semua hadir sesuai dengan surat undangan yang telah diberikan. Baiklah anak-anak yang Bapak banggakan, kejarlah apa yang menjadi cita-cita kalian semua. Jangan pernah lupakan kami dan sekolah ini. Lakukan yang terbaik, dan semoga apa yang kami ajarkan selama ini bisa bermanfaat buat kalian semua. Selamat kalian semua dinyatakan LULUS 100%!”

Mih Déwa Ratu, girang kenehé sarasa melayang. Tusing karasa tiang saling gelut ngajak timpal-timpalé, ngeling ulian kendelé bes kaliwat. Gedé Adi masé ngelut sambilanga ngeling. Tiang taler timpalé ajak makejang saling corat-corét baju. Nino, Miko, Gedé Adi, Gék Gita, Madé Sindi, Rahma, Luh Budi, miwah ané elénan pada girang saling semprot baju.

“Dé, akhirné iraga lulus ajak makejang,” sambil girang tiang ngomong tekén Gedé Adi. Gedé Adi ngisang liman tiangé sambilanga makenyem.

“Yuk ka Pulaki, mai rayakan kelulusan iraga ditu!”

“Yuk, yuk, iyang milu sik magandéng nah?”

“Gampang, cenik gaé to,” kéto munyin timpal-timpalé pada girang saling sautin.

“Luh, ajak Dé magandeng injep nah?” Gedé Adi lantas ngajakin tiang.

“Nah Dé.” Bagia gati tiang rasayang. Iraga saling menikmati detik terakhir matepuk, duaning bénjangan makejang suba pada maketes, wénten sané kuliah di luar kota, magaé di rantauan, pasti kéweh lakar matepuk buin.

Suryak-suryak, munyin knalpot motor, bon cat pilox, saling corét, saling semprot, makumpul, makedékan. Makejang pada bagia.

“KKKKKRRRRRRRIIIIIIIIIIIINNNNNNNNGGGGGGGGGGGG.”

“Luh, bangun Luh, suba semengan,”  mémé makaukan sambilanga ngedor pintu kamaré.

Tusing karasa ngetél yéh paningalané, duaning bagia sané rasayang tiang wantah NGIPI. Sambilang ngeling tiang nyemak HP lakar ngubungin Gedé Adi.

“Dé, Luh iseng. Iseng Gedé, iseng timpal-timpalé masé. Luh iseng makita matemu, makita kumpul-kumpul sambilang makedékan buin.”

“Sabar Luh, Gedé iseng gati-gati masé. Astungkara pandeminé né énggal ilang. Kayang suud corona lan kumpul-kumpul buin ajak makejang nggih sayang. Selamat Luh, iraga LULUS ajak makejang.”

Suksema suba ngaé iraga saling nyaga diri, nyaga keséhatan, ngaé guminé sayan kedas polusi. Nanging tiang iseng, dot melali, dot matemu, dot ngumpul, dot makedékan ngajak timpal makejang lan Gedé Adi.  CORONA ngaé MERANA, énggal magedi eda buin mawali.

 

Kadék Sintia Érnawati
magenah ring Désa Patas, Kecamatan Gerokgak, Kabupatén Buléléng. Lulusan Pendidikan Bahasa Bali, Undiksha. Sané mangkin makarya dados Penyuluh Bahasa Bali.