Punggelan Novel; Nemoe Karma

Olih: I Wajan Gobiah

Gagambaran Manik Sudra

“Jén toeah beli njak ngisinin sapangedihan tiangé kajang kawekas-wekas, tiang njak lakar ngidepang sapakon beliné ring tiang!” 

Sapoenika pisan karenga rawos pakrimik sadjroning balé moendak, ri kalaning masa lingsir sandja. Ring Karangsoewoeng balér margi, wénten oemah madaging balé tigang boengkoel loewiripoen: metén wiadin sakoloe, moendak, bedlod miwah paon. Paoné magenah bedaoeh. Moenggoehing pidabdab paoemahané nista pisan, njihnajang sané agenahin poenika anak tiwas. Padangé ring tengatahipoené sami makepit-kepitan waoe malajah siap, pakadjengit koening masawang gadang warnannjané. Poenapi doning sapoenika, santoekan tengatahné tan wénten pati tampak sampat. Inggih sané ngranajang sapoenika, sawiréh irika tan wénten ngeloehin. Pan Soedana, sapoenika anaké mangkoesin sané noewénang oemahé poenika. Karangsoewoeng pabandjarané, koewoeban Désa Kepisah, district Dénpasar. Pan Soedana inoetjap ipoen baloe baoe pisan, paingenan waoe asasih, ngempoeang pianak alit moeani adiri. toewoeh baoe limang tiban. Pianakné moeani poenika mawasta I Soedana. Makawinan Mén Soedana padem, krana ipoen njakit ati, santoekan soléh Pan Soedanané botjok. Moenggoehing kabotjokan solah Pan Soedanané, bas banget ipoen ngoeloerin kaliangan idepnjané, mikadinipoen: ri kalaning wengi ipoen tan oening ring oemah, satata ngender oemah pisaga, toer rikalaning raina mamoeroe tatadjén. Jan tan wénten kakletjan, poepoet goelak-goelik ring pasaréanné, tan pisan ipoen njak magarapan, patjang ngarap pakarjané sane mikenohin déwékné. Sampoenang malih ngarap pakarjan gelahné, sane patjang tan ngawetoeang édalem. Jadiapin patjang mapikolih njak ipoen njen, kadirasa pakarjan ring bandjar taler tan ipoen koemarisin. Satata jéning wénten karjan bandjar, ipoen salahanga kéwanten ring bandjarné. Jén sing sangkepé pinoedjoe patjang naoer sasalahan, ipoen tan da njak medal sangkep, tan lad matinda ring sané loeh kéwanten. Asapoenika bakasé sané sampoen kaprahang pisan antoek Pan Soedana poenika. Dados wiréh asapoenika abet Pan Soedanané, satata Men Soedana njedih ati, éling ring déwékné latjoer katiba masomah ring Pan Soedana. Jén ri kalaning wengi, masan Mén Soedana masaré, masaré ipoen ngadjak pianakné kéwanten. Waoe nganteg sirahné ngawit sampoen jéh paningalané néltél, meloesin galeng, ngantos makaraina ipoen tan dados poeles. Asapoenika kéwanten indikipoené ngawit saking doemara ipoen abot tigang sasih. Ring asapoenapiné masambilan ngeling ipoen mitoetoerin pianak, segoe-segoe ipoen ngaraos, dados pianakipoené sareng ngeling. Ring asapoenapiné, rasa poeoen tangkah Mén Soedanané, sirahipoené kadi sibak, ngantos toeh kakolonganipoené tan dados magelekan. Moenggoeng raos Mé Soedanané mitoetoerin pianakipoené, tan mresidajang titiang nilad ngatoerang iriki, santoekan bes bas njedihang manah, rasa aas toelangé jén miragi pitoetoeripoené. Tan lad-lad ipoen ngamé-amé mangdé gelis padem, sawiréh manahang ipoen kala irika inab ipoen patjang oewoesan nama wirang. Nanging njoemingkinang sedihipoené, jén ri kalaning ipoen njambat padem, boja dja sangkaning ipoen takoet padem, mangedoh asapoenika. Sané ngawinang sedihné maweweh, tan lian pianakipoené, jén pét tinggal ipoen padem. Doeaning asapoenika, santoekan bapan I Soedana tan ijeng ring pianak. Poenika makawinan pianakjané tan rati ring bapa. Jén indik pakadangan Pan Soedanané goemanti samah, nanging sinamian pada gila geting ring Pan Soedana, sawiréh pabetanipoené banget roesak: begoeg, drenggi, tjinging, djail, momo, drowaka, demen ngambil kéwanten, toer njapa kadi akoe. Poenika kranané sapanjamanipoené sami sengit ring ipoen. Toer malih sami noemadakang, temah pastoené mangdé gelis njoesoep ring sikianipoené. Nanging ké kantoen taler santoel idep njama-njamanipoené sapoenika kalawatin antoek Mé Soedana, sawiréh betjik pisan ipoen maprah. Oening ipoen matilesang déwék, nasarin manah wiadin kajoen njama braja, bandjar miwah wa-désa, pratoeloeng ring njama miwah pisaga, toer plapan bakti naboehang basa. Poenika ngranajang kantoen kémad idep njama braja, pisaga miwah wa-bandjarnjané sami. Kéwanten tjédané antoek tan wénten ngarep ipoen madrebé braja irika, sawiréh ipoen djadma empi-empian, wang anjoedan saking panepi kangin, mawasta désa Kretadjiwa, wawengkon district Kesiman. Krananjané Mén Soedana anjoed mrika ngrereh timpal, boja dja antoek kkangedalan jadin kapongahan ngendon mrika. Sapoeniki kawit ipoen.

Pinoejoe masan trak pisan irika ring Kretadjiwa, dados sami ngadesah anakaké irika ngrereh paboektian, ngantos raoeh ring Benoa, Koeta miwah Boealoe. Sané rereha mrika; boeloeng, poenika kanggén dagangan, adola, wénten sané poeroepanga lambon, drona miwah bras. Pelakoeané ngadol wiadin moeroepang poenika ring Sibang, Mambal, Tegal, Pegoejangan, Sedang, miwah sané lian-lianan. Wénten taler lian pakarjané rereha, nanggap oepah neboek miwah ngalesoeng. Wénten malih madrep, mabléséng. Genahnjané ngrereh karja poenika ring Pedoengan, Pitik, Kepisah, miwah désané sané tampek-tampek irika taler. Poenika makawinan sami kadoeng wawoeh, alit nadian kelih miwah toea badjang. Mén Soedana doek poenika mengpeng badjang, mawasta ipoen Ni Madé Poerni. Sampoenang malih anak magoba sakadi Ni Madé Poerni poenika, pamoeloe dekdek toer njandat gading, moeanipoen boenter, paningalan djelih, alisipoen tiding njoerarit, bok demdem samah toer ngoelit belajag, adegipoen njandat njempaka, baoe ngoerangka. Poenapi malih minakadinnjané soesoe njangkih njalang njoeh gading kembar, betek batisipoené loewih poedak sinoengsang, patjang tan angoelangoenin asing toemingal, manawi ta botjok makletjok pisan, jéning sampoen sedeng pamengpeng badjang, sinah pisan tan priwangdé patjang ngetel ati ngiloet paoesoeh sang djedjaka. Ni Madé Poerni inoetjap milet ipoen ngrereh karja neboek ngelesoeng, noetoetin méménnja ring njama, santoekan ipoen oeboeh tan medrebé mémé-bapa roepaka. Déning ipoen oening pisan ring déwék kapioetangan djiwa saking alit, poenika makrana ipoen tan pisan poeroen tempal ring sapatoedoeh méménnja ring njaman poenika. Maliha patoet pisan ipoen maladjahang déwék, napi malih ipoen tan pamémé-bapa sané patjang tjagerang ipoen edihin ipoen boekti. Jadiapin ipoen kantoen kampoe mémé-bapa angdéné, mrasa pisan ipoen patoet maladjah matingkah, wiréh saanan manoesané, tan wénten da kaingoe antoek rarama salami-laminipoen. Poenika doning ipoen noetoe sareng ngrereh karja, napi malih antoek ipoen sampoen koemandel ring raramané poenika. Dados ring pakarjan miwah ring doenoengan, njabran ipoen kaanggoerin ntoek Pan Soedana, kabaktajang pawéh-wéh magenep, dadaaran, panganggé, raoeh ring djinah. Poenika kewanten kanggén gagadoehan antoek Pan Soedana, ja ké wengi nadian raina. Wiréh sasoewéné solah Pan Soedanané sapoenika, kénginan wawoeh pisan raraman Ni Made Poerniné raoeh ring Ni Made Poerni, sakadi anak manjama silih kodag. Nanging ké Ni Madé Porni tangar pisan ipoen ring déwék, sawiréh krasa antoek ipoen boedin Pan Soedanané sapoenika. Poenika ké awinan ipoen njoemingkinang plapanné naboehang moenji, maliat jadiapin masolah, mangdé sampoen Pan Soedana ngantos salah parna, njenggoehang déwékne makeneh demen ring Pan Soedana. Samaliha saking toeoe pisan Ni Madé Poerni tau madrebé manah goenggih, saantoekan sampoen kapineh antoek ipoen tegalé maboedi toja, anak prah sapoenika. Akéhan sané sapoenika, makakawiaktianipoen, tegal toeh malakang pisan, tan madaging njang wit teki. Malih ipoen Ni Madé Poerni manggeh pisan kantoen mamanah alit, toer maboedi maladjahang déwék, réh ring papinehnjané, mangdé sampoen reké ipoen sakadi salokané: sépan kelih, sagét sampoen toea; déréng bangoen sagét malaib. Jén angdé ipoen mamanah toea, tan pisan ipoen patiang ninggalin désa palekadanipoené. Asapoenika pisan radjég papineh Ni Madé Poerniné. Poenika makrana solah Ni Madé Poerniné soemingkin séleb toer djeben alep, nanging tan sah ngoelangoenin idep asing-asing toemingal. Jén moenggoehing papineh raraman Ni Madé Poerniné lian banget. Lian malih, ipoen doh pisan binanné, saihang ring papineh Ni Madé Poerniné. Makabinan papinehipoené, inggih patjang kaatoer ring sor poeniki. Ring pangawité pisan Pan Soedana mangoeat pawéh-wéhé mrika ring doenoengan Ni Madé Poerniné, pinoedjoe wénten kakletian ring pradésa poenika. Nyoréang ring das loeh-loehé medal nenten, djag raoeh ipoen Pan Soedana ring doenoengan Ni Madé Poerniné saha makta sedah, woh kalih gapgapan sané ian-lianan, minakadinipoen pisang, bantal miwah sakantjanipoen. Pangangken Pan Soedanané, ipoen polih reké makakletjan di toeninné. Poenika doeaning iseng ipoen magapgapan, samalihipoen dibi sandénne Pan Soedana manggoeran mrika, tan kawéhin seseban antoek raraman Ni Made Poerni poenika, sané ta kotjap ipoen tan madrebé seseban. Poenika awinan ipoen kadi mapratoeloeng ting raraman Ni Madé Poerni poenika. Asapoenika betjiké antoek ipoen nangkisang.

.................

 

Catetan: Punggelan novél puniki kaambil saking cakepan Nemoe Karma pakaryan I Wajan Gobiah sané kamedalang antuk Balai Poestaka warsa 1931.