Puisi-puisi Tatukung; tepuk api dong ceburin

Gagambaran Rika Riyanti

tepuk api dong ceburin 

 

lebur ceburin agni murub dalem silemin sagara nyilemang 

metu raré tan sangké tan purun 

tegul kedeng angkihan dalem pedalemin

éling élingan yan éling ika kalangwan 

wus punika metu kita 

tuara malih padem 

yukti langgeng 

Milano, 1914 

 

 

sayong 

 

Sayong sané tedun alon-alon ring pangawit semeng puniki, kadi réncang-réncang suwung grapa-grépé ring jendéla. Enten ipun saking pules sané satata nguyang; kantun kapanggih Hyang Kala mamargi alon ring dalem tur jaban témbok karang awak karang anak. Pinaka cihna ipun durung matulak saking pakipuan sané tekek negul paukudan ipuné. 

Uduh, réncang-réncang suwung, lanturang raksa kemit rahasya pingit puniki, sangkan paran ing sarwa numadi. Wantah kawéntenan rahasya ngarnayang urip puniki patut kajalanin. 

Kedat-enten ipun nyantos ring natar pelinggih rasa basa puniki. 

Siratang ring angin sané leplep ring selagan sayong puniki wangi abun rasa basa. Abulih abu wantah, ten lewih. 

Leiden, 1916 

 

 

kubu 

 

maraab bok-bok gulem 

masaka katik-katik tulang 

mapanyengker daging tanah 

kailehin telaga matoya rah 

kubun awak badan kerangkéng 

tanpa pamedalan tanpa jendéla 

ten wénten tuduhan ngintip surya 

getah kakawa manis masasirep 

rupa lan nama ilang ring lali 

kubun awak pasimpangan 

lawatan kubu-kubu marérod 

sadawan rérodan séwu purnama 

wantah kalangan satua payudhan 

indik panumadian mawali-wali 

kubun awak titi ugal-agil 

Leiden, 1915 

 

 

lawat 3 

 

ring napi genah lawatan i swung malémod

ri tatkala surya murub ring purwa ning purwa

napi magejeran lawatan ipuné 

ri tatkala jerijin anginé masolah nglingsiran 

sakadi gejeran lawat don-don tiingé

ring ening toyan telagané dalem 

wantah yéning murub surya sandyakala lawatan suwungé tatas malémod dawa nyugjug awun angkan cokor i ratu

tur nginep nyabran wengi irika 

Leiden, 1915 

 

 

ten 

 

Niki nentén wengi sané ngempuang i raré dumun derika duur seman ari-ariné duk kari barak, sané mapagehan sanggah tiing, matatah sarwa aksara. 

Dija dadong ané néngkléng, ané satata ngantosang di tanggun natahé, mata nelik layah nyelép, bok magambahan matapih duur entud. 

Tuara ada kongkongan cicing ngawartayang bon segehan pancawarnané. 

Dija ya i angin selem denges magoba peteng dedet ané ngurip lawatan punyan-punyanané dadi ratun wengi. 

Tuara ada gejeran uluhati kadingehang kuping matalang. 

Leiden, 1916 

Catetan: Kaambil saking cakepan Lawat-lawat Suwung kakawian Tatukung