Puisi-puisi Ki Dusun (I Putu Gedé Suata); Saru Guguné Tuhu

Sumber Gagambaran; id.pinterest.com

Bengkang 

 

kuluk bengil ngilgilang 

ngengkal ngilehin jalikan 

 

linggah akasa 

dalem segara 

tusing karungu 

 

carcan janma 

kandan gumi 

tusing karambang 

 

nanging sangkaning guna 

tindih nganutin geginan 

lemah ngijengin umah 

lemeng ngijening jineng 

 

gumanti basang bédog 

élah ngakebin plangkan 

aluh nyujukang entud 

bonggan ngungkabang basang bengkang 

 

8501 

 

 

Saru Guguné Tuhu 

 

tengilang limané tawah 

yéning ipun matandang 

apang saru 

 

siepang bibihé lambih 

yéning dané mabaos 

apang saru 

 

oyongang kenehé beneh 

yéning ida makayun 

apang saru 

 

saru barengin liu 

saru benengan liu 

tusing ngitung ala ayu 

tusing ngitung tan pabayu 

nyaruang limané Iayu 

nyaruang bibihé payu 

nyaruang kenehé guyu 

 

yéning ento tuhu 

yéning kéto gugu 

saru tuhuné gugu 

saru guguné tuhu 

 

11501 

 

 

Tingkih 

 

tingkihé gipih 

mantihang déwék 

boya soroh badihan 

tidong sorong katihan 

 

déning padi abadih 

ibuh kedisé ubuh 

yéning puyung? 

déning tiing akatih 

metu bungbungé sumbung 

yéning bolong? 

 

nirdon sarwa badihan 

déning padi puyung 

nirdon sarwa katihan 

déning bungbung bolong 

 

tingkihé jerih 

nyikutang déwék 

déning taluh semuuk 

nirdon sarwa bungkulan 

 

tingkihé pedih: 

yéning dadi padi eda padi puyung 

yéning dadi bungbung eda bungbung bolong 

yéning dadi taluh eda taluh semuuk 

 

175013 

 

 

Gedebeg 

 

gedebeg nglibeg bebeg 

andeg-andeg angseg-angseg 

mawates batis gedebeg 

 

kusiré nguyukang kiap 

anggut-anggut unggit-unggit 

mawastu waneh mangsegan 

 

ratu betara 

ring dija ratu magenah 

manawi sangkaning wisésa 

mawinan wénten tan kanten 

 

aksi ida anaké lingsir 

setata nunasang dauh 

malih pidan ratu rauh 

 

aksi dané anaké oneng 

setata nunasang dauh 

sampunang ugi ratu rauh 

 

aksi ipun kusir gedebeg 

manawi sampun waneh 

ipun nglibeg 

mawates batis gedebeg 

 

185014 

 

 

Keneh Pisaga 

 

suba tawang pada nawang 

kaloktah kalumrah 

lamisé bates bebaosan 

 

sagilik saguluk 

paras-paros sarpanaya 

salunglung sabayantaka 

briuk sapanggul 

anut sadulur 

 

nanging patuh kéweh sukeh 

déning pateh ngelah keneh 

 

yadin selat témbok 

sikut ngenah pradé matandang 

nanging kéweh baan nandangin 

isin tandang pisaga 

 

yadin selat témbok 

sikut dingeh pradé matandak 

nanging sukeh baan nandangin 

isin tandak pisaga 

 

kéweh baan ngenehang

isin keneh pisaga

 

3501 

 

Catetan: Kaambil saking cakepan Magantung kakawian Ki Dusun