Puisi-puisi IGG Djelantik Santha; Tungtung Urip

Gagambaran Rika Riyanti

Pura Suranadi 

 

Ring tepining wana ukir 

toyané mumbul, apit batu soring iding patédoh para bakta nangun bakti 

cekéh sata wana lan paksiné nguci kadi iri, ulam julité polih upeti taluh lan roti. 

 

Pakecorcor toyané ening maka tirtha pamunah sarwa mala, pangentas sarwa papa, 

saking payogan Bagawan Sangu Pati nguni 

pinaka tirta yatra nincapang budi suci. 

 

Tepining wana, palemahan Suranadi sayan asri 

kadi catur wéda ngentas dasa malaning jatma 

sami tangkil nunas amerta sanjiwani. 

 

baktané ring pura mabakti, sang sujana ring empul masuci, dagangé ring warung nunas bati, montoré wira-wiri, 

petani ring sawah sami teleb ngaci mangda toyané tetep mili, para yuanané malali mapi-mapi mabakti, 

kéwala pinunasé jodoné pang leket kayang mati. 

 

Di Suranadi yéning lascarya wiakti manadi, yéning drowaka sinah béda nyalawadi 

Pura Suranadi, 

sayan asri maciri toyané tetep suci 

baktané sayan bakti. 

 

Suranadi, 10 Désémber 2001 

 

 

Pénsiun 

 

Titiang sampun kamping ring pasisi, 

kadi bendéga sané mantuk maring kakisik, jukung lan dayungé sampun tingkes kategul ring panyangcangan, makabun jaring Ian bidak putih. 

 

Liman titiang sampun bubul, oodé enduk, nanging wénten rasa bangga ring ati, 

kéh sampun anarung arungan, mabar angin, 

lancut lan angin linus, gumanti ngrereh daging telasé sané tan kirang kudkudin. 

 

Jukungé sampun magentos dados perahu, 

dumadak gelis magentos dados kapal, 

ring dingding nyané kasurat wastan titiangé 

sareng ngupapira, ngetakang pancing Ian jaring, 

némbél bedah Ian nganyarin cét sané muhmuh. 

 

Mangkin titiang sampun rauh ring pasisi, 

napak ring biasé sané putih bresih, galahé 

mangkin wantah nyurat lampahé ring toya ning 

nénten wénten alang éling, napi malih tolah-tolih 

bendéga panerus sampun sayaga ngentosin 

amung nitip, piara kapalé mangda tetep ajeg 

malayar nabdab sadaging negari. 

 

Dénpasar, kala pénsiun, 1 Septémber 1997 

 

 

Ngipi

 

Cening kija luas sayang 

kanti ngipi mémé nganti jumah 

jelanané samun maagagan 

peluh pidit teka magésoan 

boké makabrangbringan 

dija mara maan masaré 

dadi bajuné kusut daki cuil 

lepitanné misi lelipan. 

 

Da ja bas manting tulang 

idupé a gayung camplung 

uber teledu lipan ngaba wisia 

disubané beseh cening gela-gela 

mémé ngidih simbuh a keprusan 

tresnan méméné tusing tuna 

jelé melah ngipi mémé tetep bagia cening ané tresnain mémé setata. 

 

Kesiman, 20 Séptémber 2015

 

 

Tungtung Urip 

 

Suba tawang déwéké dongkang 

nguda enu masih kangkang 

sesai mamaca tutur magadang 

tusing masih nepukin galang 

kadén rurungé enu lantang 

ambah mulih ka gumin Hyang 

melahan pules mamantang 

besikang kenehé da bingbang 

tungtung uripé incepang 

kadén cening suba nawang 

rurung sepi buin lantang 

pucuking Ang Ung Mang

 

Dénpasar, 10 Séptémber 2015 

 

 

Taluh 

 

Bunter yén di aksara windu 

ngenah puyung nanging bek misi 

nengil cara barang mati 

nanging ngawetuang kauripan 

ulian dasar 

panca maha buta 

 

Kulit katos tuah ragan pertiwi 

apah waluya kadi putihné 

kuning ngabar-abar tuah téja 

unteng maniké tan bina 

kadi bayu sumber urip 

isin puyung tuah akasa 

pinaka gambaran buana alit 

ka keem olih inanné 

ané lekad 

masih ulian I Taluh. 

 

Kesiman, 6 Januari 2010