Puisi-puisi I Wayan Ésa Bhaskara; Ngejuk Angka
 |
| Sumber Gagambaran; id.pinterest.com |
Dadi
Petani
tiang bengong
ampehang kesir angin cariké
tiang tuah petani
geginané nanem padi
tiang uyang
guminé suba pedih
jatmané akéh pelih
langité kélangan kenyemné
yéhé masemu guyu di pundukané
tiang bengong
ampehang kesir angin cariké
tiang tuah petani
geginané tuah ngipi
(2015-2019)
Masker
puniki anggén mengkeb
puniki satua ngalawan padéwékan
puniki anggén nyekeb
pikayun campah, ngelawan galah
puniki anggén
masker wastané
anggén nyengker padéwékan,
sekancan panyaman
mangda nénten kanti mati di pabinan
(2020)
Jalan
Gajah Mada, Meli Kopi
kopiné kaseduh,
miyikné nyusup ring angen
kopiné kasiup,
miyikné ngelangenin ati
ring marginé kebus
tiang matakén ring kayun,
“siraké tiang, kanti inguh ulian kopi?”
kayuné ngumbara margi utama, Gajah Mada
kopiné ngancan ngémbonan
tan nemu cawisan,
kopiné telas ngijeng ring kolongan
(2020)
Mawajik
déwa ratu! makejang jatma rajin mawajik
tan parérénan
cirin jagaté sampun usak
déwa ratu! pejabaté taler mawajik
wusan rapat, wusan ngemel proyék
minab apang ical sebet rakyaté
apang nénten kotor tangan ipunné
déwa ratu! jakti asapunika
rakyatté tundéna mawajik taler
nika ngeranayang sami kénak
nika ngeranayang suarga baliné ajeg
déwa ratu! ulian pejabaté mawajik
akéh rakyaté kélangan tanah
kélangan umah, kélangan manah
déwa ratu! pejabaté ngancan gemuh
rakyaté mandus peluh
ulian sami dayuh
(2020)
Syair
Virus
maca syair,
ngepung pipis
maca virus
nyaluk sandikala
angkané makacakan
magebagang ring balé banjaré
ring wantilan purané
maca syair
ngulat-ulat angka
maca virus
anaké ngalih gaé
anaké ngalih pipis
maca syair
ngancan telas pipisné
angkané nelas-nelasang
maca virus, maca syair
sareng timpal-timpal
ring balé banjaré
ulian virus, maca syair
anaké ngalih gaé
(2020)
Ngejuk
Angka
masan virus
masang nomer
akéh angka, néntén ngidang ngejuk
maca gambar, néntén kapinehin
akéh angka, sebet
bedik angka, sebet taler
masan virus
masang nomer
ngejuk angka
kéwehan tekéning ngejuk céléng
ngejuk angka
kéwehné sakadi ngejuk koruptor
(2020)
magenah ring Tabanan, Bali. Ngawit 2014 makarya dados guru Bahasa Indonésia ring SMK Negeri 1 Dénpasar. Kakawianipuné marupa puisi, cerpen, miwah esai sané sampun kamuat ring Bali Post, Denpost, Tribun Bali, Pos Bali, tatkala.co, lan Suara Saking Bali.
.jpg)
No comments