Puisi-puisi I Gdé Dharna; Gumi Nungkalik

Gagambaran Manik Sudra

Gumi Nungkalik

 

Mula bingung nyiksik urip

di penggaké ngentungang carikan

nempang nem korahang roraa

roras kuangin telu metu dasa 

ada unduk kéto?

yan tusing ulian sakit gumi

gumi jani mula nungkalik 

goak selem korahang putih

putihé jani mula tan paaji

nah... kanggo ditu 

icang lakar dini enu ngoyong

kanggoang malu magandong 

di tundunné i bongol

sambilang ngampilang lidin busung

apang nyak mabesikan

ngantiang kumpin mokaké 

koné lakar teka uli bongkol binginé 

 

Juli 1994 

 

 

Lovina

 

Anginé manyirsir sumilir

ombaké putih-gutih masuryak

sakadi manyembrama ring sang rauh 

 

Ngantenang suryané tedun 

langit lan segarané kauh pakranyab

tan bina kadi putri ayu medal

mabusana bungah 

 

Lovina yukti asri 

kagelar ki panji tisna

kaemban saking seraya 

rontal sastra sané kapuji 

i swasta awarsa ring bedahulu

sukréni teruni bali 

sampun kaloktah ring gumi 

 

Lovina apik lan sutrepti

irika ombaké banban

makidung ring pasisir

makebat bias selem

siang lan dalu 

 

Ngiring rauh ka lovina

nganyudang manahé berancah 

 

April 1991 

 

 

Ngalih Muncuk

 

Kudiang ngalih muncuk 

yan mongkod punya tuara mampuh

mampuhé tuwara alian bayu gedé

gedé raos katomplokang angin

anginé pedas tan palawat

lawat petengé tan pabongkol

bongkolé borok kélangan rasa

rasaang ento di muncuk layah

layahé kalawan gigi 

patut saling ajinin 

aji sikut ajak liu 

liunan muncuk carangé nyeléd

nyeléd katanah i kambing betek 

 

1994

 

 

Bhuwana Kertha

 

Tegeh ngalik

puncaknyané manuding langit

mapinda brahma murub

agung wibawané yukti

ngagen swadarman satria sujati

 

Bhuwana kertha lambang satia

para pejuang bangsa

sutindih ring negara

mabela pati ring pertiwi

 

Taru beringiné kalih

wimba mérah putih

katandur dawegé nguni

daweg révolusiné nundung penjajah

 

Bhuwana Kertha

tugu perjuangan

ngarebut kemerdékaan

mangda éling sareng sami

ring jasan Ida

sang satria jati

sané sampun lina

ring payudan

 

Januari 1990

 

Catetan: Puisi-puisi puniki kaambil saking manuskrip Sasmitan Gumi